ମୁମ୍ବାଇ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁକୁ କେହି ସହଜରେ ଗ୍ରହଣ କରିପାରୁନାହାନ୍ତି। ବିଶେଷକରି ତାଙ୍କ ପ୍ରଶଂସକ ଏବଂ କିଛି ଫିଲ୍ମ କଳାକାର ଆଦୌ ବିଶ୍ୱାସ କରୁନାହାନ୍ତି। ସୁଶାନ୍ତଙ୍କୁ ଶ୍ରଦ୍ଧାଞ୍ଜଳି ଦେବା ଅବସରରେ ସୋସିଆଲ ମିଡିଆରେ ଲଗାତର ଫଟୋ, ଭିଡିଓ ଶେୟାର କରି ଚାଲିଛନ୍ତି। ଏହି ପରିପ୍ରେକ୍ଷୀରେ ସୁଶାନ୍ତ ପଢୁଥିବା ସ୍କୁଲରେ ମଧ୍ୟ ତାଙ୍କୁ ଗଭୀର ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି। ଏହି ସମୟର କିଛି ଫଟୋ ସୋସିଆଲ ମିଡିଆରେ ଶେୟାର କରାଯାଇଛି। ସୁଶାନ୍ତ ପାଟନାର ସେଣ୍ଟ କରେନ୍ ହାଇସ୍କୁଲରେ ପଢୁଥିଲେ। ସ୍କୁଲର ଫେସ୍ବୁକ୍ ଆକାଉଣ୍ଟ୍ରେ ଏକ ପୁରୁଣା ଫଟୋ ଶେୟାର କରାଯାଇଛି। ଯେଉଁଥିରେ ସୁଶାନ୍ତ ସ୍କୁଲ ଡ୍ରେସ୍ ପିନ୍ଧିଥିବା ନଜର ଆସିଛନ୍ତି। ସ୍କୁଲ ପକ୍ଷରୁ ୨ଟି ପୁରୁଣା ଫଟୋ ଶେୟାର କରାଯାଇଛି।
ଗୋଟିଏ ଫଟୋରେ ସୁଶାନ୍ତ ସହପାଠୀଙ୍କ ସହ ନଜର ଆସିଥିବା ବେଳେ ଆଉ ଏକ ଫଟୋରେ ସାଙ୍ଗମାନଙ୍କ ସହ ନଜର ଆସିଛନ୍ତି। ଏହି ଫଟୋ ଶେୟାର କରି ସ୍କୁଲ ପକ୍ଷରୁ କୁହାଯାଇଛି, ଜଣା ନାହିଁ ତୁମେ କ’ଣ ପାଇଁ ଏମିତି କଲ? କିନ୍ତୁ ଏହା ଠିକ୍ ନୁହେଁ, ତୁମେ ସବୁବେଳେ ମନେ ପଡ଼ିବ। ତୁମର ଆତ୍ମାକୁ ଶାନ୍ତି ମିଳୁ।
ସୋସିଆଲ ମିଡିଆରେ ଏହି ଫଟୋ ଦେଖି ସୁଶାନ୍ତଙ୍କ ପ୍ରଶଂସକମାନେ ବିଭିନ୍ନ ପ୍ରତିକ୍ରିୟା ରଖିଛନ୍ତି। ଜୁନ୍ ୧୪ରେ ସୁଶାନ୍ତ ଆତ୍ମହତ୍ୟା କରିଥିଲେ। ଯାହାକୁ ଆଜି ବି କେହି ବିଶ୍ୱାସ କରିପାରୁନାହାନ୍ତି। ସେ କାହିଁକି ଏପରି ପଦକ୍ଷେପ ନେଲେ ସମସ୍ତଙ୍କ ମନରେ ପ୍ରଶ୍ନବାଚୀ ହୋଇରହିଯାଇଛି।