କଟକ,୧୫।୧୧(ଶିଳ୍ପା ପ୍ରିୟଦର୍ଶିନୀ):ଏସିଆ ମହାଦେଶର ସର୍ବବୃହତ୍ ମୁକ୍ତାକାଶ ମେଳା ତଥା ଐତିହାସିକ କଟକ ବାଲିଯାତ୍ରା ଶୁକ୍ରବାରଠାରୁ ଆରମ୍ଭ ହେବ। ଅପରାହ୍ନ ୫ଟା ୩୦ରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗଦେଇ ବାଲିଯାତ୍ରା ମହୋତ୍ସବ-୨୦୨୪କୁ ଉଦ୍ଘାଟନ କରିବେ। ଏଥିସହ ୧୩ ରାଷ୍ଟ୍ରର ରାଷ୍ଟ୍ରଦୂତ ଏବଂ ହାଇକମିଶନରଙ୍କ ସମେତ ଅନ୍ୟ ଅତିଥିମାନେ ଯୋଗଦେବାର କାର୍ଯ୍ୟକ୍ରମ ରହିଛି। ବାଲିଯାତ୍ରା ୨୨ ତାରିଖ ପର୍ଯ୍ୟନ୍ତ ୮ଦିନ ଧରି ଚାଲିବ। ପ୍ରଥମ ଥର ବାଲିଯାତ୍ରା ପଡ଼ିଆରେ ପିଠା ମହୋତ୍ସବ ଆୟୋଜନ ହେବ। ବାଲିଯାତ୍ରା ମହୋତ୍ସବକୁ ୟୁନେସ୍କୋ ସାର୍ଟିଫିକେଶନ୍ ହାସଲ କରିବା ଲକ୍ଷ୍ୟ ରଖାଯାଇ ଜିଲା ପ୍ରଶାସନ ପକ୍ଷରୁ ପଦକ୍ଷେପ ଆରମ୍ଭ ହୋଇଛି ବୋଲି ଗୁରୁବାର ବାଲିଯାତ୍ରା ଉପର ପଡ଼ିଆଠାରେ ଆୟୋଜିତ ଖବରଦାତା ସମ୍ମିଳନୀରେ ଜିଲାପାଳ ଦତ୍ତାତ୍ରୟ ଭାଉସାହେବ ସିନ୍ଦେ କହିଛନ୍ତି।
ଏନେଇ ଜିଲାପାଳ ଅଧିକ ସୂଚନା ଦେଇ କହିଛନ୍ତି, ଅତିଥିମାନେ ସିଲଭରସିଟି ବୋଟ କ୍ଲବଠାରୁ ୪ଟି ବୋଇତ ସଦୃଶ ବୋଟ୍ରେ ମଞ୍ଚ ନିକଟକୁ ଆସିବାର ବ୍ୟବସ୍ଥା କରାଯାଇଛି। ଗତବର୍ଷ ୬୦ଲକ୍ଷରୁ ଅଧିକ ଲୋକ ବାଲିଯାତ୍ରା ବୁଲିଥିବା ବେଳେ ଚଳିତବର୍ଷ ୭୦ ଲକ୍ଷ ଜନସମାଗମ ହେବାର ଆକଳନ କରାଯାଇଛି। ଚଳିତଥର ତଳପଡ଼ିଆରେ ୩ଟି ମୁଖ୍ୟ ପ୍ରବେଶ ଦ୍ୱାର ଏବଂ ଗୋଟିଏ ଜରୁରିକାଳୀନ ପ୍ରବେଶ ବା ପ୍ରସ୍ଥାନ ଦ୍ୱାର ଖୋଲାଯିବା ସହ ପଡ଼ିଆ ମଧ୍ୟରେ ଗମନାଗମନ ନିମନ୍ତେ ୪ଟି ରାସ୍ତା କରାଯାଇଛି। ଚଳିତବର୍ଷ ଭଳି ଲଗାତର ୩ବର୍ଷ ଧରି ଏଭଳି ଶୈଳୀରେ ବାଲିଯାତ୍ରା ଆୟୋଜନ ହେଲେ ଅନ୍ତର୍ଜାତୀୟ ମାନ୍ୟତା ମିଳିବା ସମ୍ଭାବନା ବଢିବ ବୋଲି ଜିଲାପାଳ କହିଛନ୍ତି। ଏଥିସହ ଦକ୍ଷିଣ-ପୂର୍ବ ରାଷ୍ଟ୍ର ସମୂହ ସହ ଉତ୍କଳୀୟ ନୌବାଣିଜ୍ୟ ପରମ୍ପରାକୁ ନେଇ ଏକ ସ୍ବତନ୍ତ୍ର ପାଭିଲିଅନ୍ ଯୋଡ଼ାଯାଇଛି। ବାଲି, ଇଣ୍ଡୋନେସିଆ ଆଦି ୮ଟି ଦେଶର ସାଂସ୍କୃତିକ ଦଳ ବାଲିଯାତ୍ରାରେ ଯୋଗଦେବେ। ୩୪ ଏକର ଜାଗା ତଳପଡ଼ିଆ ଓ ସାଢେ ୮ ଏକର ଜାଗାରେ ଉପରପଡିଆରେ ପ୍ରାୟ ୨୫୦୦ ଷ୍ଟଲ ରହିଛି। ସେଥିମଧ୍ୟରୁ ଓରମାସ୍ର ରହିଛି ୫୦୦ ଷ୍ଟଲ। ବିଶେଷ କରି ମହିଳା ଉଦ୍ୟୋଗୀଙ୍କୁ ସେମାନଙ୍କ ସାମଗ୍ରୀ ପ୍ରଦର୍ଶନ ଓ ବିକ୍ରି ନିମନ୍ତେ ଓର୍ମାସ୍ରେ ପ୍ରାଧାନ୍ୟ ଦିଆଯାଇଛି। ମାଟିପାତ୍ର ତିଆରି ଏବଂ ତନ୍ତ ବୁଣା ଆଦି ମଧ୍ୟ ପ୍ରଦର୍ଶନ କରାଯିବାର ବ୍ୟବସ୍ଥା ହୋଇଛି। ଚଳିତଥର ୭ଟି ଅନ୍ତର୍ଜାତୀୟ ଷ୍ଟଲ ସ୍ଥାନ ପାଇଛି। ଅନ୍ୟପଟେ ଏଥର ଅନ୍ୟତମ ଆକର୍ଷଣ ପାଲଟିବ କଟକ ଇନ୍ କଟକ। ଓଡ଼ିଆ ଅସ୍ମିତା ସହ ଓଡ଼ିଆ ସିନେମାର କ୍ରମ ବିକାଶର ଚିତ୍ର ଏଠାରେ ସ୍ଥାନିତ କରାଯାଇଛି। ବଲିଉଡ଼ ନାଇଟ ସହ ମହାନଦୀରେ ୱାଟର ଲେଜର ଶୋ, ଡ୍ରୋନ ଶୋ, କାଇଟ୍ ଫେଷ୍ଟିଭାଲ ଓ ଜଳକ୍ରୀଡ଼ାର ବ୍ୟବସ୍ଥା କରାଯାଇଛି। ଏହି ସମସ୍ତ କାର୍ଯ୍ୟର ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚତ୍ଛି। ବାଲିଯାତ୍ରାରେ କାର୍ଯ୍ୟ କରୁଥିବା ସମସ୍ତ ସଂସ୍ଥାକୁ ଏକ ମାସ ମଧ୍ୟରେ ଦେୟ ପୈଠ କରାଯିବ ଏବଂ ପରେ ସର୍ବସାଧାରଣରେ ବାଲିଯାତ୍ରା ଖର୍ଚ୍ଚ ଉପସ୍ଥାପନ କରାଯିବା ନେଇ ଜିଲାପାଳ ସିନ୍ଦେ କହିଛନ୍ତି। ଖବରଦାତା ସମ୍ମିଳନୀରେ ଅତିରିକ୍ତ ଜିଲାପାଳ ଶିବ ଟପ୍ପୋଙ୍କ ସମେତ ଅନ୍ୟ ଅଧିକାରୀ ଉପସ୍ଥିତ ଥିଲେ। ଅନ୍ୟପକ୍ଷରେ କଟକ ବାଲିଯାତ୍ରାକୁ ଜାତୀୟ ମାନ୍ୟତା ମିଳିବା ନେଇ ମୁଖ୍ୟମନ୍ତ୍ରୀ ଘୋଷଣା କରିପାରନ୍ତି ବୋଲି ଚର୍ଚ୍ଚା ହେଉଛି।