ଗଞ୍ଜାମ,୪।୫(ଡି.ଏନ୍.ଏ.): ଗଞ୍ଜାମରେ ପବିତ୍ର ଚନ୍ଦନଯାତ୍ରା ଆରମ୍ଭ ହୋଇଛି। ଅକ୍ଷୟ ତୃତୀୟା ଅବସରରେ ଶ୍ରୀମଦନ ମୋହନ ଗୋପାଳ ସ୍ବାମୀଙ୍କ ମନ୍ଦିରରେ ପାରମ୍ପରିକ ରୀତିନୀତି ଅନୁଯାୟୀ ପୁଜାର୍ଚ୍ଚନା କରାଯିବା ପରେ ସନ୍ଧ୍ୟାରେ ଠାକୁର ଶୋଭାଯାତ୍ରାରେ ବାହାରିଥିଲେ। ସାମନ୍ତରା ସାହି, ଦୁର୍ଗାଦେବୀ ସାହି, ଚୌଧୁରୀ ପଣ୍ଡା ସାହି, କରଣ ସାହି ଦେଇ ଏହି ଶୋଭାଯାତ୍ରା ପୁଣି ମନ୍ଦିର ନିକଟକୁ ଫେରିଥିଲା। ଏହାପରେ ପ୍ରାଚୀନ ସାମନ୍ତରା ପୁଷ୍କରିଣୀରେ ପୂର୍ବରୁ ସୁସଜ୍ଜିତ ହୋଇଥିବା ନୌକାରେ ବସି ଠାକୁର ନୌବିହାର କରିଥିଲେ। ଏହି ଯାତ୍ରା ୨୧ ଦିନଧରି ଚାଲିବ। ଅନ୍ୟପଟେ ମହିଳା ଶ୍ରଦ୍ଧାଳୁମାନେ ଠାକୁରଙ୍କ ନୌକା ବିହାର ସହ ପୁଷ୍କରିଣୀର ଚର୍ତୁଃପାର୍ଶ୍ୱରେ ବେଢ଼ା ପରିକ୍ରମା କରିଥିଲେ। ସେହିପରି ମନ୍ଦିର ଏବଂ ପୁଷ୍କରିଣୀର ଚର୍ତୁଃପାର୍ଶ୍ୱ ରଙ୍ଗବେରଙ୍ଗର ଆଲୋକ ମାଳାରେ ସୁସଜ୍ଜିତ ହୋଇଥିବା ଦେଖିବାକୁ ମିଳିଛି। ବାଦ୍ୟ ବାଜଣା, ହରିବୋଲ, ହୁଲହୁଳିରେ ସ୍ଥାନୀୟ ଅଞ୍ଚଳରେ ଆଧ୍ୟାତ୍ମିକ ପରିବେଶ ସୃଷ୍ଟି ହେବା ସହ ଉତ୍ସବମୁଖର ହୋଇଉଠିଛି।