ମୁମ୍ବାଇ: ଭାରତୀୟ ପୁଞ୍ଜିବଜାର ଗୁରୁବାର ଐତିହାସିକ ରେକର୍ଡ ସ୍ତର ଛୁଇଁବାକୁ ସକ୍ଷମ ହୋଇଛି। ଦିନର କାରବାରରେ ସେନ୍ସେକ୍ସ ୫୦ ହଜାର ପଏଣ୍ଟ ଛୁଇଁଥିଲା। ହେଲେ କାରବାର ଶେଷ ବେଳକୁ ଏହା ୧୬୭ ପଏଣ୍ଟ ଖସି ୪୯,୬୨୪.୭୬ ପଏଣ୍ଟରେ ବନ୍ଦ ହୋଇଛି। ସେହିଭଳି ନିଫ୍ଟି କାରବାର ୫୪.୩୫ ପଏଣ୍ଟ ବା ୦.୩୭% ଖସିବା ଯୋଗୁ ଏହା ୧୪,୫୯୦.୩୫ ପଏଣ୍ଟ ସ୍ତରରେ ବନ୍ଦ ହୋଇଛି। ସେନ୍ସେକ୍ସରେ ସବୁଠାରୁ ଭଲ କାରବାର କରିଥିବା ଶେୟାର ମଧ୍ୟରେ ଓଏନ୍ଜିସି ରହିଛି। ଏଥିରେ ପ୍ରାୟ ୪% ବୃଦ୍ଧି ପରିଲକ୍ଷିତ ହୋଇଛି। ସେହିଭଳି ଭାରତୀ ଏୟାରଟେଲ, ଏସ୍ବିଆଇ, ଇଣ୍ଡସ୍ଇଣ୍ଡ ବ୍ୟାଙ୍କ, ଏନ୍ଟିପିସି, ସନ୍ଫାର୍ମା ଏବଂ ଆଇଟିସିର କାରବାର ମଧ୍ୟ ଉନ୍ନତ ରହିଛି। ଭଲ କାରବାର ହାସଲ କରିଥିବା ଅନ୍ୟ ଶେୟାର ମଧ୍ୟରେ ବଜାଜ ଫିନ୍ସର୍ଭ, ବଜାଜ ଅଟୋ, ରିଲାଏନ୍ସ ଏବଂ ଏସିଆନ ପେଣ୍ଟସ ଭଳି କମ୍ପାନୀ ରହିଛନ୍ତି।
ଏହି ସମୟରେ ଟଙ୍କା ୬ ପଇସା ଦୃଢ଼ ହେବା ଯୋଗୁ ୫ ମାସର ସର୍ବୋଚ୍ଚ ସ୍ତର ୭୨.୯୯ ଟଙ୍କା ରହିଛି। ଏସିଆର ଅନ୍ୟ ପ୍ରମୁଖ ଶେୟାର ବଜାର ଯଥା ସାଂଘାଇ, ସିିଓଲ ଏବଂ ଟୋକିଓରେ ଶେୟାର କାରବାର ଭଲ ରହିଛି। କେବଳ ହଂକଂ ଶେୟାର ବଜାରରେ କାରବାର ନିମ୍ନରେ ରହିଛି। ୟୁରୋପର ଶେୟାର ବଜାରରେ ମିଶ୍ରିତ ଫଳାଫଳ ଦେଖିବାକୁ ମିଳିଛି। ଭାରତୀୟ ପୁଞ୍ଜିବଜାରରେ ପ୍ରଫିଟ ବୁକିଂ ଯୋଗୁ କାରବାର ଶେଷ ବେଳକୁ ବଜାର ନିମ୍ନରେ ରହିଛି। ଆମେରିକା ରାଷ୍ଟ୍ରପତି ଜୋ ବାଇଡେନ୍ କାର୍ଯ୍ୟ ଆରମ୍ଭ କରିବା ପୂର୍ବରୁ ଏହା ଭାରତୀୟ ଶେୟାର ବଜାର ଉପରେ ସକାରାତ୍ମକ ପ୍ରଭାବ ପକାଇଥିଲା। ଫଳରେ ସେନ୍ସେକ୍ସ ୫୦ହଜାର ସ୍ତର ଟପିଯାଇଥିଲା। ଗୁରୁବାର ଭାରତୀୟ ପୁଞ୍ଜିବଜାରରେ ବିଦେଶୀ ନିବେଶକମାନେ ୨୨୮୯ କୋଟି ଟଙ୍କା ନିବେଶ କରିଛନ୍ତି। ବୁଧବାର କାରବାର ଭଲ ରହିଥିବା, ଶୁକ୍ରବାର କାରବାର ବଢିବାରୁ ନିବେଶକଙ୍କୁ ୧.୬୫ ଲକ୍ଷ କୋଟି ଟଙ୍କା ଲାଭ ହୋଇଛି। ବମ୍ବେ ଷ୍ଟକ୍ ଏକ୍ସଚେଞ୍ଜର ବଜାର ପୁଞ୍ଜୀକରଣ ୧୯୭.୫ ଲକ୍ଷ କୋଟି ଟଙ୍କାକୁ ବୃଦ୍ଧି ଘଟିଛି। କାରବାର ଉନ୍ନତ ରହିଲେ ସେନ୍ସେକ୍ସ ୫୦ ହଜାର ଟପିବା ନେଇ ବଜାର ବିଶେଷଜ୍ଞ ଆଶା ପ୍ରକଟ କରିଛନ୍ତି।
