ଟୋକିଓ,୧।୮: ଇତିହାସ ରଚିଲେ ଭାରତୀୟ ମହିଳା ଶଟଲର ପି ଭି ସିନ୍ଧୁ। ପ୍ରଥମ ଭାରତୀୟ ମହିଳା ଖେଳାଳି ଭାବେ ସିନ୍ଧୁ ଜିତିଛନ୍ତି ଦୁଇଟି ଅଲିମ୍ପିକ୍ସ ପଦକ। ରିଓ ଅଲିମ୍ପିକ୍ସରେ ରୌପ୍ୟ ପଦକ ବିଜୟନୀ ସିନ୍ଧୁ ଟୋକିଓ ଅଲିମ୍ପିକ୍ସରେ ହାତେଇଛନ୍ତି ବ୍ରୋଞ୍ଜ ପଦକ। ରବିବାର ଅନୁଷ୍ଠିତ ମ୍ୟାଚ୍ରେ ୬ଷ୍ଠ ସିଡ୍ ମାନ୍ୟତା ପ୍ରାପ୍ତ ସିନ୍ଧୁ ୨୧-୧୩, ୨୧-୧୫ ଗେମ୍ରେ ଚାଇନାର ହେ ବିଙ୍ଗ ଜିଆଓଙ୍କୁ ହରାଇ ଦେଇଛନ୍ତି। ଆରମ୍ଭରୁ ହିଁ ସିନ୍ଧୁ ପ୍ରତିପକ୍ଷ ଶଟଲରଙ୍କ ଉପରେ ଚାପ ପକାଇଥିଲେ। ମାତ୍ର ୨୩ ମିନିଟ୍ ମଧ୍ୟରେ ସିନ୍ଧୁ ଜିତି ନେଇଥିଲେ ପ୍ରଥମ ଗେମ୍। ଦ୍ୱିତୀୟ ଗେମ୍ରେ ଅବଶ୍ୟ ୮ମ ସିଡ୍ ବିଙ୍ଗ ଜିଆଓ ମ୍ୟାଚ୍କୁ ଫେରିବା ପାଇଁ ଖୁବ୍ ପ୍ରୟାସ କରିଥିଲେ। କିନ୍ତୁ ସୁଯୋଗ ଦେଇ ନ ଥିଲେ ସିନ୍ଧୁ।
ଟୋକିଓ ଅଲିମ୍ପିକ୍ସରେ ଏହା ଭାରତର ଦ୍ୱିତୀୟ ପଦକ। ଏଥି ପୂର୍ବରୁ ଭାରତକୁ ପ୍ରଥମ ପଦକ ଆଣି ଦେଇଥିଲେ ମୀରାବାଇ ଚାନ୍ନୁ। ଓ୍ବେଟଲିଫ୍ଟର ଚାନ୍ନୁ ହାତେଇଥିଲେ ରୌପ୍ୟ ପଦକ।