ଦୁବାଇ,୨୫।୧୦: ଦୁବାଇ ଗ୍ରାଉଣ୍ଡରେ ୨୯ ବର୍ଷ ପରେ ଇତିହାସ ରଚିଛି ପାକିସ୍ତାନ। ଦିନିକିଆ ଏବଂ ଟି -୨୦ ବିଶ୍ୱକପରେ ଲଗାତାର ୧୨ଟି ମ୍ୟାଚ ହାରିଯିବା ପରେ ପାକିସ୍ତାନ ଏହି ଇତିହାସ ବଦଳାଇ ଦେଇଛି। ଇତିହାସ, ସାମ୍ପ୍ରତିକ ଫର୍ମ ଏବଂ ଅଭିଜ୍ଞତା ଟିମ ଇଣ୍ଡିଆ ସହିତ ସବୁକିଛି ଥିଲା। କିନ୍ତୁ ଏହି ଲଜ୍ଜାଜନ ପରାଜୟ ଭାରତକୁ ଥରାଇ ଦେଇଛି।
ଭାରତୀୟ ଦଳ ନିଜ ଓପନମାନଙ୍କ ଠାରୁ ବହୁତ କିଛି ଆଶା କରିଥିଲା। ମାତ୍ର ୬ ଫୁଟ ୬ ଇଞ୍ଚ ଶାହିନ ଶାହା ଆଫ୍ରିଦି ମାତ୍ର ୭ ବଲରେ ଭାରତୀୟ ଓପନିଂ ଯୋଡିକୁ ଆଉଟ୍ କରିଥିଲେ। ପ୍ରଥମେ ସେ ରୋହିତ ଶର୍ମା ଏବଂ ପରେ କେ.ଏଲ ରାହୁଲଙ୍କ ଉଇକେଟ୍ ନେଇ ଭାରତକୁ ଆରମ୍ଭରୁ ଧରାଶାୟୀ କରିଥିଲେ।
୨୦ ବର୍ଷୀୟ ଶାହିନ ଆଫ୍ରିଦି ପ୍ରଥମ ସ୍ପେଲରେ ୩ ଓଭର ବୋଲିଂରେ ୧୯ ରନ ଦେଇ ଦୁଇଟି ଉଇକେଟ ନେଇଥିଲେ। ପରେ ଶାହିନ ପୁରୁଣା ବଲ ସହିତ ଆକ୍ରମଣ ଜାରି ରଖିଥିଲେ ଏବଂ ଶେଷ ଓଭରରେ ବିରାଟ କୋହଲିଙ୍କ ଉଇକେଟ ନେଇଥିଲେ। ପ୍ରଥମ ଦୁଇଟି ଉଇକେଟ ଯିବା ପରେ ଟିମ ଇଣ୍ଡିଆ ଆଉ ପ୍ରତ୍ୟାବର୍ତ୍ତନ କରିପାରି ନ ଥିଲା। ମ୍ୟାଚ ପରେ କ୍ୟାପଟେନ ବିରାଟ କୋହଲି ନିଜେ ସ୍ବୀକାର କରିଛନ୍ତି ଯେ ଓପନର୍ସ ଶସ୍ତା ଭାବରେ ଆଉଟ୍ ହେବା ପରେ ଟିମ ଇଣ୍ଡିଆ ଟ୍ରାକକୁ ଫେରିପାରି ନ ଥିଲା। ଶାହିନ ନୂଆ ବଲ ସହିତ ବହୁତ ଭଲ ବୋଲିଂ କରିଥିଲେ। ମୁଁ ଭାବୁଛି ସେ ଠିକ ସ୍ଥାନରେ ବୋଲିଂ କରିଥିଲେ ବୋଲି ସେ କହିଛନ୍ତି।