ନୂଆଦିଲ୍ଲୀ,୨୫।୪: ଅଧିନାୟକ ରିଷଭ ପନ୍ତଙ୍କ ଅପରାଜିତ ୮୮ ରନ ଯୋଗୁ ଦିଲ୍ଲୀ କ୍ୟାପିଟାଳ୍ସ ଗୁଜରାଟ ଟାଇଟାନ୍ସ ବିପକ୍ଷରେ ଚାରି ଉଇକେଟ ପାଇଁ ୨୨୪ ରନ ସଂଗ୍ରହ କରିଛି। ଏକ ସମୟରେ ଦିଲ୍ଲୀ ୪୪ ରନ ପାଇଁ ତିନୋଟି ଉଇକେଟ ହରାଇଥିଲା, କିନ୍ତୁ ଅକ୍ଷର ପଟେଲ ଏବଂ ପନ୍ତ ଚତୁର୍ଥ ଉଇକେଟ ପାଇଁ ୬୮ ବଲରେ ୧୧୩ ରନର ଶତକ ଭାଗିଦାରୀ କରି ଦିଲ୍ଲୀକୁ ଉଦ୍ଧାର କରିଥିଲେ। ଶେଷ ୫ ଓଭରରେ ପନ୍ତ ବହୁତ ଦ୍ରୁତ ଗତିରେ ଖେଳିଥିଲେ। ସେ ଶେଷ ଓଭରରେ ଚାରି ଛକା ଓ ଚୌକା ମାରିଥିଲେ। ଶେଷ ପାଞ୍ଚ ଓଭରରେ ଦିଲ୍ଲୀ ୯୭ ରନ ସଂଗ୍ରହ କରିଥିଲା। ଅକ୍ଷର ୬୬ ରନ ସ୍କୋର କରିଥିଲେ, ଯାହାକି ଆଇପିଏଲରେ ତାଙ୍କର ସର୍ବାଧିକ ସ୍କୋର ହୋଇଥିବାବେଳେ ପନ୍ତ ତାଙ୍କ ଇନିଂସରେ ପାଞ୍ଚ ଚୌକା ଓ ୮ ଛକା ମାରିଥିଲେ।
ତାଙ୍କ ଇନିଂସ ସମୟରେ ପନ୍ତ ଏକ ଟି-୨୦ ମ୍ୟାଚ୍ରେ ଜଣେ ବୋଲରଙ୍କ ବିପକ୍ଷରେ ସର୍ବାଧିକ ରନ ସଂଗ୍ରହ କରି ଏକ ପ୍ରମୁଖ ବିଶ୍ୱ ରେକର୍ଡ ସୃଷ୍ଟି କରିଥିଲେ। ଭେଟେରାନ ଭାରତୀୟ ଦ୍ରୁତ ବୋଲର ମୋହିତ ଶର୍ମାଙ୍କଠାରୁ ୨୬ ବର୍ଷୀୟ ପନ୍ତ ୧୮ଟି ବଲରେ ୬୨ ରନ ସଂଗ୍ରହ କରିଥିଲେ, ଯେଉଁଥିରେ ସାତ ଚୌକା ଓ ତିନି ଛକା ସାମିଲ ଥିଲା। ଏହା କେବଳ ବିଶ୍ୱର ଯେକୌଣସି ଟି-୨୦ ମ୍ୟାଚରେ ଜଣେ ବୋଲରଙ୍କ ବିପକ୍ଷରେ କୌଣସି ବ୍ୟାଟ୍ସମ୍ୟାଙ୍କେ ଦ୍ୱାରା ସର୍ବାଧିକ ରନ ନୁହେଁ, ବରଂ ଗୋଟିଏ ଇନିଂସରେ ଜଣେ ବୋଲରଙ୍କ ବିରୋଧରେ ୬୦+ ରନ ସ୍କୋର କରିବାରେ ପ୍ରଥମ ରେକର୍ଡ ଅଟେ।
ଏଥି ସହିତ ବିରାଟ କୋହଲି (ଉମେଶ ଯାଦବ) ଏବଂ ହାସିମ ଆମଲା (ଲାସିଥ ମାଲିଙ୍ଗା) ଙ୍କ ପରେ ପନ୍ତ ଆଇପିଏଲ ଇତିହାସରେ ପ୍ରଥମ ଖେଳାଳି ହୋଇଥିଲେ। ଲିଗର ୧୭ସିଜନ ଇତିହାସରେ ପନ୍ତ କେବଳ ତୃତୀୟ ଖେଳାଳି ଯିଏକି ଏକ ଆଇପିଏଲ ମ୍ୟାଚରେ ଜଣେ ବୋଲରଙ୍କ ବିପକ୍ଷରେ ୫୦+ ରନ ସ୍କୋର କରିଛନ୍ତି। ତେବେ ପନ୍ତ ବିରାଟ ଏବଂ ଆମଲାଙ୍କୁ ଛାଡି ଲିଗରେ ପ୍ରଥମ ଥର ପାଇଁ ଜଣେ ବୋଲରଙ୍କ ବିପକ୍ଷରେ ୬୦ରୁ ଅଧିକ ରନ ସଂଗ୍ରହ କରିଥିଲେ। ବିରାଟ ଏବଂ ଆମଲା ଏହି ଆକଳନକୁ ଛୁଇଁ ପାରିଲେ ନାହିଁ।