ପ୍ୟାରିସ୍,୬ା୬(ପି.ଟି.): କ୍ଲେ କୋର୍ଟ ଗ୍ରାଣ୍ଡସ୍ଲାମ୍ ଫ୍ରେଞ୍ଚ ଓପନରେ ଇତିହାସ ରଚିଛନ୍ତି ବ୍ରାଜିଲଲ ବିଟ୍ରିଜ୍ ହଦାଦ ମାଇଆ। ୧୯୬୮ ମସିହା ପରେ ଦେଶର ପ୍ରଥମ ଖେଳାଳି ଭାବରେ ସେ କୌଣସି ଗ୍ରାଣ୍ଡସ୍ଲାମ ଇଭେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ୧୯୬୮ରେ ଶେଷ ଥର ପାଇଁ ମାରିଆ ବୁଏନୋ ୟୁଏସ୍ ଓପନ ସେମିରେ ପ୍ରବେଶ କରିଥିଲେ। ମହିଳା ସିଙ୍ଗଲ୍ସରେ ବିଟ୍ରିଜଙ୍କ ବ୍ୟତୀତ ଓନ୍ସ ଜାବେର ଓ କୋକୋ ଗଫ୍ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ଅନ୍ୟ ପକ୍ଷରେ ପୁରୁଷ ସିଙ୍ଗଲ୍ସ ଇଭେଣ୍ଟରେ ଗ୍ରୀସ୍ର ଷ୍ଟିଫାନୋସ୍ ସିତ୍ସିପାସ, ସ୍ପେନ୍ର କାର୍ଲୋସ ଅଲକାରାଜ ଗାର୍ଫିଆ ଓ କାସ୍ପର ରୁଡ୍ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି।
ବିଶ୍ୱ ମାନ୍ୟତାର ୧୪ ନମ୍ବର ସ୍ଥାନରେ ଥିବା ବିଟ୍ରିଜ୍ ସ୍ପେନ୍ର ସାରା ସୋରିବେସ ଟୋର୍ମୋଙ୍କୁ ୭-୬(୭-୩), ୩-୬ ଓ ୫-୭ ସେଟରେ ପରାସ୍ତ କରିଥିଲେ। ପ୍ରଥମ ସେଟ୍ଟି ଟାଇବ୍ରେକରକୁ ଯାଇଥିବା ବେଳେ ସାରା ଏହାକୁ ଜିତି ନେଇଥିଲେ। ତେବେ ପରବର୍ତ୍ତୀ ଦୁଇ ସେଟ୍କୁ ଜିତିବା ସହିତ ବିଟ୍ରିଜ୍ କ୍ୱାର୍ଟର ଫାଇନାଲରେ ପ୍ରବେଶ କରି ଇତିହାସ ରଚିଥିଲେ। କୋର୍ଟ ଫିଲିପ୍ ଚାର୍ଟରରେ ଖେଳା ଯାଉଥିବା ଅନ୍ୟ ଏକ ୪ର୍ଥ ରାଉଣ୍ଡ ମ୍ୟାଚରେ ଆମେରିକାର ବର୍ନାର୍ଡା ପେରାଙ୍କୁ ୬-୩, ୬-୧ ସେଟରେ ହରାଇଛନ୍ତି ଟ୍ୟୁନିସିଆର ଓନ୍ସ ଜାବେର। ପେରାଙ୍କ ସର୍ଭରେ୧୬ରୁ ୧୫ ପଏଣ୍ଟ ସଂଗ୍ରହ କରିଥିଲେ ଜାବେର। ତେବେ ଜାବେରଙ୍କ ସର୍ଭରୁ ମଧ୍ୟ ୮ ପଏଣ୍ଟ ସଂଗ୍ରହ କରିଥିଲେ ପେରା। ଏହି ମ୍ୟାଚ୍ ପରେ ଜାବେର କହିଥିଲେ ପେରାଙ୍କ ଆକ୍ରମଣାତ୍ମକ ଖେଳ ତାଙ୍କୁ ଚାପରେ ରଖିଥିଲେ। ତେବେ ପେରା ୩୩ଟି ଅନଫୋର୍ସଡ ଏରର ବଳରେ ଜାେqବର ଏହି ମ୍ୟାଚ୍କୁ ଜିତି ନେଇଥିଲେ। ଜଂଘ ଆଘାତରୁ ପ୍ରତ୍ୟାବର୍ତ୍ତନ କରୁଥିବା ଜାବେର ଦ୍ୱିତୀୟ ଆଫ୍ରିକୀୟ ମହିଳା ଭାବରେ ଫ୍ରେଞ୍ଚ ଓପନ କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। କ୍ୱାର୍ଟର ଫାଇନାଲରେ ସେ ବ୍ରାଜିଲର ବିଟ୍ରିଜ୍ ହଦାଦ ମାଇଆଙ୍କୁ ଭେଟିବେ। ଅନ୍ୟ ଏକ ମ୍ୟାଚରେ ଆମେରିକାର କୋକୋ ଗଫ୍ ୭-୫ ଓ ୬-୨ ସେଟ୍ରେ ଆନ୍ନା କାରୋଲିନା ସିମେଡ୍ଲୋଭାଙ୍କୁ ଭେଟିବେ।
ସେହିପରି ପୁରୁଷ ସିଙ୍ଗଲ୍ସ ଇଭେଣ୍ଟରେ ଗ୍ରୀସ୍ର ଷ୍ଟିଫାନୋସ ସିତ୍ସିପାସ ୭-୫, ୬-୩ ଓ ୬-୦ ସେଟରେ ଅଷ୍ଟ୍ରିଆର ସେବାଷ୍ଟିଆନ୍ ଅଫ୍ନରଙ୍କୁ ପରାସ୍ତ କରି କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ବିଶ୍ୱ ମାନ୍ୟତାର ୫ନମ୍ବର ସ୍ଥାନରେ ଥିବା ସିତ୍ସିପାସ ପରବର୍ତ୍ତୀ ମ୍ୟାଚରେ ବିଶ୍ୱ ମାନ୍ୟତାର ଏକ ନମ୍ବର ସ୍ଥାନରେ ଥିବା କାର୍ଲୋସ ଅଲକାରାଜ ଗାର୍ଫିଆଙ୍କୁ ଭେଟିବେ। ରବିବାର ବିଳମ୍ବିତ ରାତିରେ ଖେଳା ଯାଇଥିବା ୪ର୍ଥ ରାଉଣ୍ଡ ମ୍ୟାଚରେ ଅଲକାରାଜ ବିଶ୍ୱ ମାନ୍ୟତାର ୧୭ ନମ୍ବର ଖେଳାଳି ଲରେଞ୍ଜୋ ମୁସେଟିଙ୍କୁ ୬-୩, ୬-୨ ଓ ୬-୨ ସେଟ୍ରେ ପରାସ୍ତ କରିଥିଲେ। ସେହିପରି ସୋମବାର ନରଓ୍ବେର କାସ୍ପର ରୁଡ୍ ଚିଲିର ନିକୋଲାସ ଜାରିଙ୍କୁ ୭-୬(୭-୩) , ୭-୫ ଓ ୭-୫ ସେଟରେ ପରାସ୍ତ କରିଛନ୍ତି। ପ୍ରଥମ ସେଟ୍ ଟାଇବ୍ରେକରରେ ଫଇସଲା ହୋଇଥିଲା।