ଅନୁଗୋଳ ଅଫିସ୍, ୯।୮ : ଏଡ୍ସ ଓ ଏଚ୍ଆଇଭି ସଂକ୍ରାନ୍ତୀୟ କାର୍ଯ୍ୟକ୍ରମକୁ ସଫଳତାର ସହ କାର୍ଯ୍ୟକାରୀ କରିବା ଉଦ୍ଦେଶ୍ୟରେ ଜିଲାପାଳ ମନୋଜ କୁମାର ମହାନ୍ତିଙ୍କ ଅଧ୍ୟକ୍ଷତାରେ ଜିଲା ଏଡ୍ସ ନିୟନ୍ତ୍ରଣ କମିଟିର ଏକ ବୈଠକ ଅନୁଷ୍ଠିତ ହୋଇଯାଇଛି। ଚଳିତ ମାସରେ ନାଲ୍କୋଠାରେ ହେବାକୁ ଥିବା ଏଚ୍ଆଇଭି ସ୍କ୍ରିନିଂ କାର୍ଯ୍ୟକ୍ରମକୁ ସୂଚାରୁରୂପେ ପାଳନ କରିବାକୁ ଆଲୋଚନା କରାଯାଇଥିଲା। ଏଥିପାଇଁ ନାଲ୍କୋ ଜିଲା ଏଡ୍ସ ପ୍ରତିରୋଧ କକ୍ଷରେ ଏକ କମ୍ପ୍ୟୁଟର ଲଗାଯିବ। ଆସନ୍ତା ୧୨ରୁ ୨୨ ତାରିଖ ପର୍ଯ୍ୟନ୍ତ ଏକ ସଚେତନତା ରଥ ବିଭିନ୍ନ ବ୍ଲକ ପରିକ୍ରମା କରିବ। ଏଚ୍ଆଇଭି ଆକ୍ରାନ୍ତଙ୍କ ଭତ୍ତା ଟଙ୍କା ସିଧାସଳଖ ବ୍ୟାଙ୍କ ଆକାଉଣ୍ଟରେ ଜମା ହେବ। ଦି ମେଡିକ୍ସ ପକ୍ଷରୁ ତୃତୀୟ ଲିଙ୍ଗୀଙ୍କ ଆଧାରକାର୍ଡ ପ୍ରସ୍ତୁତି ପାଇଁ ସହାୟତା କରାଯିବ। କୋଭିଡ୍ ସମୟରେ ଏଡ୍ସ ଆକ୍ରାନ୍ତ ପାଇଁ ଆସିଥିବା ରାଶନ ସାମଗ୍ରୀକୁ ତୁରନ୍ତ ବଣ୍ଟନ ପାଇଁ ଜିଲାପାଳ ପରାମର୍ଶ ଦେଇଛନ୍ତି। ବୈଠକରେ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ଅଭୟ ଦାଶ, ଜିଲା ଏଡ୍ସ ନିୟନ୍ତ୍ରଣ ଅଧିକାରୀ ଡ. ବିଶ୍ୱବିହାରୀ ମହାନ୍ତି, ଡିପିଏମ୍ ଡା. ପ୍ରମିଳା ହୋତା, ଡା. ଶାଶ୍ୱତ ସାଗର ମିଶ୍ର ପ୍ରମୁଖ ଉପସ୍ଥିତ ଥିଲେ। ଜିଲାରେ ୪ ଲକ୍ଷ ୯୭ ହଜାର ୮୦୮ ଜଣଙ୍କ କାଉନ୍ସେଲିଂ ଏବଂ ୪ ଲକ୍ଷ ୪୧ ହଜାର ୮୦ ଜଣଙ୍କ ଏଚ୍ଆଇଭି ପରୀକ୍ଷା ହୋଇଛି। ସେମାନଙ୍କ ମଧ୍ୟରୁ ୨,୦୦୪ ଜଣ ଆକ୍ରାନ୍ତ ବୋଲି ସୂଚନା ଦିଆଯାଇଛି। ବୈଠକରେ ସ୍ବାସ୍ଥ୍ୟ ବିଭାଗର ଅଧିକାରୀ, କର୍ମଚାରୀ, ସାମାଜିକ କର୍ମୀ, ଶିଳ୍ପ ସଂସ୍ଥାର କର୍ମକର୍ତ୍ତା ଯୋଗ ଦେଇଥିଲେ।