ନୂଆଦିଲ୍ଲୀ,୬।୫(ପି.ଟି.): କୋଭିଡ୍-୧୯ ଟେଷ୍ଟରେ ପଜିଟିଭ ବୋଲି ଜଣାପଡିବା ପରେ ପୂର୍ବତନ ଭାରତୀୟ ହକି କୋଚ୍ ଏମ୍.କେ. କୌଶିକ ହସ୍ପିଟାଲରେ ଭର୍ତ୍ତି ହୋଇଛନ୍ତି। ୧୯୮୦ ମସ୍କୋ ଅଲିମ୍ପିକ୍ସରେ ଭାରତ ସ୍ବର୍ଣ୍ଣ ପଦକ ହାସଲ କରିଥିଲା ଓ କୌଶିକ ଏହି ଦଳର ସଦସ୍ୟ ଥିଲେ। ୬୬ ବର୍ଷୀୟ କୌଶିକଙ୍କ ଅକ୍ସିଜେନ ସାଚୁରେଶନ ଲେଭଲ ଅସ୍ଥିର ରହୁଛି ବୋଲି ତାଙ୍କ ପରିବାର ତରଫରୁ କୁହାଯାଇଛି। ଏକ ସିଟି ନର୍ସିଂ ହୋମ୍ରେ ତାଙ୍କୁ ଭର୍ତ୍ତି କରାଯାଇଛି ବୋଲି ତାଙ୍କ ପୁଅ ଏହସାନ କହିଛନ୍ତି। ଏପ୍ରିଲ ୧୭ ତାରିଖରେ ତାଙ୍କଠାରେ କରୋନା ଲକ୍ଷଣ ଦେଖିବାକୁ ମିଳିଥିଲା। ଟେଷ୍ଟରେ ତାଙ୍କ ରିପୋର୍ଟ ନେଗେଟିଭ ଆସିଥିଲା। ଏହାପରେ ତାଙ୍କର ସିଟି ସ୍କାନ କରାଯାଇଥିଲା। ଏଥିରେ କୋଭିଡ୍ କାରଣରୁ ସେ ନିମୋନିଆରେ ପୀଡିତ ବୋଲି ଜାଣିବାକୁ ମିଳିଥିଲା। ତାଙ୍କ ସ୍ବାସ୍ଥ୍ୟାବସ୍ଥା ଅସ୍ଥିର ରହୁଛି। ତାଙ୍କର ଅକ୍ସିଜେନ ସ୍ତର ତଳକୁ ଖସୁଛି ବୋଲି ଏହସାନ କହିଛନ୍ତି। କରୋନାର ଶିକାର ହୋଇ କୌଶିକଙ୍କ ସ୍ତ୍ରୀ ମଧ୍ୟ ସେହି ହସ୍ପିଟାଲ୍ରେ ଚିକିତ୍ସିତ ହେଉଛନ୍ତି ଓ ସେ ଆରୋଗ୍ୟ ଲାଭ କରିଛନ୍ତି। ୨-୩ ଦିନ ମଧ୍ୟରେ ତାଙ୍କୁ ରିଲିଜ କରାଯିବ ବୋଲି ଏହସାନ କହିଛନ୍ତି।
କୌଶିକ ଭାରତୀୟ ସିନିୟର ପୁରୁଷ ଓ ମହିଳା ଦଳର କୋଚ୍ ରହିଥିଲେ। ତାଙ୍କ ତତ୍ତ୍ୱାବଧାନରେ ଭାରତୀୟ ପୁରୁଷ ଦଳ ୧୯୮୮ ଏସିଆନ ଗେମ୍ସରେ ଚାମ୍ପିୟନ ହୋଇଥିଲା। ସେହିପରି ମହିଳା ଦଳ ୨୦୦୬ ଦୋହା ଏସିଆନ ଗେମ୍ସରେ ବ୍ରୋଞ୍ଜ୍ ପଦକ ଜିତିଥିଲା। ୧୯୮୮ରେ ତାଙ୍କୁ ଅର୍ଜୁନ ପୁରସ୍କାର ପ୍ରଦାନ କରାଯାଇଥିଲା। ୨୦୦୨ରେ ଦ୍ରୋଣାଚାର୍ଯ୍ୟ ଉପାଧିରେ ତାଙ୍କୁ ଭୂଷିତ କରାଯାଇଥିଲା।
