ନୂଆଦିଲ୍ଲୀ, ୧୪।୧୧ (ପି.ଟି.): ଡିସେମ୍ବର ୫ରୁ ୧୬ ପର୍ଯ୍ୟନ୍ତ କୁଆଲାଲମ୍ପୁରଠାରେ ଖେଳାଯିବାକୁ ଥିବା ଏଫ୍ଆଇଏଚ୍ ଜୁନିୟର ପୁରୁଷ ହକି ବିଶ୍ୱକପ୍ରେ ପ୍ରତିଭାସମ୍ପନ୍ନ ଫରଓ୍ବାର୍ଡ ଉତ୍ତମ ସିଂ ଭାରତୀୟ ଦଳର ନେତୃତ୍ୱ ନେବେ। ଘୋଷଣା କରାଯାଇଥିବା ଦଳରେ ଓଡ଼ିଶାର ୪ଜଣ ଖେଳାଳି ସ୍ଥାନ ପାଇଛନ୍ତି। ସେମାନେ ହେଲେ ଅମନଦୀପ ଲାକ୍ରା, ସୁନୀଲ ଜୋଜୋ, ସୁଦୀପ ଚିର୍ମାକୋ, ସୁନୀତ ଲାକ୍ରା। ବର୍ତ୍ତମାନର ଏସିଆନ ଚାମ୍ପିୟନ୍ସ ଭାରତ ପୁଲ୍ ‘ସି’ରେ କାନାଡା, ଦକ୍ଷିଣ କୋରିଆ ଓ ସ୍ପେନ୍ ସହ ସ୍ଥାନ ପାଇଛି।
ଦଳ ଡିସେମ୍ବର ୫ରେ କୋରିଆ ବିପକ୍ଷରେ ଖେଳି ଏହାର ଅଭିଯାନ ଆରମ୍ଭ କରିବ। ଭାରତ ଏହାର ପରବର୍ତ୍ତୀ ମ୍ୟାଚ ଡିସେମ୍ବର ୭ରେ ସ୍ପେନ୍ ଏବଂ ଡିସେମ୍ବର ୯ରେ କାନାଡା ବିପକ୍ଷରେ ଖେଳିବ। ଟୁର୍ନାମେଣ୍ଟର ଗତ ସଂସ୍କରଣରେ ଭାରତ ଚତୁର୍ଥ ସ୍ଥାନ ଅଧିକାର କରିଥିଲା। ଏଥର କିନ୍ତୁ ଦଳ ଆହୁରି ଆଗକୁ ଯିବ ବୋଲି କୋଚ୍ ସି.ଆର୍. କୁମାର ପ୍ରକାଶ କରିଛନ୍ତି। ଟୁର୍ନାମେଣ୍ଟର ପୁଲ୍ ‘ଏ’ରେ ଗତଥରର ଚାମ୍ପିୟନ ଆର୍ଜେଣ୍ଟିନା, ଅଷ୍ଟ୍ରେଲିଆ, ଚିଲି ଓ ମାଲେସିଆ ସ୍ଥାନ ପାଇଥିବା ବେଳେ ପୁଲ ‘ବି’ରେ ଇଜିପ୍ଟ, ଫ୍ରାନ୍ସ, ଜର୍ମାନୀ ଓ ଦକ୍ଷିଣ ଆଫ୍ରିକା ରହିଛନ୍ତି। ସେହିପରି ପଲ୍ ‘ଡି’ରେ ବେଲଜିୟମ, ନେଦରଲାଣ୍ଡ୍ସ, ନ୍ୟୁଜିଲାଣ୍ଡ ଓ ପାକିସ୍ତାନ କ୍ୱାର୍ଟରଫାଇନାଲରେ ସ୍ଥାନ ପାଇଁ ଲଢେଇ କରିବେ।
ଭାରତୀୟ ଦଳ
ଗୋଲକିପର: ମୋହିତ ଏଚ୍ଏସ୍, ରଣବିଜୟ ସିଂ ଯାଦବ। ଡିଫେଣ୍ଡର: ଶର୍ଦ୍ଦାନନ୍ଦ ତିଓ୍ବାରୀ, ଅମନଦୀପ ଲାକ୍ରା, ରୋହିତ, ସୁନୀଲ ଜୋଜୋ ଓ ଅମିର ଅଲି। ମିଡ୍ଫିଲ୍ଡର: ବିଷ୍ଣୁକାନ୍ତ ସିଂ, ପୁଭାନ୍ନା ସିବି, ରାଜିନ୍ଦର ସିଂ, ଅମନଦୀପ ଲାକ୍ରା, ଆଦିତ୍ୟ ସିଂ। ଫରଓ୍ବାର୍ଡ: ଉତ୍ତମ ସିଂ(ଅଧିନାୟକ), ଆଦିତ୍ୟ ଲାଲାଗେ, ଅରାଇଜିତ୍ ସିଂ ହୁଣ୍ଡାଲ (ଉପଅଧିନାୟକ), ସୌରଭ ଆନନ୍ଦ କୁସ୍ବାହା, ସୁଦୀପ ଚିରମାକୋ, ବବି ସିଂ ଧାମି। ରିଜର୍ଭ ଖେଳାଳି: ସୁଖବିନ୍ଦର, ସୁନୀତ ଲାକ୍ରା।
