ନୂଆଦିଲ୍ଲୀ,୨୩ା୧୨: ହକି ଇଣ୍ଡିଆ ପକ୍ଷରୁ ଶୁକ୍ରବାର ହକି ବିଶ୍ୱକପ ପାଇଁ ୧୮ ଜଣିଆ ଦଳ ଘୋଷଣା କରାଯାଇଛି। ଜାନୁୟାରୀ ୧୩ରୁ ୨୯ ଯାଏ ଭୁବନେଶ୍ୱର-ରାଉରକେଲାରେ ହେବାକୁ ଥିବା ଏହି ମେଗା ଟୁର୍ନାମେଣ୍ଟ ପାଇଁ ହରମନ୍ପ୍ରୀତ୍ ସିଂଙ୍କୁ ଅଧିନାୟକ ଭାବେ ଘୋଷଣା କରାଯାଇଛି। ଓଡ଼ିଆ ପୁଅ ଅମିତ ରୋହିଦାସଙ୍କୁ ଉପ ଅଧିନାୟକ ଭାବେ ଘୋଷଣା କରାଯାଇଛି। ଏହା ସହିତ ନୀଲମ ସଞ୍ଜୀପ ଖେସ୍ ଅନ୍ୟତମ ଖେଳାଳି ଭାବେ ୧୮ ଜଣିଆ ଦଳରେ ସ୍ଥାନ ପାଇଛନ୍ତି।
ଭାରତ ଗ୍ରୁପ୍ ଡି’ରେ ଇଂଲଣ୍ଡ, ସ୍ପେନ୍ ଓ ଓ୍ବେଲ୍ସ ସହିତ ସ୍ଥାନ ପାଇଥିବା ବେଳେ ଜାନୁୟାରୀ ୧୩ ତାରିଖରେ ନବନିର୍ମିତ ବିର୍ସା ମୁଣ୍ଡା ହକି ଷ୍ଟାଡିୟମରୁ ନିଜର କ୍ୟାମ୍ପେନ୍ ଆରମ୍ଭ କରିବ। ଟିମ୍ରେ ଉଭୟ ଅଭିଜ୍ଞ ଏବଂ ଯୁବ ଖେଳାଳି ସ୍ଥାନ ପାଇଥିବା ବେଳେ ଦଳକୁ ପୋଡିୟମ ଫିନିଶରେ ସାହାଯ୍ୟ କରିବ ବୋଲି ହକି ଇଣ୍ଡିଆ ପକ୍ଷରୁ କୁହାଯାଇଛି। କ୍ରିଷନ୍ ବାହାଦୂର ପାଠକ ଓ ପି. ଆର. ଶ୍ରୀଜେସଙ୍କୁ ଗୋଲ ରକ୍ଷକ ଭାବେ ଦଳରେ ସାମିଲ କରାଯାଇଛି। ଶ୍ରୀଜେସଙ୍କର ଏହା ୪ର୍ଥ ବିଶ୍ୱକପ ହୋଇଥିବା ବେଳେ ଘରୋଇ ମାଟିରେ ତୃତୀୟ ବିଶ୍ୱକପ୍। ହରମନ୍ପ୍ରୀତ୍ ସିଂ, ଅମିତ ରୋହିଦାସ, ସୁରେନ୍ଦର କୁମାର, ବରୁଣ କୁମାର, ଜର୍ମନପ୍ରୀତ ସିଂ ଓ ନୀଲମ୍ ସଞ୍ଜୀପ ଖେସ୍ଙ୍କୁ ଡିଫେଣ୍ଡର ଦାୟିତ୍ୱ ପ୍ରଦାନ କରାଯାଇଛି। ବିବେକ ସାଗର ପ୍ରସାଦ ଦଳକୁ ଫେରିଥିବା ବେଳେ ମନପ୍ରୀତ ସିଂ, ହାର୍ଦ୍ଦିକ୍ ସିଂ, ନୀଳକଣ୍ଠ ଶର୍ମା, ଶମସେର ସିଂ ଓ ଆକାଶଦୀପ ସିଂଙ୍କୁ ମଧ୍ୟ ମିଡଫିଲ୍ଡର ଭାବେ ଦଳରେ ରଖାଯାଇଛି। ମନଦୀପ ସିଂ, ଲଳିତ କୁମାର ଉପାଧ୍ୟାୟ, ଅଭିଷେକ ଓ ସୁଖଜିତ ସିଂଙ୍କୁ ଫରଓ୍ବାର୍ଡ ଲାଇନ ଅପରେ ରଖାଯାଇଥିବା ବେଳେ ରାଜକୁମାର ପାଲ ଓ ଯୁଗରାଜ ସିଂଙ୍କୁ ବଦଳ ଖେଳାଳି ଭାବରେ ସାମିଲ କରାଯାଇଛି।
