ନୂଆଦିଲ୍ଲୀ, ୮।୭(ପି.ଟି.)- ଦୁଇଥର ଅଲିମ୍ପିକ୍ ସ୍ବର୍ଣ୍ଣ ପଦକ ବିଜେତା ଭାରତୀୟ ଦଳର ସଦସ୍ୟ ହକି କିମ୍ବଦନ୍ତୀ କେଶବ ଦତ୍ତଙ୍କର ବୁଧବାର ପରଲୋକ ଘଟିଛି। ବାର୍ଦ୍ଧକ୍ୟଜନିତ କାରଣରୁ ମୃତ୍ୟୁ ବରଣ କରିଥିବା କେଶବଙ୍କୁ ୯୫ ବର୍ଷ ହୋଇଥିଲା। ତାଙ୍କ ସ୍ତ୍ରୀ, ୨ ପୁଅ ଏବଂ ଝିଅ ବିଦେଶରେ ରହୁଛନ୍ତି। କୋଲକାତାସ୍ଥିତ ସନ୍ତୋଷପୁରରେ ଏକାକୀ ରହୁଥିବା କେଶବଙ୍କର ନିଜ ବାସଭବନରେ ଅପରାହ୍ନ ୧୨ଟା ୩୦ରେ ପରଲୋକ ଘଟିଥିଲା। ”ଆମ ପରିବାର ପାଇଁ ଅତ୍ୟନ୍ତ ଦୁଃଖ ସମୟ। ବର୍ଷରେ ମୁଁ ୩-୪ ଥର ତାଙ୍କ ନିକଟକୁ ଯାଇଥାଏ, ମାତ୍ର କରୋନା ମହାମାରୀ ପାଇଁ ୨୦୧୯ ପରଠାରୁ ତାଙ୍କୁ ଆଉ ଦେଖି ପାରିନାହିଁ“ ବୋଲି ସମ୍ପ୍ରତି କୋପେନହାଗେନରେ ରହୁଥିବା ତାଙ୍କ ଝିଅ ଅଞ୍ଜଳି କେଶବ ପୌଲସେନ ପ୍ରକାଶ କରିଛନ୍ତି। ୧୯୨୫ ଡିସେମ୍ବର ୨୯ରେ ଜନ୍ମଗ୍ରହଣ କରିଥିବା କେଶବ ଭାରତୀୟ ହକିର ସୁବର୍ଣ୍ଣ ଯୁଗର ଅଂଶୀଦାର ଥିଲେ। ସେ ଜଣେ ଦକ୍ଷ ହାଫ୍-ବ୍ୟାକ୍ଭାବେ ପରିଚିତ ଥିଲେ। ଲଣ୍ଡନର ଓ୍ବେମ୍ବଲି ଷ୍ଟାଡିୟମରେ ଅନୁଷ୍ଠିତ ୧୯୪୮ ଅଲିମ୍ପିକ୍ସର ଫାଇନାଲରେ ଘରୋଇ ବ୍ରିଟେନ ଦଳକୁ ୪-୦ ଗୋଲରେ ହରାଇ ଭାରତୀୟ ଦଳ ସ୍ବାଧୀନତା ପରେ ପ୍ରଥମ ସ୍ବର୍ଣ୍ଣ ପଦକ ଜିତିଥିଲା। ସେ ଏହି ଦଳର ସଦସ୍ୟ ଥିଲେ। ୧୯୪୮ ପୂର୍ବରୁ ସେ ହକି କିମ୍ବଦନ୍ତୀ ମେଜର ଧ୍ୟାନଚାନ୍ଦଙ୍କ ନେତୃତ୍ୱରେ ୧୯୪୭ରେ ଇଷ୍ଟ ଆଫ୍ରିକା ଯାତ୍ରା କରିଥିଲେ। ୧୯୫୨ ହେଲସିଙ୍କି ଗେମ୍ସର ଫାଇନାଲରେ ନେଦରଲାଣ୍ଡ୍ସକୁ ୬-୧ ଗୋଲରେ ହରାଇ କ୍ରମାଗତ ୫ଥର ସ୍ବର୍ଣ୍ଣ ପଦକ ଜିତିଥିବା ଭାରତୀୟ ଦଳ ପକ୍ଷରୁ ସେ ପ୍ରତିନିଧିତ୍ୱ କରିଥିଲେ।
୧୯୪୮ ଓ ୧୯୫୨ ଅଲିମ୍ପିକ୍ସ ଖେଳିଥିବା ଭାରତୀୟ ଦଳର ସଦସ୍ୟଭାବେ କେଶବ ଏକମାତ୍ର ଜୀବିତ ଥିଲେ। ତାଙ୍କ ମୃତ୍ୟୁରେ ଏକ ଯୁଗର ଅବସାନ ଘଟିଲା ବୋଲି ହକି ଇଣ୍ଡିଆ ସଭାପତି ଜ୍ଞାନେନ୍ଦ୍ରୋ ନିଙ୍ଗୋମବାମ୍ ପ୍ରକାଶ କରିଛନ୍ତି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ଶୋକ ପ୍ରକାଶ କରିଛନ୍ତି। ”ବିଶ୍ୱ ହକି ଆଜି ଜଣେ ପ୍ରକୃତ କିମ୍ବଦନ୍ତୀଙ୍କୁ ହରାଇଲା। ସେ ଭାରତ ଏବଂ ବେଙ୍ଗଲର ଜଣେ ଚାମ୍ପିୟନ ଖେଳାଳି ଥିଲେ। ତାଙ୍କ ପରଲୋକରେ ମୁଁ ବହୁତ ଦୁଃଖିତ“ ବୋଲି ମମତା କହିଛନ୍ତି। ଭାରତୀୟ ଦଳର ଜଣେ ନିର୍ଭରଯୋଗ୍ୟ ସଦସ୍ୟ ବ୍ୟତୀତ କେଶବ ୧୯୫୧-୫୩ ଏବଂ ୧୯୫୭-୫୮ରେ ମୋହନ ବାଗାନ ହକି ଦଳର ଅଧିନାୟକ ଥିଲେ। ମୋହନ ବାଗାନ ଖେଳାଳିଭାବେ ସେ ୧୦ ବର୍ଷ ମଧ୍ୟରେ ୬ ଥର ହକି ଲିଗ୍ ଏବଂ ୩ ଥର ବେଟନ କପ୍ ଟାଇଟଲ ଜିତିଥିଲେ। ୨୦୧୯ରେ ତାଙ୍କୁ ମୋହନବାଗାନ ରନତ୍ ପୁରସ୍କାରରେ ସମ୍ମାନିତ କରାଯାଇଥିଲା। ଜଣେ ଅଣ ଫୁଟବଲ ଖେଳାଳିଭାବେ ସେ ଏହି ସମ୍ମାନ ପାଇବାରେ ପ୍ରଥମ। ଭାରତୀୟ କ୍ରୀଡ଼ା ପ୍ରାଧିକରଣ (ସାଇ) ପକ୍ଷରୁ ମଧ୍ୟ କେଶବଙ୍କ ପରଲୋକରେ ଶୋକ ପ୍ରକାଶ କରାଯାଇଛି। ଟେନିସ ତାରକା ଲିଆଣ୍ଡର ପେସ୍, ତାଙ୍କ ବାପା ତଥା ପୂର୍ବତନ ହକି ଅଲିମ୍ପିଆନ ଭେସ୍ ପେସ୍, କ୍ରୀଡ଼ାମନ୍ତ୍ରୀ କିରେନ ରିଜିଜୁ ପ୍ରମୁଖ କେଶବଙ୍କ ପରଲୋକରେ ଶୋକ ପ୍ରକାଶ କରିଛନ୍ତି।