ଢେଙ୍କାନାଳ ଅଫିସ, ୧୧ା୩ ଢେଙ୍କାନାଳ ଷ୍ଟାଡିୟମ୍ରେ ଅନୁଷ୍ଠିତ ଦ୍ୱିତୀୟ ନାଭାଲ ଟାଟା ହକି ପ୍ରତିଯୋଗିତାରେ ଅଂଶଗ୍ରହଣ କରିଥିବା ୭ ମହିଳା ହକି ଖେଳାଳି ଗ୍ୟାସ୍ଟ୍ରାଇଟ୍ର ଶିକାର ହୋଇ ବୁଧବାର ଅସୁସ୍ଥ ହୋଇପଡ଼ିଥିଲେ। ଚିକିତ୍ସା ପରେ ଗୁରୁବାର ସମସ୍ତେ ସୁସ୍ଥ ହୋଇଛନ୍ତି। ତେବେ ଜଣଙ୍କ ଚକ୍ଷୁ ସମସ୍ୟା ଥିବାରୁ ତାଙ୍କୁ କଟକ ଯିବା ଲାଗି ଡାକ୍ତର ପରାମର୍ଶ ଦେଇଛନ୍ତି। କ୍ରୀଡ଼ାବିତ୍ଙ୍କୁ ସୁଷମ ଖାଦ୍ୟ କିମ୍ବା ପାନୀୟ ଦିଆଯାଉ ନ ଥିବାରୁ ସେମାନଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଥିବା କେତେଜଣ ଖେଳାଳି ଅଭିଯୋଗ କରିଛନ୍ତି। ସୂଚନାଯୋଗ୍ୟ, ବୁଧବାର ରାତି ୧୧ଟାରେ ମହିଳା ବର୍ଗ ପ୍ରତିଯୋଗିତାରେ ଭାଗ ନେବାକୁ ଆସିଥିବା ୭ ହକି ଖେଳାଳି ହଠାତ୍ ଅସୁସ୍ଥ ହୋଇ ଜିଲା ଚିକିତ୍ସାଳୟରେ ଭର୍ତ୍ତି ହୋଇଥିଲେ। ସେମାନେ ପେଟରେ ଯନ୍ତ୍ରଣା ଅନୁଭବ କରୁଥିବାବେଳେ ସ୍ବାସ୍ଥ୍ୟକେନ୍ଦ୍ରରେ ଆୟୋଜକଙ୍କ ପକ୍ଷରୁ କୌଣସି ବରିଷ୍ଠ ଅଧିକାରୀଙ୍କ ଦେଖା ମିଳି ନ ଥିଲା। ସ୍ଥାନୀୟ ଗଣମାଧ୍ୟମ ପ୍ରତିନିଧିଙ୍କ ହସ୍ତକ୍ଷେପ ପରେ କ୍ରୀଡ଼ାବିତ୍ଙ୍କ ଚିକିତ୍ସା ଆରମ୍ଭ ହୋଇଥିଲା।
ଏ ସଂକ୍ରାନ୍ତରେ ଜିଲା ମୁଖ୍ୟ ଚିକିତ୍ସାକେନ୍ଦ୍ରର ଅତିରିକ୍ତ ଚିକିତ୍ସାଧିକାରୀ ଡା. ଜୟକୃଷ୍ଣ ନାୟକ କୁହନ୍ତି, ହକି ଖେଳାଳି ଗ୍ୟାସ୍ଟ୍ରାଇଟ୍ର ଶିକାର ହୋଇଥିଲେ। ଚିକିତ୍ସା ପରେ ଗୁରୁବାର ୬ ଜଣଙ୍କୁ ଛଡ଼ାଯାଇଛି। ଜଣଙ୍କର ଆଖି ଖରାପ ଥିବାରୁ ପରୀକ୍ଷା ଏବଂ ଅଧିକ ଚିକିତ୍ସା ପାଇ କଟକ ଯିବାକୁ ପରାମର୍ଶ ଦିଆଯାଇଛି। ଅନ୍ୟପଟେ ଅବ୍ୟବ୍ୟସ୍ଥା ଅଭିଯୋଗକୁ ଜିଲା କ୍ରୀଡ଼ା ଅଧିକାରୀ ପ୍ରଦୀପ୍ତ କୁମାର ମହାନ୍ତି ଖଣ୍ଡନ କରିଛନ୍ତି। ସେ କହିଛନ୍ତି, ଗୋଟିଏ ସ୍ଥାନରେ ପ୍ରସ୍ତୁତ ହେଉଥିବା ଖାଦ୍ୟ ସବୁ ଖେଳାଳି ଖାଉଛନ୍ତି। କେବଳ ୭ଜଣଙ୍କୁ ଛାଡ଼ି ଅନ୍ୟ କେହି ଅସୁସ୍ଥ ହୋଇନାହାନ୍ତି। ଠିକ୍ରେ ପାଣି ନ ପିଇବା ଏବଂ ଗ୍ରୀଷ୍ମପ୍ରବାହ କାରଣରୁ ଏଭଳି ସମସ୍ୟା ଉପୁଜିଥାଇପାରେ ବୋଲି ଅନୁମାନ କରାଯାଉଛି।