ଚଣ୍ଡିଗଡ଼, ୨୬ା୫ (ପି.ଟି.)-ମୋହାଲିସ୍ଥିତ ଅନ୍ତର୍ଜାତୀୟ ହକି ଷ୍ଟାଡିୟମ ବିଧିବଦ୍ଧ ଭାବେ କିମ୍ବଦନ୍ତୀ ବଲ୍ବୀର ସିଂ ସିନିୟରଙ୍କ ନାମରେ ନାମିତ କରାଯାଇଛି। ମଙ୍ଗଳବାର ବଲ୍ବୀରଙ୍କ ପ୍ରଥମ ମୃତ୍ୟୁ ବାର୍ଷିକୀ ଅବସରରେ ଏହି ନାମକରଣ କରାଯାଇଛି। ୩ଥର ଅଲିମ୍ପିକ ସ୍ବର୍ଣ୍ଣ ବିଜେତାଙ୍କର ୯୬ ବର୍ଷ ବୟସରେ ଗତବର୍ଷ ମେ’ ୨୫ରେ ଦେହାନ୍ତ ହୋଇଥିଲା। ଆଧୁନିକ ଅଲିମ୍ପିକ ଇତିହାସରେ ୨୦୧୨ ଲଣ୍ଡନ ଗେମ୍ସ ବେଳେ ୧୬ଜଣ ଅନ୍ତର୍ଜାତୀୟ ଅଲିମ୍ପିକ କମିଟିକୁ ମନୋନୀତ ହୋଇଥିଲେ। ସେମାନଙ୍କ ମଧ୍ୟରେ ଏହି ଆଇକନିକ ସେଣ୍ଟର ଫରଓ୍ବାର୍ଡ ଅନ୍ୟତମ ଥିଲେ। କିମ୍ବଦନ୍ତୀ କ୍ରୀଡ଼ାବିତ୍ଙ୍କ ପ୍ରଥମ ମୃତ୍ୟୁ ବାର୍ଷିକୀ ଅବସରରେ ହକି ଷ୍ଟାଡିୟମରେ ଏକ ଆନୁଷ୍ଠାନିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ପଞ୍ଜାବ କ୍ରୀଡ଼ା ମନ୍ତ୍ରୀ ରାଣା ଗୁର୍ମିତ ସିଂ ସୋଧି ଏଥିରେ ଉପସ୍ଥିତ ଥିଲେ। ମୋହାଲି ଅନ୍ତର୍ଜାତୀୟ ଷ୍ଟାଡିୟମକୁ ପଦ୍ମଶ୍ରୀ ବଲ୍ବୀର ସିଂ ସିନିୟରଙ୍କ ଉଦ୍ଦେଶ୍ୟରେ ଉତ୍ସର୍ଗ କରାଗଲା ବୋଲି ସେ କହିଥିଲେ। ଷ୍ଟାଡିୟମ ଏଣିକି ‘ଅଲିମ୍ପିଆନ ବଲ୍ବୀର ସିଂ ସିନିୟର ଅନ୍ତର୍ଜାତୀୟ ହକି ଷ୍ଟାଡିୟମ’ ରୂପେ ପରିଚିତ ହେବ ବୋଲି ସେ କହିଥିଲେ।
