ନୂଆଦିଲ୍ଲୀ,୧୧।୧: ହକି ବିଶ୍ୱକପ୍ ୨୦୨୩ ଆରମ୍ଭ ଜାନୁୟାରୀ ୧୩ ଶୁକ୍ରବାରଠାରୁ ହେବାକୁ ଯାଉଛି। ଚଳିତ ବର୍ଷ ଏହି ଟୁର୍ନାମେଣ୍ଟ ଭାରତରେ ଖେଳାଯାଉଛି। ଏଣୁ ଭାରତୀୟ ଟିମ୍ ପାଖରେ ସ୍ବଦେଶରେ ଦ୍ୱିତୀୟ ଟାଇଟଲ ଜିତିବାର ସୁବର୍ଣ୍ଣ ଅବସର ରହିବ। ଏହାପୂର୍ବରୁ ଭାରତ ୧୯୭୫ରେ ଏହି ଟାଇଟଲ ଜିତିଥିଲା।
ଚଳିତ ଥର ଭାରତୀୟ ଅଧିନାୟକ ହରମନପ୍ରିତ ସିଂହଙ୍କ ସମେତ ୫ ଏଭଳି ତାରକା ଖେଳାଳି ଅଛନ୍ତି, ଯେଉଁମାନେ ଦଳକୁ ଚାମ୍ପିୟନ କରିବାର କ୍ଷମତା ରଖିଛନ୍ତି। ଏହି ଖେଳାଳିଙ୍କ ମଧ୍ୟରେ ହରମନପ୍ରିତଙ୍କ ବ୍ୟତିତ ଆକାଶଦୀପ ସିଂହ, ମନପ୍ରିତ ସିଂହ, ମନଦୀପ ସିଂହ, ପିଆର୍ ଶ୍ରୀଜେଶ ଅଛନ୍ତି। ଆସନ୍ତୁ ଜାଣିବା ସେମାନଙ୍କ ବିଷୟରେ:-
ଭାରତୀୟ ଷ୍ଟାର ଡିଫେଣ୍ଡର ହରମନପ୍ରିତ ୨୦୧୮ରେ ମଧ୍ୟ ବିଶ୍ୱକପ୍ ଖେଳିଥିଲେ। ହେଲେ ଏଥର ତାଙ୍କ କାନ୍ଧରେ ଅଧିନାୟକତ୍ୱର ଦାୟିତ୍ୱ ରହିବ। ହକି କ୍ୟାରିୟରରେ ସେ ଏକ ଅଲିମ୍ପିକ କାଂସ୍ୟ ପଦକ, ଜୁନିୟର ବିଶ୍ୱକପ୍ ଏବଂ ଏସିଆ କପ୍ ଭଳି ଟାଇଟଲ ଜିତିଛନ୍ତି।
ଭାରତୀୟ ଟିମ୍ ପକ୍ଷରୁ ୨୦୦ରୁ ଅଧିକ ହକି ମ୍ୟାଚ୍ ଖେଳିଥିବା ଆକାଶଦୀପଙ୍କଠାରୁ ପ୍ରଶଂସକ ବହୁତ କିଛି ଆଶା କରିଛନ୍ତି। ୨୦୧୨ରେ ଡେବ୍ୟୁ କରିଥିବା ଆକାଶ ୮୦ରୁ ଅଧିକ ଗୋଲ କରିଛନ୍ତି। ତାଙ୍କୁ ଗୋଲ ମେଶିନ ମଧ୍ୟ କୁହାଯାଏ। ନିକଟରେ ଅଷ୍ଟ୍ରେଲିଆ ବିପକ୍ଷରେ ହାଟ୍ରିକ କରିଥିବା ଆକାଶଦୀପ ନିଜର ତୃତୀୟ ବିଶ୍ୱକପ୍ ଖେଳିବେ।
ମନପ୍ରିତ ଗତ ବିଶ୍ୱକପ୍ରେ ଅଧିନାୟକ ଥିଲେ। ହେଲେ ଏଥର ତାଙ୍କ ଉପରେ ଏହାର ଚାପ ରହିବ ନାହିଁ। ଏମିତିରେ ସେ ଆରାମରେ ଖେଳିପାରିବେ। ଅଧିନାୟକ ଭାବେ ସେ ଟୋକିଓ ଅଲିମ୍ପିକ୍ରେ କାଂସ୍ୟ ପଦକ ଜିତିଥିଲେ। ତାଙ୍କର ଅନୁଭବ ଏବଂ ଖେଳିବାର ଶୈଳୀ ଭାରତୀୟ ଟିମ୍କୁ ଗୋଲ୍ କରିବାରେ ସହାୟକ ହେବ ବୋଲି କୁହାଯାଉଛି।
ମନଦୀପ ଗତ ବର୍ଷ ୨୦୨୨ରେ ଦଳ ପାଇଁ ଦ୍ୱିତୀୟ ସର୍ବାଧିକ ୧୩ ଗୋଲ କରିଥିଲେ।ସେ ବିରୋଧୀ ଖେଳାଳିଙ୍କୁ ଚକମା ଦେବା ଏବଂ ପେନାଲ୍ଟି କର୍ନର ସୁଯୋଗ ଛଡ଼ାଇବାରେ ମାହିର ବୋଲି କୁହାଯାଏ। ଏଣୁ ତାଙ୍କ ଅନୁଭବ ବିଶ୍ୱକପ୍ରେ ବେଶ ମହତ୍ୱପୂର୍ଣ୍ଣ ରହିବ।
ଭାରତୀୟ ଟିମ୍ର ଷ୍ଟାର ଗୋଲକିପର ଶ୍ରୀଜେଶ ମଧ୍ୟ ନିଜର ସମ୍ପୂର୍ଣ୍ଣ ପ୍ରସ୍ତୁତି ଶେଷ କରିଛନ୍ତି। ପୁରୁଷ ପ୍ରୋ ଲିଗ୍ରେ ପ୍ରଦର୍ଶନ ପରେ ଶ୍ରୀଜେଶ ଆଲୋଚନାର ଶିକାର ହୋଇଥିଲେ। ହେଲେ ସେ ଅଷ୍ଟ୍ରେଲିଆ ବିପକ୍ଷରେ ଦମ୍ଦାର ପ୍ରଦର୍ଶନ କରିଛନ୍ତି।
