ସାଉଥାମ୍ପଟନ, ୯।୭- କରୋନା ଭାଇରସ ସଂକ୍ରମଣ ଯୋଗୁ ୪ ମାସ ବ୍ରେକ୍ ପରେ ଆରମ୍ଭ ହୋଇଥିବା ଅନ୍ତର୍ଜାତୀୟ କ୍ରିକେଟରେ ଓ୍ବେଷ୍ଟଇଣ୍ଡିଜ ବୋଲରମାନେ ଚମତ୍କାର ପ୍ରଦର୍ଶନ କରିଛନ୍ତି। ସ୍ଥାନୀୟ ରୋଜ୍ ବାଓ୍ବଲ ଷ୍ଟାଡିୟମରେ ଚାଲିଥିବା ପ୍ରଥମ କ୍ରିକେଟ ଟେଷ୍ଟରେ ଅଧିନାୟକ ଜାସନ ହୋଲ୍ଡରଙ୍କ ୬ ଉଇକେଟ ସଫଳତା ବଳରେ ଓ୍ବେଷ୍ଟଇଣ୍ଡିଜ ଘରୋଇ ଇଂଲଣ୍ଡର ପ୍ରଥମ ଇନିଂସକୁ ୨୦୪ ରନରେ ସୀମିତ ରଖିଛି। ଇଂଲଣ୍ଡ ପକ୍ଷରୁ ଅଧିନାୟକ ବେନ୍ ଷ୍ଟୋକ୍ସ ସର୍ବାଧିକ ୪୩ ରନ ସ୍କୋର କରଥିଲେ। ଆଲୋକ କମି ଯିବାରୁ ଖେଳ ବାଧାପ୍ରାପ୍ତ ହେବା ବେଳକୁ ଓ୍ବେଷ୍ଟଇଣ୍ଡିଜ ପ୍ରଥମ ଇନିଂସରେ କୌଣସି ଉଇକେଟ ନ ହରାଇ ୨୧ ରନ ସଂଗ୍ରହ କରିଛି।
ବର୍ଷା ଯୋଗୁ ବୁଧବାର ପ୍ରଥମ ଦିବସରେ ମାତ୍ର ୧୭.୪ ଓଭର ଖେଳ ସମ୍ଭବ ହୋଇଥିଲା। ସେତେବେଳକୁ ଇଂଲଣ୍ଡ ୧ ଉଇକେଟ ହରାଇ ୩୫ ରନ କରିଥିଲା। ଗୁରୁବାର ଦ୍ୱିତୀୟ ଦିବସ ଖେଳରେ ଇଂଲଣ୍ଡ ବ୍ୟାଟ୍ସମ୍ୟାନମାନେ ଭ୍ରମଣକାରୀ ଦଳର ପେସ୍ ବୋଲରଙ୍କୁ ସଫଳ ମୁକାବିଲା କରିପାରି ନ ଥିଲେ। ଶାନନ ଗାବ୍ରିଏଲ ୧୬ ରନ ମଧ୍ୟରେ ଘରୋଇ ଦଳର ଆଉ ୨ ଉଇକେଟ ନେଇ ଓ୍ବେଷ୍ଟଇଣ୍ଡିଜକୁ ଫାଇଦାରେ ରଖିଥିଲେ। ଜୋ ଡେନ୍ଲି ୧୮ ଓ ରୋରି ବନର୍ସ ୩୦ ରନ କରିଥିଲେ। ଏହାପରେ ଘାତକ ସାବ୍ୟସ୍ତ ହୋଇଥିଲେ ହୋଲ୍ଡର। ସେ ଜ୍ୟାକ କ୍ରାଓଲେଙ୍କୁ ୧୦, ଓଲି ପୋପ୍ ୧୨, ବେନ୍ ଷ୍ଟୋକ୍ସ ୪୩, ଜେସ ବଟଲର ୩୫, ଜୋଫ୍ରା ଆର୍ଚର ୦, ମାର୍କ ଉଡ୍ଙ୍କୁ ୫ ରନରେ ଆଉଟ କରି ଇଂଲଣ୍ଡକୁ ବ୍ୟାକ୍ଫୁଟ୍କୁ ଠେଲି ଦେଇଥିଲେ। ଡୋମିନିକ୍ ବେସ୍ ଓ ଜେମ୍ସ ଆଣ୍ଡରସନ ଅନ୍ତିମ ଉଇକେଟରେ ୩୦ ରନର ଭାଗୀଦାରି ଗଢ଼ି ଦଳର ରନ ସଂଖ୍ୟାକୁ ୨୦୦ ଅତିକ୍ରମ କରାଇଥିଲେ। ୨୦ ବଲ୍ରୁ ୧୦ ରନ କରିଥିବା ଆଣ୍ଡରସନଙ୍କୁ କ୍ଲିନ୍ ବୋଲ୍ଡ କରି ଗାବ୍ରିଏଲ ଇଂଲଣ୍ଡ ଇନିଂସର ପରିସମାପ୍ତି ଘଟାଇଥିଲେ। ବେସ୍ ୪୪ ବଲ୍ରୁ ୪ ଚୌକା ସହ ୩୧ ରନରେ ଅପରାଜିତ ରହିଥିଲେ। ଓ୍ବେଷ୍ଟଇଣ୍ଡିଜ ପକ୍ଷରୁ ହୋଲ୍ଡର ୬ଟି ଏବଂ ଗାବ୍ରିଏଲ ୪ଟି ଉଇକେଟ ନେଇଥିଲେ।
ସଂକ୍ଷିପ୍ତ ସ୍କୋର
ଇଂଲଣ୍ଡ ପ୍ରଥମ ଇନିଂସ: ୨୦୪/ଅଲଆଉଟ(ଷ୍ଟୋକ୍ସ-୪୩, ବଟଲର-୩୫, ବନର୍ସ-୩୦, ଡୋମିନିକ୍ ବେସ୍-୩୧*, ହୋଲ୍ଡର-୬/୪୨, ଗାବ୍ରିଏଲ-୪/୬୨)।
