ମୁମ୍ବାଇ,୨୮।୨ : ବମ୍ବେ ହାଇକୋର୍ଟ କହିଛନ୍ତି ଯେ ଜଣେ ଝିଅଙ୍କର ହାତ ଧରି ନିଜର ପ୍ରେମ ବ୍ୟକ୍ତ କରିବା ଅସଦାଚରଣ ନୁହେଁ। ଅଭିଯୁକ୍ତଙ୍କୁ ଜାମିନରେ ମୁକ୍ତ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ବମ୍ବେ ହାଇକୋର୍ଟର ନାଗପୁର ବେଞ୍ଚରେ ଜଷ୍ଟିସ ଭାରତୀ ଡାଙ୍ଗରେଙ୍କ ଏକକ ବେଞ୍ଚ ଆଦେଶରେ କହିଛନ୍ତି ଯେ ପୀଡିତାଙ୍କୁ ଯୌନ ନିର୍ଯାତନା ଦେବା ଅଭିଯୁକ୍ତଙ୍କର କୌଣସି ଉଦ୍ଦେଶ୍ୟ ନାହିଁ ବୋଲି ପୀଡିତାଙ୍କ ବିବୃତ୍ତିରୁ ଏହା ସ୍ପଷ୍ଟ ହୋଇଛି। ଏଭଳି ପରିସ୍ଥିତିରେ ଅଭିଯୁକ୍ତଙ୍କୁ ଗିରଫ ପୂର୍ବରୁ ଜାମିନ ପ୍ରଦାନ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି।
୧ ନଭେମ୍ବର ୨୦୨୨ରେ ନାବାଳିକା ପୀଡିତାଙ୍କ ପିତା ପୋଲିସ ନିକଟରେ ଅଭିଯୋଗ କରିଥିଲେ ଯେ ଅଟୋ ଡ୍ରାଇଭର ଧନରାଜ ବାବୁ ସିଂ ରାଠୋର ତାଙ୍କ ୧୭ ବର୍ଷ ବୟସ୍କା ନାବାଳିକା ଝିଅଙ୍କୁ ଯୌନ ନିର୍ଯାତନା ଦେବାକୁ ଚେଷ୍ଟା କରିଥିଲେ। ଏହା ପରେ ପୋଲିସ ବିଭିନ୍ନ ବିଭାଗ ଅଧୀନରେ ଅଭିଯୁକ୍ତଙ୍କ ବିରୋଧରେ ମାମଲା ରୁଜୁ କରିଥିଲା। ଅଭିଯୋଗରେ କୁହାଯାଇଥିଲା ଯେ ତାଙ୍କ ଝିଅ ଅଭିଯୁକ୍ତଙ୍କ ଅଟୋରେ କଲେଜ ଯାଉୁଥିଲେ। ପରେ ଯେତେବେଳେ ସେ ଅଟୋରେ ଯିବା ବନ୍ଦ କରିଦେଲେ, ଅଭିଯୁକ୍ତ ଝିଇଙ୍କୁ ଅନୁସରଣ କରିବା ଆରମ୍ଭ କରିଥିଲେ।
୧ ନଭେମ୍ବର ୨୦୨୨ ରେ ଅଭିଯୁକ୍ତ ନାବାଳିକାର ହାତ ଧରି ନିଜର ପ୍ରେମ ବ୍ୟକ୍ତ କରିଥିଲେ। ଅଭିଯୋଗ ହୋଇଥିଲା ଯେ ଅଭିଯୁକ୍ତ ପୀଡିତାଙ୍କୁ ତାଙ୍କ ବାଇକରେ ବସାଇ ଘରେ ଛାଡ଼ି ଦେବାକୁ ମଧ୍ୟ କହିଥିଲେ। କିନ୍ତୁ ପୀଡିତା କୌଣସି ପ୍ରକାରେ ଖସି ପଳାଇ ତାଙ୍କ ଘରେ ପହଞ୍ଚିଥିଲେ। ଏହା ପରେ ଝିଅଙ୍କର ବାପା ଅଭିଯୋଗ କରିଥିଲେ।
ଶୁଣାଣି ସମୟରେ କୋର୍ଟ କହିଛନ୍ତି ଯେ ପ୍ରିମା ଫେସିରେ ଯୌନ ନିର୍ଯାତନା ମାମଲା ନାହିଁ କାରଣ ଅଭିଯୁକ୍ତ ଯୌନ ନିର୍ଯାତନା ଉଦ୍ଦେଶ୍ୟରେ ପୀଡିତାଙ୍କ ହାତ ଧରି ନ ଥିଲେ। ଏଭଳି ପରିସ୍ଥିତିରେ ଅଭିଯୁକ୍ତ ଜାମିନ ପାଇବାକୁ ହକଦାର। ଅଭିଯୁକ୍ତଙ୍କୁ ଜାମିନ ପ୍ରଦାନ କରିବା ସହିତ କୋର୍ଟ ଭବିଷ୍ୟତରେ ମଧ୍ୟ ସେ ଏପରି କାର୍ଯ୍ୟ କରିବେ ନାହିଁ ବୋଲି ଚେତାବନୀ ଦେଇଛନ୍ତି। ନଚେତ ତାଙ୍କୁ ଦିଆଯାଇଥିବା ଜାମିନ ପ୍ରତ୍ୟାହାର କରାଯିବ।