ନିଶ୍ଚିନ୍ତକୋଇଲି,୭।୮(ଅଶୋକ କୁମାର ମହାପାତ୍ର): ନଦୀ ବନ୍ଧର ସୁରକ୍ଷା,ପଥର ପ୍ୟାକିଂ ଓ ଉନ୍ନତିକରଣ ପାଇଁ ସରକାର ଜଳ ସମ୍ପଦ ବିଭାଗ ଜରିଆରେ କୋଟି କୋଟି ଟଙ୍କାର ଅନୁଦାନ ଯୋଗାଇ ଦେଇଆସୁଥିବା ବେଳେ ବିଭାଗୀୟ ଦାୟିତ୍ୱ ହୀନତା ଓ ଅବହେଳା କାରଣରୁ ନିର୍ମାଣର ମାତ୍ର ଅଳ୍ପ ଦିନ ପରେ ନଦୀ ବନ୍ଧରେ ଗର୍ତ୍ତ ହୋଇଯାଉଛି। ଏହା ଉଦାହରଣ କଟକ ଜିଲା ନିଶ୍ଚିନ୍ତକୋଇଲି ବ୍ଲକରେ ଦେଖିବାକୁ ମିଳିଛି। ଏହି ବ୍ଲକ ଦେଇ ପ୍ରବାହିତ ମଦାନଦୀ ଓ ଏହାର ଶାଖାନଦୀରେ ଏବେ ବନ୍ୟାଜଳ ପ୍ରବାହିତ ହେଉଛି। ଏପରିସ୍ଥଳେ ନଦୀ ତଟବର୍ତ୍ତୀ ଦୀପାଞ୍ଚଳବାସୀଙ୍କୁ ଦୁର୍ବଳ ନଦୀବନ୍ଧ ଚିନ୍ତା ଘାରିବାରେ ଲାଗିଛି। କିଛି ବର୍ଷ ତଳେ ଲୁଣାନଦୀର ତିଳକଣା ଓ ଚିତ୍ରୋପତ୍ଳା ନଦୀର ନାହାଳପୁର ନିକଟରେ ଦୁଇ ଘାଇ ସୃଷ୍ଟି ହୋଇଥିଲା। ଏହାଦ୍ୱାରା ବ୍ଲକର ଅଧିକାଂଶ ଲୋକେ ପ୍ରଭାବିତ ହୋଇଥିଲେ। ଏବେ ନିଶ୍ଚିନ୍ତକୋଇଲି ବ୍ଲକ ଦେଇ ପ୍ରବାହିତ ମହାନଦୀ ଓ ଚିତ୍ରୋପତ୍ଳା ନଦୀର ଏକାଧିକ ସ୍ଥାନରେ ବଡ଼ ବଡ଼ ଗର୍ତ୍ତ ସୃଷ୍ଟି ହୋଇଛି। ଏପରିସ୍ଥଳେ ଜଳ ସମ୍ପଦ ବିଭାଗ କୌଣସି ତପତ୍ରତା ପ୍ରକାଶ କରୁଥିବା ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଲଘୁଚାପଜନିତ ଲଗାଣ ବର୍ଷା ଯୋଗୁ ଏହି ବ୍ଲକ ଦେଇ ପ୍ରବାହିତ ଲୁଣା, ଚିତ୍ରୋପତ୍ଳା ଓ ମହାନଦୀରେ ବନ୍ୟାଜଳ ପ୍ରବାହିତ ହେଉଛି। ମାତ୍ର ନରେନ୍ଦ୍ରପୁର ଠାରେ ଚିତ୍ରୋପତ୍ଳା ନଦୀର ବାମପାର୍ଶ୍ୱରେ ଏକ ବଡ ଗର୍ତ୍ତ ସୃଷ୍ଟି ହୋଇଥିବାର ସ୍ଥାନୀୟ ଲୋକେ କହିଛନ୍ତି। ସେହିପରି ଚିତ୍ରୋପତ୍ଳା ନଦୀର ତିଳକଣ ଠାରୁ ନେମାଳ ପର୍ଯ୍ୟନ୍ତ ବାମ ପାର୍ଶ୍ୱରେ ଏକାଧିକସ୍ଥାନରେ ଗର୍ତ୍ତ ହୋଇଛି। ଏହାଛଡ଼ା ମହାନଦୀର ବାମ ପାର୍ଶ୍ୱରେ ଥିବା ଉତ୍ତରକୂଳ ଓ ବାବୁଜଙ୍ଗ ପଞ୍ଚାୟତର ଏକାଧିକ ସ୍ଥାନରେ ମଧ୍ୟ ଏପରି ଅବସ୍ଥା ଦେଖିବାକୁ ମିଳିଛି। ଏଗୁଡ଼ିକୁ ତୁରନ୍ତ ମରାମତି କରାନଗଲେ ଆଗାମୀ ଦିନରେ ବଡ଼ ଧରଣ ବିପଦକୁ ଏଡ଼ାଇ ଦେଇହେବ ନାହିଁ ବୋଲି ସ୍ଥାନୀୟ ଲୋକେ କହିଛନ୍ତି। ପ୍ରଶାସନ ତରଫରୁ ତୁରନ୍ତ ଏନେଇ ପଦକ୍ଷେପ ନେବାକୁ ଦାବି କରାଯାଇଛି। ଏସମ୍ପର୍କରେ ଜଳ ସମ୍ପଦ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ଅକ୍ଷୟ କୁମାର ମଲିକ କୁହନ୍ତି, ନଦୀରେ ବନ୍ୟା ଜଳ ପ୍ରବାହିତ ପରେ ସମସ୍ତ ନଦୀ ବନ୍ଧର ସୁରକ୍ଷା ନେଇ ସମୀକ୍ଷା ହୋଇଛି। ଯେଉଁ ଜାଗାରେ ବିପଦ ସଙ୍କୁଳ ରହିଛି ବୋଲି କୁହାଯାଉଛି ଉକ୍ତ ସ୍ଥାନଗୁଡ଼ିକୁ ଚିହ୍ନଟ କରାଯାଇ ପରବର୍ତ୍ତୀ ପଦକ୍ଷେପ ନିଆଯିବ।