ନୂଆଦିଲ୍ଲୀ, ୧୯।୯: ଅଯୋଧ୍ୟାରେ ଭବ୍ୟ ରାମମନ୍ଦିର ନିର୍ମାଣରେ ଅର୍ପଣ ପାଇଁ ୭ ମହାଦେଶର ୧୧୫ଟି ଦେଶରୁ ପବିତ୍ର ଜଳ ସଂଗ୍ରହ କରାଯାଇଛି। ଏହା ବସୁଧୈବ କୁଟୁମ୍ବକମ୍ ବାର୍ତ୍ତାକୁ ପ୍ରତିଫଳିତ କରିବ ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଶନିବାର କହିଛନ୍ତି। ରାଜନାଥ ତାଙ୍କ ଆକବର ରୋଡ୍ ବାସଭବନରେ ୧୧୫ ଦେଶର ନଦୀ, ଝରଣା ଓ ମହାସାଗରରୁ ଆସିଥିବା ଜଳକୁ ଗ୍ରହଣ କରିଥିଲେ। ସେଠାରେ ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ସାଧାରଣ ସମ୍ପାଦକ ଚମ୍ପତି ରାୟ ଏବଂ ବିଭିନ୍ନ ଦେଶର ରାଷ୍ଟ୍ରଦୂତ ଓ ଉଚ୍ଚାୟୁକ୍ତମାନେ ଉପସ୍ଥିତ ଥିଲେ। ଭାଜପା ନେତା ତଥା ପୂର୍ବତନ ଦିଲ୍ଲୀ ବିଧାୟକ ବିଜୟ ଜୋଲିଙ୍କ ନେତୃତ୍ୱରେ ଦିଲ୍ଲୀ ଷ୍ଟଡି ସର୍କଲ ନାମକ ଏନ୍ଜିଓ ଦ୍ୱାରା ଏହି ଜଳ ସଂଗ୍ରହ କରାଯାଇଛି। ଏନ୍ଜିଓର ଏଭଳି କାର୍ଯ୍ୟକୁ ରାଜନାଥ ପ୍ରଶଂସା କରିଥିଲେ। ରାମ ମନ୍ଦିର କାର୍ଯ୍ୟ ଶେଷ ହେବା ବେଳକୁ ଅବଶିଷ୍ଟ ୭୭ ଦେଶର ଜଳ ସଂଗ୍ରହ କରାଯାଇଥିବ ବୋଲି ସେ ଆଶାବ୍ୟକ୍ତ କରିଥିଲେ। ଉକ୍ତ ଜଳରେ ରାମଲାଲାଙ୍କର ଜଳାଭିଷେକ ଉତ୍ସବ ଅନୁଷ୍ଠିତ ହେବ।
