ସାଧାରଣତଃ କୌଣସି ବ୍ୟକ୍ତି ଘର ତିଆରି କରିବା ପୂର୍ବରୁ ବିଭିନ୍ନ ଦିଗପ୍ରତି ଧ୍ୟାନ ରଖି ଘର ତିଆରି କରିଥାନ୍ତି। ଯେମିତିକି ଘର ଭିତରେ ଯେପରି କିଛି ଗଛଲତା ନ ରହିବ ସେଥିପ୍ରତି ଘରମାଲିକ ବିଶେଷ ଗୁରୁତ୍ୱ ଦେଇଥାନ୍ତି। ମାତ୍ର କେରଳରେ ଏମିତି ଏକ ଘର ଅଛି, ଯେଉଁଠି ଘର ଭିତରେ ବଡ଼ ବଡ଼ ଦୁଇଟି ଜାମୁ ଏବଂ ଆମ୍ବ ଗଛ ରହିଛି। ଏହି ଗଛ ଦୁଇଟି ଘରର ବେଶ୍ ଶୋଭା ବର୍ଦ୍ଧନ କରୁଛନ୍ତି।
କେରଳର ଆଲାପୁଝା ଜିଲାରେ ରହୁଥିବା ୪୦ ବର୍ଷୀୟ ମ୍ୟାଥ୍ୟୁ ମଥାନ ଏପରି ଏକ ଅଜବ ଘର ତିଆରି କରିଛନ୍ତି। ଏହି ଘର ଭିତରେ ମାଥ୍ୟୁ ଡିଜାଇନ୍ କରିଛନ୍ତି। ଘର ଭିତରେ ଦୁଇଟି ପୁରୁଣା ଆମ୍ବ ଏବଂ ଜାମୁକୋଳି ଗଛ ରହିଛି। ଘରଟି ୩୭୦୦ ବର୍ଗଫୁଟ ଅଞ୍ଚଳରେ ତିଆରି ହୋଇଛି। ୬୦୦ ବର୍ଗଫୁଟ କ୍ଷେତ୍ରରେ ଆମ୍ବ ଏବଂ ୨୦୦ ବର୍ଗଫୁଟରେ ଏକ ଜାମୁକୋଳି ଗଛ ରହିଛି। ତାଙ୍କ ଘର ଦୁଇ ଏକର ଜମିରେ ତିଆରି ହୋଇଛି। ଏହି ଘରେ ତାଙ୍କ ମାତାପିତା ଏବଂ ଭାଇଭଉଣୀ ମଧ୍ୟ ରହୁଛନ୍ତି।
ମାଥ୍ୟୁ କୁହନ୍ତି, ସେ ଚାକିରି କରିବା ପାଇଁ କୋଚିନ୍ ଚାଲିଯାଇଥିଲେ। ସେଠାରୁ ୪ ବର୍ଷ ପରେ ଫେରିବା ପରେ ତାଙ୍କୁ ଘର ତିଆରି କରିବାକୁ ଦୁଇ ଏକର ଜମି ଦେଇଥିଲେ ତାଙ୍କ ମାତା ପିତା। ଏଠାରେ ସେ ଘର କେମିତି କରିବେ ସେହି ଯୋଜନା କରୁଥିଲେ। କାରଣ ଯେଉଁଠି ଘର ତିଆରି ହେବାର ଥିଲା ସେଠାରେ ଦୁଇଟି ବଡ଼ ବଡ଼ ଗଛ ଥିଲା। କିନ୍ତୁ ଗଛ କାଟିବାକୁ ତାଙ୍କର ଇଚ୍ଛା ହେଲା ନାହିଁ। କାରଣ ସେ ପିଲାଦିନେ ତାଙ୍କ ୫ ଭାଇଙ୍କ ସହ ଏହି ଗଛରେ ଚଢ଼ି ଖେଳୁଥିଲେ। ତେଣୁ କାଟିବାକୁ ତାଙ୍କ ହାତ ଗଲାନି। ସେ ଗଛ କାଟିବା ପରିବର୍ତ୍ତେ ଡିଜାଇନ୍ କରିବାକୁ ମନସ୍ଥ କଲେ। ତେଣୁ ସେ ବେଡ୍ରୁମ୍ ନିକଟରେ ୨୦୦ ବର୍ଗଫୁଟ ସ୍ଥାନ ଛାଡ଼ିଦେଲେ। ଉପରେ ୧୫ ଫୁଟ ଖୋଲା ସ୍ଥାନ ରଖିଲେ। ଯେଉଁଠି ଗଛର ଶାଖା ବଢ଼ିବାକୁ ଲାଗିବ। ଘର ଭିତରେ ସୂର୍ଯ୍ୟକିରଣକୁ ରୋକିବା ପାଇଁ ଛାତକୁ କାଚରେ ଆଚ୍ଛାଦିତ କରିଛନ୍ତି।
ସେହିପରି ଆମ୍ବ ଗଛ ଥିବାରୁ ତାଙ୍କର ଦୁଇ ପିଲା ମନ ଆନନ୍ଦରେ ସେଠାରେ ଖେଳି ପାରୁଛନ୍ତି। ପ୍ରଥମେ ତାଙ୍କ ସ୍ତ୍ରୀ ଡରୁଥିଲେ ଗଛ ଡାଳ ଯୋଗେ କୀଟପତଙ୍ଗ ଘର ଭିତରକୁ ପ୍ରବେଶ କରିବେ। କିନ୍ତୁ ଗଛଗୁଡ଼ିକୁ କିପରି ଏଥିରୁ ସୁରକ୍ଷା ମିଳିବ ମାଥ୍ୟୁ ସମସ୍ତ ପଦକ୍ଷେପ ଗ୍ରହଣ କରିଛନ୍ତି। ଏହି ଘରଟିକୁ ତିଆରି କରିବାକୁ ବର୍ଷକରୁ ଅଧିକ ସମୟ ଲାଗିଥିଲା। ପ୍ରାୟ ଏଥିରେ ୨ କୋଟି ଟଙ୍କା ଖର୍ଚ୍ଚ ହୋଇଛି।