ଗୋପ,୯।୯(ଡି.ଏନ୍.ଏ.): ବନ୍ୟା ଛାଡ଼ିବାର ଦୁଇ ସପ୍ତାହ ପୂରିଛି। ହେଲେ ବିପନ୍ନଙ୍କ ଦୁଃଖ ସରିନି। କେତେକଙ୍କ ଘର ବନ୍ୟା ପାଣିରେ ଭାଙ୍ଗି ଯାଇଛି। ଏପରି ଏକ ଦୁଃଖଦ ସମୟରେ ଗୋପ ବ୍ଲକ ଉପାଧ୍ୟକ୍ଷ ବନରଞ୍ଜନ ପଟ୍ଟନାୟକ ବିପନ୍ନଙ୍କ ଘର ବୁଲି ଦେଖିବା ସହ ସେମାନଙ୍କ ଦୁଃଖରେ ସାମିଲ ହୋଇଛନ୍ତି। ଏଥିସହ ସରକାର ଆବାସ ଯୋଜନା ମାଧ୍ୟମରେ ବିପନ୍ନଙ୍କୁ ତୁରନ୍ତ ଘର ଯୋଗାଇ ଦେବାକୁ ଗଣମାଧ୍ୟମ ସମ୍ମୁଖରେ ବ୍ୟକ୍ତିଗତ ଭାବେ ଦାବି କରିଛନ୍ତି। ସବୁ ବର୍ଷ ଧନୁଆ ନଦୀର ବନ୍ୟା ଦାଉରୁ ରକ୍ଷା ପାଇଁ ସରକାର ସ୍ଥାୟୀ ପ୍ରତିକାର କରନ୍ତୁ ବୋଲି ସେ କହିଛନ୍ତି।
ପ୍ରକାଶ ଯେ, ଗୋପ ବ୍ଲକର ୫ ପଞ୍ଚାୟତ ବନ୍ୟାପ୍ଳାବିତ ପଞ୍ଚାୟତ ଭାବେ ପ୍ରତ୍ୟେକ ବର୍ଷ ଧନୁଆ, କୁଶଭଦ୍ରା ନଦୀ ବନ୍ୟାଜଳରେ ହଜାର ହଜାର ଲୋକ, ଚାଷୀ କ୍ଷତିଗ୍ରସ୍ତ ହେଉଛନ୍ତି। ଚଳିତ ବନ୍ୟାଜଳ ଯୋଗୁ କୁଶଭଦ୍ରା ନଦୀର ଖଣ୍ତିଆକୁଦ ନିକଟରେ ଏକ ୩୦ ଫୁଟ ଲମ୍ବର ଘାଇ ସୃଷ୍ଟି ହୋଇଥିଲା। ଫଳରେ ୪୧ ଗାଁର ୨୯ହଜାର ୭୮୧ ଲୋକ ଦୀର୍ଘ ଗୋଟିଏ ସପ୍ତାହ ଧରି ଜଳବନ୍ଦୀରେ ରହିଥିଲେ। ଏଥିସହ ବ୍ଲକର ୧୧ ପଞ୍ଚାୟତର ୫୨ ଗାଁର ୩ ହଜାର ୧୨୩ ହେକ୍ଟର ଚାଷଜମି ସମ୍ପୂର୍ଣ୍ଣ ନଷ୍ଟ ହୋଇଥିବା କୃଷି ବିଭାଗର ଅତିରିକ୍ତ କୃଷି ଅଧିକାରୀ ଚନ୍ଦ୍ରଶେଖର ଦାସ ସୂଚନା ଦେଇଥିଲେ। ଅନ୍ୟପଟେ ଉପାଧ୍ୟକ୍ଷ ପଟ୍ଟନାୟକ ସ୍ବାସ୍ଥ୍ୟକେନ୍ଦ୍ର ଖୋଲି ବିପନ୍ନଙ୍କୁ ଶୁଖିଲା ଖାଦ୍ୟ, ରନ୍ଧାଖାଦ୍ୟ ଏବଂ ବିଭିନ୍ନ ସେବା ଯୋଗାଉଛନ୍ତି।