ମସଲାଦାର ଖାଦ୍ୟ, ତରକାରୀ ଆଦି ଖାଇବାର ମଜା ନେବା ସମୟରେ ବେଳେ ବେଳେ ଆମ ଶାର୍ଟ ବା ଡ୍ରେସ୍ ଆଦିରେ ହଳଦୀ ଦାଗ ଲାଗିଯାଏ । ସେଥିପାଇଁ ଜାଣନ୍ତୁ ଘରୋଇ ଉପାୟରେ କିପରି ଛଡାଇ ହେବ ଏହି ଦାଗ….
ବେକିଙ୍ଗ୍ ସୋଢା : ବେକିଙ୍ଗ ସୋଢା ହେଉଛି ସବୁପ୍ରକାର ଦାଗ ଛଡେଇବାର ସାର୍ବଜନୀନ ଉପାୟ। ଅଳ୍ପ ପାଣିରେ ବେକିଙ୍ଗ୍ ସୋଢା ଓ ଭିନେଗାର ମିଶାଇ ଏକ ମୋଟା ପେଷ୍ଟ୍ ପ୍ରସ୍ତୁତ କରି ତାକୁ ହଳଦୀ ଦାଗ ଲାଗିଥିବା ସ୍ଥାନରେ ଲଗାଇ କିଛି ସମୟ ଛାଡି ଦିଅନ୍ତୁ । ଏହା ପରେ ବ୍ରସ୍ ସାହାଯ୍ୟରେ ଘଷି ସଫା କରନ୍ତୁ ।
ଭିନେଗାର ଓ ଲେମ୍ବୁରସ : ଏହି ଦୁଇଟି ଜିନିଷ ପ୍ରାୟ ସମସ୍ତଙ୍କ ରୋଷେଇ ଘରେ ଥାଏ । ଅଳ୍ପ ପାଣିରେ ଭିନେଗାର ଓ ଲେମ୍ବୁ ରସ ମିଶାଇ ଏକ ମିଶ୍ରଣ ପ୍ରସ୍ତୁତ କରି ସେଥିରେ ହଳଦୀ ଦାଗ ହୋଇଥିବା କପଡାକୁ ଅଧ ଘଣ୍ଟା ପାଇଁ ବୁଡେଇ ରଖନ୍ତୁ । ଏହା ପରେ ନର୍ମାଲ୍ ଡିଟରଜେଣ୍ଟରେ ସଫା କରନ୍ତୁ । ଦେଖିବେ ଦାଗ ଲିଭିଯାଇଥିବ । କେବଳ ଉଲ୍ ବା ନରମ କପଡା ଜାତୀୟ ଜିନିଷ ଏଥିରେ ସଫା କରନ୍ତୁ ନାହିଁ । କାରଣ ଏହା ଦ୍ୱାରା ସେଗୁଡିକ ନଷ୍ଟ ହୋଇ ଯାଇପାରେ।
ଲିକ୍ୟୁଡ୍ ଡିସ୍ ଓ୍ବାସ୍ : ବେଳେ ବେଳେ ଲିକ୍ୟୁଡ୍ ଡିସ୍ ଓ୍ବାସ୍ ମଧ୍ୟ ଡିଟରଜେଣ୍ଟ ପରି କାମ ଦେଇଥାଏ । ଅଳ୍ପ ଭିମ୍ ଲିକ୍ୟୁଡ୍କୁ ପାଣିରେ ମିଶାଇ ହଳଦୀ ଦାଗ ଲାଗିଥିବା ସ୍ଥାନରେ ଲଗାଇ କିଛି ସମୟରେ ଛାଡି ଦେଇ ସଫା କଲେ ଦାଗ ଦୂର ହୋଇ ଯାଏ ।
ଟୁଥ୍ ପେଷ୍ଟ୍ : ପ୍ରଥମେ ହଳଦୀ ଲାଗିଥିବା ସ୍ଥାନକୁ ପାଣିରେ ଧୋଇବା ପରେ ବ୍ରସ୍ ସାହାଯ୍ୟରେ ଦାଗ ଥିବା ସ୍ଥାନରେ ଟୁ୍ଥ୍ ପେଷ୍ଟ ଲଗାଇ ଘଷି କରି ସଫା କରନ୍ତୁ ା ଦେଖିବେ ଦାଗ ଫିକା ପଡିଯିବ ।