ନୂଆଦିଲ୍ଲୀ,୩।୭: ଉତ୍ତରପ୍ରଦେଶ ମିରଟରେ ଏକ ବୀଭତ୍ସ ହତ୍ୟାକାଣ୍ଡ ଘଟିଛି। ୨୧ ବର୍ଷୀୟ ଜଣେ ଆଇନ ଛାତ୍ରଙ୍କୁ ଅତି ନିର୍ମମ ଭାବେ ହତ୍ୟା କରି ଅଖାରେ ଭରି ଡ୍ରେନରେ ଫିଙ୍ଗି ଦିଆଯାଇଛି। ଅନ୍ୟପକ୍ଷେ ପୋଲିସ ହତ୍ୟାକାଣ୍ଡରେ ସମ୍ପୃକ୍ତ ୩ ଜଣ ଅଭିଯୁକ୍ତଙ୍କୁ ଧରିବାରେ ସଫଳ ହୋଇଛି। ମିରଟ ଏସ୍ପି ସୁନୀଲ ଭଟନଗର ଏହି ସୂଚନା ଦେଇଛନ୍ତି। ମୃତ ଛାତ୍ର ଜଣକ ହେଲେ ୟସ୍ ରସ୍ତୋଗୀ(୨୧)।
ୟସ୍ ଜୁନ୍ ୨୭ ତାରିଖରୁ ନିଖୋଜ ଥିଲେ। ଏ ନେଇ ଥାନାରେ ଏକ ଅଭିଯୋଗ ହୋଇଥିଲା। ପୋଲିସ ତଦନ୍ତ ବେଳେ ସହରରେ ଲାଗିଥିବା ୨୫୦ ସିସିଟିଭି ଫୁଟେଜ ଯାଞ୍ଚ କରିଥିଲା। ଯାଞ୍ଚ ବେଳେ ୟସ୍ ଏକ ସ୍କୁଟିରେ ଯାଉଥିବା ପୋଲିସ ଜାଣିବାକୁ ପାଇଥିଲା। ଏହାକୁ ନେଇ ପୋଲିସ ଅଧିକ ଖୋଳତାଡ କରିଥିଲା। ଶେଷରେ ପୋଲିସ ଡ୍ରେନ୍ରୁ ଅଖାରେ ଭର୍ତ୍ତି ହୋଇଥିବା ୟସ୍ଙ୍କ ମୃତଦେହ ଜବତ କରିଥିଲା। ପୋଲିସ ହତ୍ୟାର କାରଣ ଜାଣିବା ପାଇଁ ଅଧିକ ତଦନ୍ତ ଚଳାଇଛି। ତଦନ୍ତ ବେଳେ ପୋଲିସକୁ କିଛି ତଥ୍ୟ ହସ୍ତଗତ ହୋଇଛି। ଅଭିଯୁକ୍ତଙ୍କ ସହ ୟସ୍ଙ୍କ ପୂର୍ବରୁ ସମ୍ପର୍କ ରହିଥିବା ଜଣାପଡିଛି। ଏପରି କି ବ୍ଲାକ୍ ମେଲ୍ କାରଣକୁ ନେଇ ୟସ୍ଙ୍କୁ ହତ୍ୟା କରାଯାଇଥିବା ପୋଲିସ ପକ୍ଷରୁ ସୂଚନା ମିଳିଛି। ଅଧିକ ତଦନ୍ତ ପାଇଁ ପୋଲିସ ମୃତଦେହ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି।