ବରଗଡ଼,୧୯।୮(ପ୍ରେମାନନ୍ଦ ଖମାରୀ): ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ବରଗଡ଼ ଜିଲା ପ୍ରଶାସନ ବିଭିନ୍ନ ସ୍ଥାନରେ ଜବରଦଖଲ ଉଚ୍ଛେଦ ପ୍ରକ୍ରିୟା ଆରମ୍ଭ କରିଛି। ଏହି କ୍ରମରେ ଅତାବିରା ବ୍ଲକର ଗୋଡ଼ଭଗା ଅଞ୍ଚଳରୁ ରାଜପଥ ପାର୍ଶ୍ୱସ୍ଥ ଜବରଦଖଲ ଉଚ୍ଛେଦ କରାଯାଉଛି। ତେବେ ଉକ୍ତ ଉଚ୍ଛେଦ ପ୍ରକ୍ରିୟାରେ ନିରୀହ ଗରିବ ଭୂମିହୀନମାନେ ପ୍ରଭାବିତ ହେଉଥିବାରୁ ସେମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହି କ୍ରମରେ ଏହି ବ୍ଲକ ଅଧୀନ ଭୋଇଟିକ୍ରା ମୌଜା ଚକୁଳିଫାର୍ମ (ପଥରପିଟା)ରେ ରହୁଥିବା ଭୂମିହୀନ ପରିବାର ଲୋକେ ଜିଲାପାଳ ଆଦିତ୍ୟ ଗୋୟଲଙ୍କୁ ସୋମବାର ଏକ ସ୍ମାରକପତ୍ର ପ୍ରଦାନ କରିଛନ୍ତି। ଉଚ୍ଛେଦ କରିବା ପୂର୍ବରୁ ସେମାନଙ୍କ ଥଇଥାନ ବ୍ୟବସ୍ଥା କରିବା ପାଇଁ ସେମାନେ ଜିଲାପାଳଙ୍କୁ ନିବେଦନ କରିଛନ୍ତି।
ସ୍ମାରକପତ୍ରରେ ଉଲ୍ଲେଖ ରହିଛି, ଦୀର୍ଘ ୬୦ବର୍ଷ ହେଲା ୨୫ପରିବାର ପଥରପିଟାରେ ଘରଦ୍ୱାର କରି ରହିଆସୁଛନ୍ତି। ସେମାନେ ସମସ୍ତେ ଭୂମିହୀନ। ୨୦୧୨ରେ ରାଜପଥ ପ୍ରଶସ୍ତୀକରଣ ସମୟରେ ସେମାନଙ୍କୁ ଉଚ୍ଛେଦ ଉଦ୍ୟମ ହୋଇଥିଲା। ସେତେବେଳେ ମଧ୍ୟ ସେମାନେ ଜିଲାପାଳଙ୍କୁ ଫେରାଦ ହୋଇଥିଲେ ଏବଂ ତତ୍କାଳୀନ ଜିଲାପାଳ ସେମାନଙ୍କ ସମସ୍ୟାକୁ ହୃଦୟଙ୍ଗମ କରି ସେମାନେ ରହୁଥିବା ସ୍ଥାନକୁ ଉଚ୍ଛେଦ କରି ନ ଥିଲେ। ଅନ୍ୟପଟେ ସେହି ସମୟରୁ ଏହି ପରିବାର ଲୋକେ ୧୦ଡେସିମିଲ ଘରଡ଼ିହ ପଟ୍ଟା ପ୍ରଦାନ ସହିତ ଥଇଥାନ କରିବା ପାଇଁ ଜିଲାପାଳଙ୍କୁ ନିବେଦନ କରିଆସୁଛନ୍ତି। କିନ୍ତୁ ଏପର୍ଯ୍ୟନ୍ତ ସେ ଦିଗରେ କିଛି ପଦକ୍ଷେପ ନିଆଯାଇନାହିଁ।
ଅପରପକ୍ଷେ ଗତ ୧୪ତାରିଖ ପୂର୍ବାହ୍ନ ପ୍ରାୟ ୧୦ଟା ସମୟରେ କିଛିଲୋକ ଆସି ଡାକବାଜି ଯନ୍ତ୍ରରେ ଉଚ୍ଛେଦ କରାଯିବ ବୋଲି ପ୍ରଚାର କରିବା ସହିତ ୧୭ତାରିଖ ସୁଦ୍ଧା ଘର ଖାଲି କରିବାକୁ ନିର୍ଦ୍ଦେଶ ଦେଇଥିଲେ। କିନ୍ତୁ ଏପର୍ଯ୍ୟନ୍ତ ସେ ନେଇ କିଛି ଲିଖିତ ନୋଟିସ୍ ସେମାନଙ୍କୁ ମିଳିନାହିଁ ବୋଲି ପଡ଼ାବାସୀ କହିଛନ୍ତି। ଉକ୍ତ ପଡ଼ାରେ ରହୁଥିବା ସମସ୍ତ ପରିବାର ଭୂମିହୀନ ଏବଂ କୁଲି ମଜୁରୀ କରୁଥିବାରୁ ବର୍ତ୍ତମାନ ସେମାନଙ୍କୁ ସେଠାରୁ ଉଚ୍ଛେଦ କରାଗଲେ ବହୁତ ଅସୁବିଧାର ସମ୍ମୁଖୀନ ହେବେ ବୋଲି କହିଛନ୍ତି। ଏବେ ବର୍ଷା ଲାଗି ରହିଥିବାବେଳେ ପିଲାଛୁଆଙ୍କୁ ଧରି ଅନ୍ୟତ୍ର ରହିବା ପାଇଁ ସେମାନଙ୍କ ପାଖରେ କୌଣସି ବିକଳ୍ପ ବ୍ୟବସ୍ଥା ନ ଥିବା ପଡ଼ାବାସୀ କହିଛନ୍ତି। ଫଳରେ ଉଚ୍ଛେଦ ପୂର୍ବରୁ ସେମାନଙ୍କୁ ଅନ୍ୟତ୍ର ଥଇଥାନ କରାଯିବା ଏବଂ ଅତିକମ୍ରେ ସେଥିପାଇଁ ୬ମାସ ସମୟ ଦେବାକୁ ମରିୟମ ସୁନା, ଭୂମି ସୁନା, ବନବାସୀ ନାଗ, ବାସନ୍ତୀ କୁମ୍ଭାର ପ୍ରମୁଖ ପଡ଼ାବାସୀ ଜିଲାପାଳଙ୍କୁ ନିବେଦନ କରିଛନ୍ତି।