ଜଗତ୍ସିଂହପୁର ଅଫିସ, ୧୧।୧: ପ୍ରବଳ ଶୀତ ଯୋଗୁ ଗରିବ ବାସହରାଙ୍କ ଚିନ୍ତା ବଢ଼ିଯାଇଛି। ରାତ୍ରିଯାପନ କରିବା ପାଇଁ ସେମାନେ ନାନା ଅସୁବିଧାର ସମ୍ମୁଖୀନ ହେଉଛନ୍ତି। ଶୀତଯୋଗୁ ବାସହରା ହୋଇ କୌଣସି ବ୍ୟକ୍ତିଙ୍କ ଯେପରି ମୃତ୍ୟୁ ନ ହୁଏ ସେଥିପ୍ରତି ଦାୟିତ୍ୱବାନ ହେବାକୁ ସୁପ୍ରିମକୋର୍ଟ ପ୍ରତ୍ୟେକ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ମାତ୍ର ଜଗତ୍ସିଂହପୁର ଜିଲାରେ ଏହି ନିର୍ଦ୍ଦେଶ କାର୍ଯ୍ୟକାରୀ ହେଉନାହିିଁ। ଚଳିତବର୍ଷ ଜିଲାପାଳଙ୍କ କାର୍ଯ୍ୟାଳୟ ମୁଖ୍ୟ ଫାଟକ ସମ୍ମୁଖ ଜଗତ୍ସିଂହପୁର ପୌର ପରିଷଦ କଲ୍ୟାଣ ମଣ୍ଡପରେ ଅସ୍ଥାୟୀ ରାତ୍ରିକାଳୀନ ଆଶ୍ରୟସ୍ଥଳ କରାଯାଇଛି। କିନ୍ତୁ ଜିଲାରେ ଏପର୍ଯ୍ୟନ୍ତ ସ୍ଥାୟୀ ଆଶ୍ରୟସ୍ଥଳ ନାହିଁ। ଅପରପକ୍ଷେ ବ୍ୟାପକ ପ୍ରଚାର ଓ ପ୍ରସାର କରାଯାଉ ନ ଥିବାରୁ ବାସହରାମାନେ ଅସ୍ଥାୟୀ ଆଶ୍ରୟସ୍ଥଳରେ ପହଞ୍ଚତ୍ପାରୁନାହାନ୍ତି। ଫଳରେ ଏହାର ବାସ୍ତବ ଲକ୍ଷ୍ୟ ପୂରଣ ହୋଇପାରୁନାହିଁ। ଜଗତ୍ସିଂହପୁର ଏବଂ ପାରାଦୀପରେ ଏକାଧିକ ସରକାରୀ, ବେସରକାରୀ କାର୍ଯ୍ୟାଳୟ ସାଙ୍ଗକୁ ଉନ୍ନୟନମୂଳକ ଯୋଜନା କାର୍ଯ୍ୟକାରୀ ହେଉଛି। ଏନେଇ ଅନେକ ଲୋକ ଏଠାକୁ ମୂଲ ଲାଗିବା ପାଇଁ ଆସୁଛନ୍ତି। ମାତ୍ର ଶୀତଦିନେ ରାତ୍ରିଯାପନ କରିବା ସେମାନଙ୍କ ପାଇଁ କଷ୍ଟକର ହୋଇପଡୁଛି। ଅର୍ଥାଭାବ ଯୋଗୁ ହୋଟେଲରେ ରହିବା ସମ୍ଭବ ହେଉ ନ ଥିବାବେଳେ ଫୁଟ୍ପାଥ୍, ବସ୍ଷ୍ଟପ୍ କିମ୍ବା ମନ୍ଦିର ପରିସରରେ ଦିନ କାଟିବାକୁ ବାଧ୍ୟ ହେଉଛନ୍ତି। କେବଳ ଶ୍ରମିକ ନୁହନ୍ତି, ବିଭିନ୍ନ କାମରେ ଏହି ସହରକୁ ଆସୁଥିବା ଲୋକେ ଗାଁକୁ ଫେରି ନ ପାରି ଅନୁରୂପ ସମସ୍ୟାର ସମ୍ମୁଖୀନ ହେଉଛନ୍ତି। ଭିକ୍ଷାବୃତ୍ତି କରି ବଞ୍ଚୁଥିବା ଲୋକେ ଶୀତରେ ପରିବାର ସହ କିପରି ଚଳିବେ ସେନେଇ ଚିନ୍ତାରେ ପଡ଼ିଛନ୍ତି। ତେଣୁ ଜଗତ୍ସିଂହପୁର ଓ ପାରାଦୀପରେ ପୌର ପରିଷଦ ପକ୍ଷରୁ ସ୍ଥାୟୀ ରାତ୍ରକାଳୀନ ଆଶ୍ରୟସ୍ଥଳ କରିବାକୁ ଦାବି ହେଉଛି।
ସୂଚନାଯୋଗ୍ୟ, ପ୍ରବଳ ଶୀତ ଯୋଗୁ ଅତୀତରେ ଦିଲ୍ଲୀରେ କେତେଜଣ ବାସହରାଙ୍କ ମୃତ୍ୟୁ ଘଟିଥିଲା। ଏନେଇ ପିପୁଲ୍ସ ୟୁନିୟନ ଫର୍ ସିଭିଲ ଲିବର୍ଟିଜ୍ (ପିୟୁସିଏଲ୍) ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା। ଏହି ମାମଲାର ବିଚାର କରି ଜଷ୍ଟିସ୍ ଦଲ୍ଭୀର ଭଣ୍ଡାରି ଏବଂ ଜଷ୍ଟିସ୍ ଗ୍ୟାନ୍ ସୁଧା ମିଶ୍ରଙ୍କୁ ନେଇ ଗଠିତ ଖଣ୍ଡପୀଠ ତୁରନ୍ତ ବାସହରାଙ୍କ ରହଣି ପାଇଁ ରାତ୍ରିକାଳୀନ ଆଶ୍ରୟସ୍ଥଳ ନିର୍ମାଣ କରିବାକୁ ପ୍ରତ୍ୟେକ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ। ଉକ୍ତ ଆଶ୍ରୟସ୍ଥଳରେ ମୌଳିକ ଆବଶ୍ୟକତା ଯଥା ଖାଦ୍ୟ, ପାନୀୟ ଜଳ, ଶଯ୍ୟା, ବ୍ଲାଙ୍କେଟ୍ ଓ ପାଇଖାନା ଆଦିର ବ୍ୟବସ୍ଥା କରିବାକୁ ଉଲ୍ଲେଖ କରିଥିଲେ। ଏଥିମଧ୍ୟରେ ଓଡ଼ିଶା ସରକାର ଭୁବନେଶ୍ୱରରେ ସ୍ଥାୟୀ ଆଶ୍ରୟସ୍ଥଳ ନିର୍ମାଣ କରି ସାରିଛନ୍ତି। ମାତ୍ର ଜଗତ୍ସିଂହପୁରରେ ଏହା ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।