ପାଟଣା,୨୪ା୯(ସ୍ବ.ପ୍ର.): ମହାନଦୀର ମୁଣ୍ଡଳି ବ୍ୟାରେଜରେ ବୋଟ୍ ଦୁର୍ଘଟଣାରେ ପ୍ରାଣ ହରାଇଥିବା ଖବରଦାତା ଅରିନ୍ଦମ ଦାସ(ସାମୀ)ଙ୍କ ଜନ୍ମମାଟି କେନ୍ଦୁଝର ଜିଲା ପାଟଣା ବ୍ଲକ ରାଜନଗର ପଞ୍ଚାୟତ ରାଇକଳା ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି। ସ୍ବର୍ଗତ ଯୁଗଳ କିଶୋର ଦାସଙ୍କ ସେ ଏକ ମାତ୍ର ପୁଅ ଥିଲେ। କକା ଧରଣୀଧର ଦାସଙ୍କ ସୂଚନା ଅନୁଯାୟୀ ଅରିିନ୍ଦମଙ୍କ ଅକାଳ ବିୟୋଗ ଖବର ଶୁଣି ତାଙ୍କ ମା’ କୁନି ଦାସ ସଂଜ୍ଞା ହୀନ ହୋଇ ପଡ଼ିବା ସହ କଟକ ବଡ଼ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ସ୍ତ୍ରୀ ସମୀକ୍ଷା ଦୁଃଖରେ ଭାଙ୍ଗି ପଡ଼ିଛନ୍ତି। ଅରିନ୍ଦମ୍ଙ୍କର ଅଢେଇବର୍ଷର ପୁତ୍ର ଅଛନ୍ତି।
କେନ୍ଦୁଝର ଡି.ଡି କଲେଜରୁ ବିକମ୍ ପାସ କରିବା ପରେ ଢେଙ୍କାନାଳ ସ୍ଥିତ ଆଇଆଇଏମ୍ସିରେ ଜର୍ନାଲିଜିମ୍ କରିଥିଲେ। ଦୈନିକ ଖବର କାଗଜ ‘ଧରିତ୍ରୀ’ରୁ ଖବରଦାତା ଭାବେ କ୍ୟାରିଅର ଆରମ୍ଭ କରିବା ପରେ ଇଲୋକଟ୍ରୋନିକ୍ସ ଗଣମାଧ୍ୟମରେ ଯୋଗ ଦେଇ ସାମ୍ବାଦିକତା କ୍ଷେତ୍ରରେ ନିଜ ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ। ଡିଡି କଲେଜର ପୂର୍ବତନ ଛାତ୍ର ୟୁନିୟନର ସଭାପତି ଅରିନ୍ଦମଙ୍କ ମର ଶରୀର ଗଁାରେ ପହଞ୍ଚିବା ପରେ ଅନ୍ତେଷ୍ଟି କ୍ରିୟା ନେଇ ଚୂଡ଼ାନ୍ତ ନିଷ୍ପତ୍ତିି ନିଆଯିବ ବୋଲି ତାଙ୍କ କକା ଧରଣୀଧର କହିଛନ୍ତି। ଅରବିନ୍ଦମଙ୍କ ଅକାଳ ବିୟୋଗରେ ପାଟଣା ବିଧାୟକ ଜଗନ୍ନାଥ ନାଏକ, ବ୍ଲକ ଅଧ୍ୟକ୍ଷ ବିଶ୍ୱନାଥ ନାଏକ, ଭାଜପା ଜିଲା ସଭାପତି ଅଂଶୁମାନ ସବୁଜ ମହାନ୍ତ ବର୍ମା ପ୍ରମୁଖ ଶୋକ ପ୍ରକାଶ କରିଛନ୍ତି।