ହରଭଙ୍ଗା,୬।୧୦(ଡି.ଏନ୍.ଏ.): ଜଣେ ନାବାଳିକାଙ୍କ ସହ ସମଲୀଙ୍ଗି ସମ୍ପର୍କ ରଖିଥିବା ଅଭିଯୋଗରେ ପୁରୁଣାକଟକ ଅଞ୍ଚଳର ଜଣେ ଯୁବତୀଙ୍କୁ କନ୍ଧମାଳ ଜିଲା ପୋଲିସ ଗିରଫ କରି କୋର୍ଟଚାଲାଣ କରିଥିବା ଜଣାପଡ଼ିଛି।
ସୂଚନା ଅନୁଯାୟୀ, ଥାନା ଅଞ୍ଚଳର ଜଣେ ଯୁବତୀ ନିଜ ଅଞ୍ଚଳର ଏକ ନାବାଳିକାଙ୍କ ସହ ସମଲିଙ୍ଗୀ ସମ୍ପର୍କରେ ଥିଲେ। ନାବାଳିକାର ପରିବାର ଏ କଥା ଜାଣିବା ପରେ ଝିଅକୁ ନେଇ କନ୍ଧମାଳ ଜିଲା ଖଜୁରୀପଡା ଥାନା ଅଞ୍ଚଳରେ ରହୁଥିବା ମାଉସୀ ଘରେ ଛାଡି ଆସିଥିଲେ । ହେଲେ ଖବରପାଇ ଯୁବତୀ ଜଣଙ୍କ ନାବାଳିକା ମାଉସୀ ଘରକୁ ଯାଇ କୌଶଳ କ୍ରମେ ତାଙ୍କୁ ସେଠାରୁ ଅପହରଣ କରି ନେଇଥିଲେ। ପରିବାର ଲୋକ ଏ ଘଟଣା ଜାଣିବା ପରେ ଯୁବତୀଙ୍କ ନାମରେ ଖଜୁରୀପଡା ଥାନାରେ ଏକ ଅପହରଣ ମାମଲା ରୁଜୁ କରିଥିଲେ। ଖଜୁରୀପଡା ଥାନା ପୋଲିସ ଏ ମାମଲାରେ ତଦନ୍ତ କରି ଗତ ରବିବାର ଦିନ କନ୍ଧମାଳ ଜିଲା ଚକାପାଦ ଅଞ୍ଚଳରୁ ନାବାଳିକାଙ୍କୁ ଉଦ୍ଧାର କରିବା ସହ ଯୁବତୀଙ୍କୁ ଗିରଫ କରିଥିଲା। ସୋମବାର ଯୁବତୀଙ୍କୁ କୋର୍ଟଚାଲାଣ କରାଯାଇଥିବା ଜଣାପଡିଛି l