ନୂଆଦିଲ୍ଲୀ,୮।୭: ପଡୋଶୀ ଦେଶ ପାକିସ୍ତାନ ସହ ଗୁଇନ୍ଦା ତଥ୍ୟ ଶେୟାର କରିବା ଅଭିଯୋଗରେ ଗିରଫ ହୋଇଥିବା ସାଇଣ୍ଟିଷ୍ଟ ପ୍ରଦିପ କୁରୁଲକରଙ୍କୁ ନେଇ ଚାର୍ଜସିଟରେ ବହୁ ତଥ୍ୟ ସାମ୍ନାକୁ ଆସିଛି। ଏଟିଏସ ଜୁନ ୩୦ରେ ଏକ ସ୍ବତନ୍ତ୍ର କୋର୍ଟଙ୍କୁ ଚାର୍ଜସିଟ ଦେଇଥିଲେ, ଯେଉଁଥିରେ କୁହାଯାଇଛି କି ପ୍ରଦୀପ କୁରୁଲକର ପାକିସ୍ତାନ ମହିଳା ଗୁଇନ୍ଦା ଅପରେଟରଙ୍କ ସହ ଭାରତର ମିଶାଇଲ, ଡ୍ରୋନ ଓ ରୋବୋଟିକ୍ସ କାର୍ଯ୍ୟକ୍ରମ ସମ୍ପର୍କିତ ତଥ୍ୟ ଶେୟାର କରିଛନ୍ତି।
ଚାର୍ଜସିଟ ଅନୁଯାୟୀ, ପାକିସ୍ତାନୀ ଏଜେଣ୍ଟ ସୋସିଆଲ ମିଡିଆରେ କୁରୁଲକରଙ୍କ ସହ ଯୋଡି ହେବା ପାଇଁ ବିଭିନ୍ନ ନାମରେ ନକଲି ଆକାଉଣ୍ଟ ଖୋଲିଥିଲେ। ଏହି ଦୁଇଟି ନାମ ଥିଲା ଜାରା ଦାସଗୁପ୍ତା ଏବଂ ଜୁହି ଆରୋରା। ଜାରା ଦାସଗୁପ୍ତାଙ୍କ ନାମରେ ଏକ ଆଇଡି ଖୋଲି ପ୍ରଦୀପଙ୍କ ସହ ଯୋଗଯୋଗ କରିଥିବା ପାକିସ୍ତାନ ଏଜେଣ୍ଟ୍ଟ କହିଥିଲେ କି ସେ ବ୍ରିଟେନର ଜଣେ ସଫ୍ଟୱେୟାର ଇଞ୍ଜିନିୟର। କେବଳ ଏତିକି ନୁହେଁ ଜାରା ପ୍ରଦିପଙ୍କ ସହ ବନ୍ଧୁତା କରି ବ୍ରାହ୍ମୋସ ଲଞ୍ଚର୍, ଅଗ୍ନି ମିଶାଇଲ ଲଞ୍ଚର୍ ଏବଂ ମିଲିଟାରୀ ବିଡିଂ ସିଷ୍ଟମ, ଡ୍ରୋନ, ୟୁସିଭି ସମେତ ଅନ୍ୟାନ୍ୟ ଜିନିଷ ବିଷୟରେ ସୂଚନା ମାଗିଥିଲେ। ଏହା ପରେ ପ୍ରଦୀପ ଏହି ସମସ୍ତ ତଥ୍ୟ ସଂଗ୍ରହ କରି ପାକିସ୍ତାନୀ ଏଜେଣ୍ଟକୁ ପଠାଇଥିଲେ।
ଏହା ବ୍ୟତୀତ ଚାର୍ଜସିଟରେ କୁହାଯାଇଛି ଯେ ପ୍ରଦିପ ଜାରାଙ୍କ ସାମ୍ନାରେ ନିଜ କାମ ବିଷୟରେ ଗର୍ବ କରୁଥିଲେ। ଏହି ୧୮୩୭ ପୃଷ୍ଠାର ଚାର୍ଜସିଟରେ ଅନ୍ତର୍ଭୁକ୍ତ ହୋଇଥିବା ଏକ ଚାଟରେ ପାକିସ୍ତାନୀ ଏଜେଣ୍ଟମାନେ ପଚାରିଥିଲେ ଯେ ଅଗ୍ନି-୬ ଲଞ୍ଚର ପରୀକ୍ଷା ସଫଳ ହୋଇଛି କି ନାହିଁ, ସେ ଉତ୍ତର ଦେଇଥଲେ ଯେ ଲଞ୍ଚର ମୋର ଡିଜାଇନ। ଏହା ଏକ ବଡ଼ ସଫଳତା ଥିଲା। କୁରୁଲକର ଏବଂ ପାକିସ୍ତାନୀ ଏଜେଣ୍ଟମାନଙ୍କ ମଧ୍ୟରେ ଏହି ଚାଟ ସେପ୍ଟେମ୍ବର ୨୦୨୨ରୁ ଫେବୃଆରୀ ୨୦୨୩ ମଧ୍ୟରେ ହୋଇଥିଲା।