ନୂଆଦିଲ୍ଲୀ,୩୦।୮: ଭାରତୀୟ ଟିମ୍ ରବିବାର ପାକିସ୍ତାନକୁ ହରାଇ ଏସିଆ କପ୍ ୨୦୨୨ରେ ନିଜର ଯାତ୍ରା ଆରମ୍ଭ କରିଛି। ଏବେ ଦଳ ଗ୍ରୁପ୍ ଏର ଦ୍ୱିତୀୟ ମୁକାବିଲା ହଂକଂ ସହ ବୁଧବାର ଖେଳିବ। ଟୁର୍ନାମେଣ୍ଟରେ ହଂକଂର ଏହା ପ୍ରଥମ ମ୍ୟାଚ୍। ରୋହିତ ଶର୍ମା ଭାରତ ମଙ୍ଗ ଧରିବାକୁ ଥିବା ବେଳେ ହଂକଂର ନେତୃତ୍ୱ ନେବେ ପାକିସ୍ତାନ ବଂଶୋଦ୍ଭବ ନିଜାକତ ଖାଁ। ଏବେ ସେ ମୁକାବିଲା ପୂର୍ବରୁ ଭାରତର ପୂର୍ବତନ ଅଧିନାୟକ ତଥା କ୍ରିକେଟର ବିରାଟ କୋହଲିଙ୍କୁ ନେଇ ବଡ଼ ବୟାନ ଦେଇଛନ୍ତି। କୋହଲିଙ୍କ ପ୍ରଶଂସା କରି ସେ ତାଙ୍କର ଜଣେ ବଡ଼ ପ୍ରଶଂସକ ବୋଲି କହିବା ସହ ଫର୍ମକୁ ଫେରନ୍ତୁ ବୋଲି ଆଶା ରଖିଥିବା ସେ କହିଛନ୍ତି।
ନିଜାକତ କହିଛନ୍ତି, ମୁଁ ବିରାଟ କୋହଲିଙ୍କ ବଡ଼ ପ୍ରଶଂସକ। ସେ ପାକିସ୍ତାନ ବିପକ୍ଷରେ ଭଲ ଖେଳିଛନ୍ତି। ବାସ୍ତବରେ ଚାହୁଁଛି ଯେ ସେ ଫର୍ମକୁ ଫେରି ଆସନ୍ତୁ ଏବଂ ବହୁତ ରନ୍ କରନ୍ତୁ। ସେହିଭଳି ଭାରତ ବିପକ୍ଷରେ ଖେଳିଥିବା ଚାରି ବର୍ଷ ପୂର୍ବ ମ୍ୟାଚ୍ ବିଷୟରେ କହିଛନ୍ତି, ଯେତେବେଳେ ୨୦୧୮ରେ ଏସିଆ କପ୍ରେ ଭାରତ ବିପକ୍ଷରେ ଆମେ ମୁକାବିଲା ଖେଳିଥିଲୁ, ସେତେବେଳେ ଆମେ ମାତ୍ର ୨୦ ରନ୍ରେ ପରାଜିତ ହୋଇଥିଲୁ। ଟି୨୦ ମ୍ୟାଚ୍ରେ କିଛି ବି ହୋଇପାରେ। କୌଣସି ବି ବୋଲର୍ ଭଲ ବୋଲିଂ କରିପାରେ। କୌଣସି ବ୍ୟାଟ୍ସମ୍ୟାନ୍ ଭଲ ରନ୍ କରିପାରନ୍ତି।
କହିରଖୁଛୁ, କୋହଲି ପାକିସ୍ତାନ ବିପକ୍ଷରେ ୩ନଂ ସ୍ଥାନରେ ମଇଦାନକୁ ଓହ୍ଲାଇଥିଲେ। ସେ ନିଜର ୧୦୦ତମ ଟି୨୦ ମ୍ୟାଚ୍ରେ ୩୪ ବଲ୍ରେ ୩୫ରନ୍ର ଇନିଂସ ଖେଳିଥିଲେ। ଏଥିରେ ୩ ଚୌକା ଏବଂ ୧ ଛକା ଥିଲା।