ଓ୍ବାଶିଂଟନ: ଆମେରିକୀୟ ମହାକାଶ ସଂସ୍ଥା ନାସାର ପର୍ସିଭରେନ୍ସ ରୋଭର ମଙ୍ଗଳ ଗ୍ରହର ଆଉ ଏକ ରହସ୍ୟ ଉପରୁ ପରଦା ହଟାଇଛି। ‘ବ୍ରାଇଟ୍ ଏଞ୍ଜେଲ’ ଅଞ୍ଚଳକୁ ନେଇ ପରୀକ୍ଷାନିରୀକ୍ଷା ଓ ବିରଳ ‘ଲିଓପାର୍ଡ ସ୍ପଟ୍ସ’ ଉପରେ ଅନୁଧ୍ୟାନ ପରେ ରୋଭର ମଙ୍ଗଳର ଦକ୍ଷିଣ ଭାଗରେ ଥିବା ନେରେଟ୍ଭା ଭିଲାଜ୍କୁ ଯାତ୍ରା କରିଥିଲା। ଲାଲ୍ଗ୍ରହର ‘ସର୍ପେଣ୍ଟାଇନ୍ ରାପିଡ୍ସ’ କୁହାଯାଉଥିବା ଅଞ୍ଚଳକୁ ରୋଭର ଆବିଷ୍କାର କରିଛି। ଏହି ମିଶନ ବେଳେ ରୋଭର ଶକ୍ତ ଲୋହିତ ଚଟାଣ ପାଇଥିଲା, ଯାହା ସମ୍ପର୍କରେ ଅଧିକ ଗବେଷଣା ପାଇଁ ନାସାର ଉତ୍ସୁକତା ବଢ଼ିବାରେ ଲାଗିଛି। ସର୍ପେଣ୍ଟାଇନ୍ ରାପିଡ୍ସ ବା ସର୍ପାକୃତିର ନଦୀ ସମୂହ ଥିବା ଅଞ୍ଚଳର ‘ଓ୍ବାଲେସ୍ ବୁଟ୍ଟେ’ ଲାଲ ଚଟାଣରେ ପର୍ସିଭରେନ୍ସ ଏକ ଖନନ ଉପକରଣ ବ୍ୟବହାର କରି ୫ ସେଣ୍ଟିମିଟର ପରିଧିର ପଥ ତିଆରି କରିଥିଲା। ସେଥିରୁ ଧଳା, କଳା ଓ ଅସ୍ପଷ୍ଟ ସବୁଜ ରଙ୍ଗର ଚମତ୍କାର କ୍ଷେତ୍ରକୁ ଆବିଷ୍କାର କରିଥିଲା।
ପୃଷ୍ଠରେ ମଧ୍ୟ ଏହିପରି ସବୁଜ ଚିହ୍ନ ପ୍ରାଚୀନ ଲୋହିତ ଶଯ୍ୟାଗୁଡ଼ିକରେ ଦେଖିବାକୁ ମିଳିଥାଏ ବୋଲି ନାସା କହିଛି। ପ୍ରାୟତଃ ଏପରି ସବୁଜ ଚିହ୍ନ ବିଭିନ୍ନ ରାସାୟନିକ ପ୍ରତିକ୍ରିୟାରୁ ସୃଷ୍ଟି ହୋଇଥାଏ। ଏହା ଲୌହଯୁକ୍ତ ଜଳ ଏବଂ ପଥରସ୍ତର ଦେଇ ଅକ୍ସିଡାଇଜ୍ଡ ଲୌହକୁ ସବୁଜ ରଙ୍ଗରେ ପରିଣତ କରିଥାଏ। ପୃଥିବୀରେ ଏହି ରଙ୍ଗ ପରିବର୍ତ୍ତନ ପ୍ରାକୃତିକ ପ୍ରତିକ୍ରିୟା ମାଧ୍ୟମରେ ହୋଇଥାଏ। ତେବେ ସର୍ପେଣ୍ଟାଇନ ରାପିଡ୍ସ ଏକ ଛୋଟ ଅଞ୍ଚଳ ହୋଇଥିବାରୁ ମଙ୍ଗଳ ଗ୍ରହର ବିସ୍ତୃତ ସଂରଞ୍ଚନା ବିଶ୍ଳେଷଣ ପାଇଁ ଡିଜାଇନ ହୋଇଥିବା ପର୍ସିଭରେନ୍ସ ରୋଭରର ଶେରଲକ୍ ଏବଂ ପିକ୍ସଲ ଉପକରଣ ଏହି ସବୁଜ ଦାଗ ଉପରେ ଠିକ୍ ଭାବରେ ସ୍ଥାନିତ ହୋଇପାରି ନ ଥିବା ନାସା ପକ୍ଷରୁ ସୂଚନା ଦିଆଯାଇଛି।