ବାଲେଶ୍ୱର,୨ା୧୨(ବାଞ୍ଛାନିଧି ଦେ): ବାଲେଶ୍ୱର ସହଦେଵଖୁଣ୍ଟା ଥାନା ଅଧୀନ ଫାଣ୍ଡି ଛକ ଓଭରବ୍ରିଜରେ ସୋମବାର ରାତିରେ ଲକ୍ଷ୍ମୀ ବସ ଦୁର୍ଘଟଣାଗ୍ରସ୍ତ ହୋଇଛି। ଭାରସାମ୍ୟ ହରାଇ ବ୍ରିଜର ସାଇଡ ୱାଲକୁ ଧକ୍କା ଦେଇ ବ୍ରିଜ ଉପରେ ଝୁଲି ରହିଛି।
ବସରେ କେହି ଯାତ୍ରୀ ନଥିବାରୁ ଏକ ବଡ଼ ଧରଣର ଅଘଟଣ ଟଳିଯାଇଛି। ସୂଚନା ଯେ, ଲକ୍ଷ୍ମୀ ବସ ନଂ ଓଡି-୦୧ଏଡବ୍ଲୁ ୨୬୩୨ ଟି ଚାନ୍ଦିପୁରରୁ ବାଲେଶ୍ୱର ଆସିଥିଲା। ଫକୀରମୋହନ ଗୋଲାଇରୁ ବସ ଷ୍ଟାଣ୍ଡ ଯାଉଥିବା ସମୟ ରେ ଫାଣ୍ଡି ଛକ ଓଭରବ୍ରିଜ ଉପରେ ଏହି ଦୁର୍ଘଟଣା ଘଟିଥିଲା । ଅଦାଲତ ପାର୍ଶ୍ଵକୁ ବସଟି ଦୀର୍ଘ ସମୟ ଧରି ଝୁଲିରହିଥିବା ଦେଖିବାକୁ ମିଳିଥିଲା। ବସ ରେ କେହି ଯାତ୍ରୀ ନଥିଲେ।
ବସର ଡ୍ରାଇଭର କୌଶଳ କ୍ରମେ ବସରୁ ବାହାରି ପଳାଇଥିବା ଦେଖିବାକୁ ମିଳିଥିଲା। ଘଟଣାସ୍ଥଳରେ ଉପ ଜିଲାପାଳ ପ୍ରଥମେଶ ଅରବିନ୍ଦ ରାଜେସିର୍କେ, ସହଦେଵଖୁଣ୍ଟା ଥାନା ଆଇଆଇସି ଜୟନ୍ତ ବେହେରା, ଏମଭିଆଇ, ଆରଟିଓଙ୍କ ସମେତ ଅଗ୍ନିଶମ ବାହିନୀ ପହଞ୍ଚି ଝୁଲନ୍ତା ବସଟିକୁ ବ୍ରିଜ ଉପରକୁ ଆଣିବା ଦିଗରେ ପଦକ୍ଷେପ ଗ୍ରହଣ କରିଥିଲେ। ତେବେ ପ୍ରଶାସନ ପକ୍ଷରୁ ବ୍ରିଜ ଉପରେ ଯାତାୟତ ବନ୍ଦ ରଖାଯାଇଥିଲା। ଟ୍ରାଫିକ ନିୟନ୍ତ୍ରଣ ପାଇଁ ବ୍ୟାପକ ପୋଲିସ ମୁତୟନ କରାଯାଇଥିଲା। ଶୋଭାରାମପୁର ବ୍ରିଜ ଦେଇ ଯାନବାହନ ଚଳାଚଳ ଚାଲୁରହିଥିଲା।