ଚିତ୍ରକୋଣ୍ଡା,୨।୧୨(କ୍ଷୀରୋଦ କୁମାର ବେହେରା): ମାଲ୍ୟବନ୍ତ ମହୋତ୍ସବ ଅବସରରେ ମାଲକାନଗିରି ଜିଲା ପ୍ରଶାସନ ତଥା ଚିତ୍ରକୋଣ୍ଡା ବ୍ଲକ ପ୍ରଶାସନ ଉଦ୍ୟମରେ ଚିତ୍ରକୋଣ୍ଡା ଏସ୍ଏସ୍ଡି ବାଳିକା ଉଚ୍ଚ ମାଧ୍ୟମିକ ବିଦ୍ୟାଳୟ ପଡ଼ିଆଠାରେ ଘୋଡ଼ାଦୌଡ଼ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ପ୍ରତିଯୋଗିତାରେ ସ୍ବାଭିମାନ ଅଞ୍ଚଳର ୩ଟି ପଞ୍ଚାୟତ ଯଥା ପାପରମେଟେଲା, ରାଲେଗାଡା ଓ ଧୂଳିପୁଟ ପଞ୍ଚାୟତର ୨୦ଟି ଘୋଡ଼ା ସହ ଚାଳକ ଭାଗ ନେଇଥିଲେ।
ମୁଖ୍ୟ ଅତିଥିଭାବେ ଚିତ୍ରକୋଣ୍ଡା ବ୍ଲକ ଅଧ୍ୟକ୍ଷା ସୁଶ୍ରୀ ରାଜେଶ୍ୱରୀ ଖିଲ, ଚିତ୍ରକୋଣ୍ଡା ବିଡିଓ ତନ୍ମୟ ପାତ୍ର, ଚିତ୍ରକୋଣ୍ଡା ତହସିଲଦାର ନଟବର ଗରଡ଼ା ପ୍ରମୁଖ ପତାକା ଦେଖାଇ ପ୍ରତିଯୋଗିତାର ଶୁଭାରମ୍ଭ କରିଥିଲେ। ପ୍ରତିଯୋଗିତାରେ ପାପରମେଟେଲା ପଞ୍ଚାୟତ ଦୁଧପାଲି ଗ୍ରାମର ରାଜୁ ଖିଲ ପ୍ରଥମ ସ୍ଥାନ ଅଧିକାରୀ କରିଥିବା ବେଳେ ସେହି ଗ୍ରାମର ରୁକମନି ଖରା ଦ୍ୱିତୀୟ ସ୍ଥାନ ଅଧିକାର କରିଥିଲେ। ଦୁଧପାଲି ଗ୍ରାମର ପୁରୁଷତି ସିନ୍ଧେରୀ ତୃତୀୟ ସ୍ଥାନ ଅଧିକାର କରିଥିଲେ। ମାଲ୍ୟବନ୍ତ ମହୋତ୍ସବରେ ସ୍ବାଭିମାନ ଅଞ୍ଚଳ ଘୋଡ଼ାଦୌଡ଼ ପ୍ରତିଯୋଗିତାକୁ ନେଇ ଅଞ୍ଚଳବାସୀ ବେଶ୍ ଉତ୍ସାହିତ ହୋଇଥିଲେ।