ନୂଆଦିଲ୍ଲୀ, ୨୦।୭(ଆଇଏଏନ୍ଏସ୍): ହସ୍ପିଟାଲଗୁଡ଼ିକ ବୃହତ ଶିଳ୍ପରେ ପରିଣତ ହୋଇଛନ୍ତି। ଜନସାଧାରଣଙ୍କ ବିପତ୍ତିରୁ ଫାଇଦା ଉଠାଇ ସେମାନେ ବଡ଼ ହୋଇଛନ୍ତି। ଜୀବନ ବଦଳରେ ସେଗୁଡ଼ିକୁ ସମୃଦ୍ଧ ହେବାକୁ ଦିଆଯାଇପାରିବ ନାହିଁ। ଏଭଳି ହସ୍ପିଟାଲଗୁଡ଼ିକୁ ବନ୍ଦ କରିଦେବା ଭଲ ବୋଲି ସର୍ବୋଚ୍ଚ ଅଦାଲତ ଟିପ୍ପଣି ଦେଇଛନ୍ତି। କ୍ଷୁଦ୍ର ବାସୋପଯୋଗୀ ବିଲ୍ଡିଂରେ ଘରୋଇ ହସ୍ପିଟାଲକୁ ଅନୁମତି ଦେବା ପରିବର୍ତ୍ତେ ରାଜ୍ୟ ସରକାରଗୁଡ଼ିକ ଉନ୍ନତ ହସ୍ପିଟାଲ ଯୋଗାଇଦେଇ ପାରିବେ ବୋଲି ଜଷ୍ଟିସ ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଏମ୍.ଆର୍. ଶାହାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି। ଅଟ୍ଟାଳିକା ବ୍ୟବହାର ଅନୁମତି ସମ୍ପର୍କରେ ଗୁଜରାଟ ସରକାର ହସ୍ପିଟାଲଗୁଡ଼ିକୁ ଅଧିକ ସମୟ ଦେଇଥିବାରୁ ଖଣ୍ଡପୀଠ ଏହାକୁ ଭର୍ତ୍ସନା କରିଛନ୍ତି। ହସ୍ପିଟାଲରେ ନିଆଁ ଲାଗି ଲୋକ ମରୁଛନ୍ତି। ଜଣେ ରୋଗୀ କୋଭିଡ୍ରୁ ଆରୋଗ୍ୟ ହେବା ପରେ ହସ୍ପିଟାଲ ଛାଡ଼ିବା ପୂର୍ବରୁ ନିଆଁରେ ପୋଡ଼ିହୋଇ ପ୍ରାଣ ହରାଇଲେ। ଦୁଇଜଣ ନର୍ସ ମଧ୍ୟ ଜିଅନ୍ତା ଜଳିଗଲେ। ଏଭଳି ଦୁଃଖଦ ଘଟଣା ଆମ ଆଖି ସାମନାରେ ଘଟିଚାଲିଥିବାବେଳେ ହସ୍ପିଟାଲଗୁଡ଼ିକୁ ଅଧିକ ସମୟ ଦିଆଯାଉଥିବାରୁ ଖଣ୍ଡପୀଠ କ୍ଷୋଭ ପ୍ରକାଶ କରିଛନ୍ତି।