କଟକ ଅଫିସ,୩୦ା୩:ଭୁବନେଶ୍ୱରରେ ଅନୁଷ୍ଠିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେବା ପାଇଁ ଓଡ଼ିଶା ଆସିଛନ୍ତି ବଲିଉଡ ଅଭିନେତ୍ରୀ ଜୟାପ୍ରଦା। ନବରାତ୍ର ଅବସରରେ ବୁଧବାର ରାତି ପ୍ରାୟ ୮ଟା ୪୫ରେ ସେ କଟକର ଅଧିଷ୍ଠାତ୍ରୀ ଦେବୀ ମା’ କଟକଚଣ୍ଡୀଙ୍କ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ। ଏଥିସହ ସେ ସମସ୍ତଙ୍କୁ ନବରାତ୍ରର ଶୁଭେଚ୍ଛା ଜଣେଇଛନ୍ତି। ଏହି ଅବସରରେ ମନ୍ଦିର ପରିଚାଳନା କମିଟି ପକ୍ଷରୁ ତାଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏ ନେଇ ସେ କହିଛନ୍ତି, ଦୀର୍ଘବର୍ଷ ପରେ ଓଡ଼ିଶା ଆସି ବହୁତ ଭଲ ଲାଗୁଛି। ପୂର୍ବରୁ ୩ ଥର ଓଡ଼ିଶା ଆସିଛି। ଯେତେବେଳେ ବି ଆସିଛି ଏଠାକାର ଲୋକଙ୍କ ଭଲପାଇବା ମିଳିଛି। ବିଶେଷକରି ଓଡ଼ିଶାବାସୀଙ୍କ ଆତିଥ୍ୟରେ ସ୍ବତନ୍ତ୍ରତା ରହିଛି। କଟକଚଣ୍ଡୀ ମନ୍ଦିରର ସ୍ବତନ୍ତ୍ର ମାନ୍ୟତା ରହିଛି ବୋଲି ଶୁଣିଥିଲି। ନବରାତ୍ର ଅବସରରେ ଭୁବନେଶ୍ୱର ଆସିଥିବାରୁ ଏଠାକୁ ଆସି ମା’ଙ୍କ ଆଶୀର୍ବାଦ ନେଇଛି।