ବଡ଼ବିଲ,୧୫ା୭(ସ୍ବ.ପ୍ର.)- କେନ୍ଦୁଝର ଜିଲା ବଡ଼ବିଲ ମ୍ରିନାଲ କଲୋନୀସ୍ଥିତ ହୋଟେଲ ନୀଳକଣ୍ଠରେ ମଙ୍ଗଳବାର ବିଳମ୍ବିତ ରାତିରେ ପୋଲିସ ଚଢ଼ାଉ କରି ହୋଟେଲ ମାଲିକଙ୍କ ସମେତ ୧୦ ଜୁଆଡ଼ିଙ୍କୁ ଗିରଫ କରିଛି। ବେଆଇନ ଜୁଆଖେଳ ଓ କୋଭିଡ୍-୧୯ ନିୟମ ଉଲ୍ଲଂଘନ ଅଭିଯୋଗରେ ଉକ୍ତ ହୋଟେଲକୁ ସିଲ୍ କରାଯାଇଛି। ଗିରଫ ଅଭିଯୁକ୍ତମାନେ ହେଲେ ହୋଟେଲ ମାଲିକ ମିରୁଦ୍ଦିନ ଶେଖର, ସୁନୀଲ ମହାନ୍ତ, ଆକାଶରାଜ କର୍ମକାର, ବିଜୟ ସ୍ବାଇଁ, ମଙ୍ଗଳ ସାହୁ, ସଞ୍ଜୟ ଚୌଧୁରୀ, ଚକ୍ର ଗୋପ, କରଣ ସର୍ଣ୍ଣକାର, କିଶୋର ବାହାଦୂର ଏବଂ ଏମଡି ସିକନ୍ଦର। ସେମାନଙ୍କଠାରୁ ନଗଦ ୪୮ହଜାର ୯ଶହ ଟଙ୍କା, ୮ ମୋବାଇଲ୍ ଫୋନ୍ ଓ ୮ ସେଟ ତାସ ଜବତ ହୋଇଛି।
ପୋଲିସ ସୂଚନା ଅନୁଯାୟୀ, କରୋନାର ଗୋଷ୍ଠୀ ସଂକ୍ରମଣ ବୃଦ୍ଧିକୁ ଆଖି ଆଗରେ ରଖି ବଡ଼ବିଲ୍ ପୋରାଞ୍ଚଳକୁ ସମ୍ପୂର୍ଣ୍ଣ ଶଟଡାଉନ ଘୋଷଣା କରାଯାଇଛି। ମାତ୍ର ପ୍ରଶାସନର କଟକଣା ନିୟମକୁ ଉଲ୍ଲଂଘନ କରିବା ସହ ବଡ଼ବିଲ ମ୍ରିନାଲ କଲୋନୀସ୍ଥିତ ହୋଟେଲ ନୀଳକଣ୍ଠରେ ଜୁଆ ଖେଳ ଚାଲିଥିଲା। ଖବରପାଇ ପୋଲିସ ସେଠାରେ ଚଢ଼ାଉ କରି ୧୦ ଜୁଆଡ଼ିଙ୍କୁ ଗିରଫ କରିଥିଲା। ଏନେଇ ବଡ଼ବିଲ ଥାନାରେ ଏକ ମାମଲା(ନଂ.୯୩/୨୦୨୦) ରୁଜୁ ହୋଇଛି। ଅଭିଯୁକ୍ତମାନଙ୍କର କରୋନା ପରୀକ୍ଷା ନିମନ୍ତେ ସ୍ବାବ ସଂଗ୍ରହ କରାଯାଇ ସେମାନଙ୍କୁ ସରକାରୀ ସଙ୍ଗରୋଧ କେନ୍ଦ୍ରକୁ ପଠାଇ ଦିଆଯାଇଥିବା ପୋଲିସ ସୂଚନା ଦେଇଛି।