କେନ୍ଦୁଝର, ୭।୯ (ସ୍ବ.ପ୍ର): କେନ୍ଦୁଝର ଜିଲାରେ ଦିନକୁ ଦିନ ବୃଦ୍ଧିପାଉଛି ହୋଟେଲ, ଲଜ୍ ଶିଳ୍ପ। କେନ୍ଦୁଝର ସହର ସମେତ ଜିଲାର ବିଭିନ୍ନ ସହରରେ ବଡ଼ ବଡ଼ ହୋଟେଲ ଏବଂ ଲଜ୍ ଖୋଲୁଛି। କିନ୍ତୁ ଏକାଧିକ ହୋଟେଲ ଓ ଲଜ୍ ବିନା ଅନୁମତିରେ ଏବଂ ନିୟମ ଉଲ୍ଲଂଘନ କରି ଚାଲୁଥିତ୍ବା ଅଭିଯୋଗ ହେଉଛି। ହୋଟେଲ ଓ ଲଜ୍ ଚଳାଇବା ପାଇଁ ଅନୁମତି ପତ୍ର (କନସେଣ୍ଟ ଟୁ ଅପରେଟ) ପ୍ରଦୂଷଣ ବୋର୍ଡ ନିକଟରୁ ଆଣିବାର ନିୟମ ଥିବା ବେଳେ ଜିଲାରେ ମାତ୍ର ୧୫ଟି ହୋଟେଲ ଓ ଲଜ୍ ଏହି ଅନୁମତି ପତ୍ର ନେଇ ଚଳାଉଥିବା ଜଣାପଡ଼ିଛି। ୧୦୦ରୁ ଊର୍ଦ୍ଧ୍ୱ ହୋଟେଲ ଓ ଲଜ୍ ନିକଟରେ ଅନୁମତି ପତ୍ର ନାହିଁ। ହୋଟେଲ ଏବଂ ଲଜ୍ର ରୁମ, କନଫରେନ୍ସ ହଲ, ଡାଇନିଂ ହଲ, ବସିବା କ୍ଷମତା ଆଧାରରେ ଅନୁମତି ପତ୍ର ଦିଆଯାଇଥାଏ। କେତେକ ହୋଟେଲ ୫ ବର୍ଷ ପାଇଁ ସିଟିଓ ନେଇଥିବା ବେଳେ ଆଉ କିଛି ହୋଟେଲ ଏବଂ ଲଜ୍କୁ ୧୦ ବର୍ଷ ପାଇଁ ସିଟିଓ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ଦିଆଯାଇଛି, ଯାହାକି ସନ୍ଦେହଜନକ। ହୋଟେଲ ଓ ଲଜ୍ର ଭିତ୍ତିଭୂମି ତଦାରଖ କରାନଯାଇ କେମିତି ୫ବର୍ଷ ଓ ୧୦ବର୍ଷ ପାଇଁ ସିଟିଓ ଦିଆଯାଉଛି ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସେହିପରି ହୋଟେଲ ଏବଂ ଲଜ୍ର ବର୍ଜ୍ୟଜଳ ବିଶୋଧନ କରାନଯାଇ ସିଧାସଳଖ ଡ୍ରେନରେ ଛଡ଼ା ଯାଉଥିବାରୁ ଜଳ ପ୍ରଦୂଷଣ ବଢୁଛି। ଏପରିକି କିଛି ହୋଟେଲ ଏବଂ ଲଜ୍ ପାଇଖାନା ଟାଙ୍କି ପାଣି ମଧ୍ୟ ଟ୍ରିଟମେଣ୍ଟ ନ କରି ଡ୍ରେନରେ ଛାଡୁଥିବାରୁ ପୂତିଗନ୍ଧମୟ ପରିବେଶ ସୃଷ୍ଟି ହେଉଛି। ହୋଟେଲ ଏବଂ ଲଜ୍ର ବର୍ଜ୍ୟଜଳ ଇଟିପି ମାଧ୍ୟମରେ ଟ୍ରିଟମେଣ୍ଟ ହେବା ପରେ ଡ୍ରେନରେ ଛଡାଯିବାର ନିୟମ ରହିଛି। ମାତ୍ର ତାହା କରାନଯାଇ ସିଧାସଳଖ ଡ୍ରେନରେ ଛଡ଼ାଯାଉଛି। ତେଣୁ ଏହିସବୁ ହୋଟେଲ ଓ ଲଜ୍ଗୁଡ଼ିକରେ ସଠିକ୍ ଯାଞ୍ଚ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୁଦ୍ଧଜୀବୀ ମହଲରେ ଦାବି ହେଉଛି। ସେହିପରି ପାର୍କିଂ ବ୍ୟବସ୍ଥା ନଥାଇ ଏବଂ ଅଗ୍ନି ନିର୍ବାପକ ସୁରକ୍ଷା ବ୍ୟବସ୍ଥା ନଥାଇ ଏହିସବୁ ହୋଟେଲ, ଲଜଗୁଡିକୁ କିପରି ଅନୁମତି ଦିଆଯାଇଛି ସେସବୁର ଜିଲାପାଳ ତଦନ୍ତ କରିବାକୁ ସହରବାସୀ ଦାବି କରିଛନ୍ତି ା ଏନେଇ ଓଡିଶା ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଞ୍ଚଳିକ ଅଧିକାରୀ ପ୍ରଶାନ୍ତ କରଙ୍କୁ ପଚାରିବାରୁ ସେ କହିଛନ୍ତି, ହୋଟେଲ ଲଜ୍ଗୁଡ଼ିକୁ ଚିହ୍ନଟ କରାଯାଇ ପ୍ରଦୂଷଣର ମାତ୍ରା ଅନୁସାରେ ତିନି ପ୍ରକାର (ରେଡ, ଅରେଞ୍ଜ, ଗ୍ରୀନ) ଅନୁମତି ପତ୍ର ଦିଆଯାଇଥାଏ ା ତେବେ କେଉଁ ଆଧାରରେ ପ୍ରମାଣପତ୍ର ଦିଆଯାଇଛି ସେନେଇ ଯାଞ୍ଚ କରି ପଦକ୍ଷେପ ନେବେ ା