ମେକ୍ସିକୋ ସିଟିର ୭୩ ବର୍ଷୀୟା କାଟିଆ ଲାତୋଫ ଡି ଆରିଦାଙ୍କ ଆପାର୍ଟମେଣ୍ଟ ଏବେ ହମିଂ ବାର୍ଡ ହସ୍ପିଟାଲ ବା ହମିଂବାର୍ଡ ଅଭୟାରଣ୍ୟ ଭାବେ ପରିଚିତ। ଆଉ କାଟିଆ ହମିଂବାର୍ଡଙ୍କ କେୟାର ଟେକର୍ ଭାବେ ପରିଚିତ ହେଉଛନ୍ତି। କାରଣ ତାଙ୍କ ଘର ଭିତରେ ବିନା ଡ଼ର ଭୟରେ ଘୁରି ବୁଲନ୍ତି ଅନେକ ହମିଂବାର୍ଡ। ତେବେ ଏସବୁ ହମିଂବାର୍ଡ ଦିନେ ଥିଲେ ଅସୁସ୍ଥ। କାଟିଆ ସେମାନଙ୍କର ଯତ୍ନ ନେଇ ସେମାନଙ୍କୁ ଦେଇଛନ୍ତି ନୂଆ ଜୀବନ। ୨୦୧୧ରୁ କାଟିଆ ହମିଂବାର୍ଡଙ୍କ ଯତ୍ନ ନେବା କାମ ଆରମ୍ଭ କରିଛନ୍ତି। ସେତେବେଳେ ସେ ସ୍ବାମୀଙ୍କୁ ହରାଇଥାନ୍ତି। ଆଉ ଏକୁଟିଆ ନିଜ କ୍ୟାନ୍ସର ରୋଗ ସହ ଲଢେଇ କରୁଥାନ୍ତି। ଫଳରେ କାଟିଆ ମାନସିକ ଅବସାଦଗ୍ରସ୍ତ ହୋଇ ଯାଇଥାନ୍ତି। ହେଲେ ଥରେ ସେ ରାସ୍ତାରେ ଗଲାବେଳେ ଆଖିରେ ଆଘାତ ଲାଗିଥିବା ଏକ ହମିଂବାର୍ଡ ପାଇଲେ। ଆଉ ତାକୁ ଘରକୁ ନେଇ ଆସିଲେ। ସେମାନଙ୍କର ଯତ୍ନ କିଭଳି ନିଆଯିବ ଜାଣି ନ ଥିବାରୁ ଜଣେ ସାଙ୍ଗଙ୍କ ସାହାଯ୍ୟ ଲୋଡିଥିଲେ। ଆଉ ଅନେକ କଷ୍ଟପରେ ହମିଂ ବାର୍ଡଟି ନୂଆ ଜୀବନ ଫେରି ପାଇଥିଲା। ଯାହା କାଟିଆଙ୍କୁ ମାନସିକ ଶାନ୍ତି ପ୍ରଦାନ କରିଥିଲା। ଏହାପରେ କିଛି ଲୋକ କ୍ଷତବିକ୍ଷତ ହମିଂବାର୍ଡ ଆଣି ତାଙ୍କୁ ଦେଲେ। କାଟିଆ ସେଇ କୁନି ଚଢେଇଙ୍କର ବି ଯତ୍ନ ନେଇ ସେମାନଙ୍କୁ ସୁସ୍ଥ କଲେ। ଆଉ ସୁସ୍ଥ ହେବାପରେ ଚଢେଇଗୁଡିକ ତାଙ୍କ ଘରସାରା ଘୁରି ବୁଲିଲେ। ପରେ ସେ ତାଙ୍କୁ ଜଙ୍ଗଲରେ ଛାଡି ଦିଅନ୍ତି। ହେଲେ ପୁଣିଥରେ ସେମାନେ ଘରକୁ ଚାଲି ଆସନ୍ତି। ଆଉ ତାଙ୍କ ଘରେ ଆରାମରେ ଉଡି ବୁଲନ୍ତି। ଯାହାକି ତାଙ୍କ ମାନସିକ ଅବସାଦ ସହ ରୋଗରେ ବି ଅନେକ ଉପଶମ ପ୍ରଦାନ କଲା। ସେବେଠାରୁ ଆଜିଯାଏ ସେ ଅନେକ ହମିଂବାର୍ଡଙ୍କ ଜୀବନଦାତ୍ରୀ ପାଲଟିଛନ୍ତି।