କୋକସରା,୨୩ା୭(ଡି.ଏନ୍.ଏ.): ରାଜ୍ୟ ସରକାର ଗରିବ ସୀମାରେଖା ତଳେ ଥିବା ଲୋକଙ୍କ ପାଇଁ ଅନେକ ଯୋଜନା କରିଛନ୍ତି। ହେଲେ କିଛି ନିର୍ବାଚିତ ଜନ ପ୍ରତିନିଧି ଓ ପଞ୍ଚାୟତ କର୍ମଚାରୀଙ୍କ ମୁନାଫାଖୋର ମନୋବୃତ୍ତି ଯୋଗୁ ଯୋଗ୍ୟ ହିତାଧିକାରୀମାନେ ସମସ୍ତ ଯୋଜନାରୁ ବାଦ୍ ପଡୁଛନ୍ତି। ଏମିତି ଦୁଇଟି ଚିତ୍ର ଦେଖିବାକୁ ମିଳିଛି କୋକସରା ବ୍ଲକ ଗମ୍ଭାରୀଗୁଡ଼ା ଓ ମୋଟେର ପଞ୍ଚାୟତରେ। ଲଗାଣ ବର୍ଷା ଯୋଗୁ ମୋଟେର ଗ୍ରାମର ବୃଦ୍ଧା କୁମାରୀ ପୂଝାରୀ(୬୦) ଙ୍କ ଘର ସମ୍ପୂର୍ଣ୍ଣ ରୂପେ ଭାଙ୍ଗି ଯାଇଥିବା ବେଳେ ଅନୁରୂପ ଭାବେ ସିର୍ଲିଗୁଡ଼ା ଗ୍ରାମର ଦନାର ଦୁର୍ଗା (୫୩)ଙ୍କ ଘରର କାନ୍ଥ ଭୁଶୁଡ଼ି ପଡ଼ିଛି। ଫଳରେ ଦନାର ତାଙ୍କ ସ୍ତ୍ରୀ ଯମୁନା ଦୁର୍ଗା, ବୋହୂ ଭୂମିଲତା, ପୁଅ ଗୋପବନ୍ଧୁ ଓ ସାନପୁଅ ଚମ୍ପେଶ୍ୱର ଅତି ଦୟନୀୟ ଅବସ୍ଥାରେ ଲଗାଣ ବର୍ଷାରେ ରହୁଛନ୍ତି। ବୃଦ୍ଧା କୁମାରୀ ପୂଝାରୀଙ୍କ ଘର ଭାଙ୍ଗିବା ପରେ କୌଣସି ସରକାରୀ ସହାୟତା ମିଳିନାହିଁ । ବୃଦ୍ଧା ଜଣକ ଏକୁଟିଆ ରହୁଥିବା ବେଳେ ତାଙ୍କର କେହି ନାହାନ୍ତି। ଏନେଇ ମୋଟେର ସରପଞ୍ଚ ବାସନ୍ତୀ ନାଏକଙ୍କ ପ୍ରତିକ୍ରିୟା ନେବାରୁ ଆବାସ ଯୋଜନା ଲିଷ୍ଟରେ ବୃଦ୍ଧାଙ୍କ ନାମ ରହିଛି। ଆବାସ ଯୋଜନାରେ ଘର ଆସିଲେ ତାଙ୍କୁ ଦିଆଯିବ। ଅନ୍ୟପକ୍ଷରେ ରାଜସ୍ବ ନିରୀକ୍ଷକଙ୍କ ମୋବାଇଲ ସ୍ବିଚ୍ଅଫ୍ ଥିବାରୁ ଯୋଗାଯୋଗ ହୋଇ ପାରୁନାହିଁ। ଅନ୍ୟପଟେ ସିର୍ଲିଗୁଡ଼ା ଗାଁର ଦନାର ଦୁର୍ଗାଙ୍କ ଘର ଭାଙ୍ଗିବା ରିପୋର୍ଟ ପାଇବା ପରେ କୋକସରା ରାଜସ୍ବ ନିରୀକ୍ଷିକା ଝାନ୍ସି ରାଣୀ ଦିଶାରୀ ସ୍ଥିତି ଅନୁଧ୍ୟାନ କରି ପଲିଥିନ୍ ଖଣ୍ଡେ ଦେଇଛନ୍ତି।