ତେହରାନ,୪ା୧୨: ଇରାନୀୟ ରକ୍ କ୍ଲାଇମର ଏଲ୍ନାଜ୍ ରେକାବିଙ୍କ ପୈତୃକ ଘରକୁ ସରକାର ଭାଙ୍ଗିଦେଇଛନ୍ତି। ତାଙ୍କ ଦୋଷ ହେଲା ଗତ ଅକ୍ଟୋବରରେ ଦକ୍ଷିଣ କୋରିଆରେ ଆୟୋଜିତ ଏକ ଇଭେଣ୍ଟରେ ସେ ବିନା ହିଜାବରେ ଭାଗନେଇଥିଲେ। ଉଚ୍ଛେଦକାରୀମାନେ ବୁଲ୍ଡୋଜର ଲଗାଇ ୩୯ ବର୍ଗ ମିଟର ଘରକୁ ଧ୍ୱସ୍ତବିଧ୍ୱସ୍ତ କରିବା ସହ ସେ ହାସଲ କରିଥିବା ଅନେକ ପଦକ ମଧ୍ୟ ମାଟିରେ ମିଶିଯାଇଛି। ପୋଲିସର ଏହି କାର୍ଯ୍ୟାନୁଷ୍ଠାନ ପରେ ଏଲ୍ନାଜ୍ ଇରାନର ବିକ୍ଷୋଭକାରୀମାନଙ୍କ ପାଇଁ ପ୍ରତୀକ ପାଲଟିଯାଇଛନ୍ତି। ତେବେ ଏଲ୍ନାଜ୍ ତେହରାନକୁ ଫେରିଲେ ତାଙ୍କ ସୁରକ୍ଷା ବିପନ୍ନ ହୋଇପାରେ ବୋଲି ମାନବାଧିକାର ସଙ୍ଗଠନଗୁଡ଼ିକ ଆଶଙ୍କା ବ୍ୟକ୍ତ କରିଛନ୍ତି।