ପୁରୁଷୋତ୍ତମପୁର,୨୦ା୧(ଡି.ଏନ.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ଏନ୍ଏସି ନିର୍ବାହୀ ଅଧିକାରୀ ସୌମ୍ୟରଞ୍ଜନ ମିଶ୍ରଙ୍କ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି ସହରବାସୀ। ନିର୍ବାହୀ ଅଧିକାରୀ ଆକ୍ରୋଶମୂଳକ ମନୋଭାବ ରଖି ଏକ ନିରୀହ ଗରିବ ଶ୍ରେଣୀର ପରିବାର ଉପରେ ଦବଙ୍ଗଗିରି ଦେଖାଇଥିବା ଅଭିଯୋଗ କରିଛନ୍ତି। ନିର୍ବାହୀ ଅଧିକାରୀଙ୍କ ସମେତ ୩ ଜଣଙ୍କ ନାମରେ ପୋଲିସରେ ଅଭିଯୋଗ ହୋଇଛି। ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଇଆଇସି ପ୍ରିୟୁଷ ରଞ୍ଜନ ଛୋଟରାୟ କହିଛନ୍ତି।
ପୁରୁଷୋତ୍ତମପୁର ସହରରେ ପେଟ ପୋଷିବା ଲାଗି ରାସ୍ତାକଡ଼ରେ ଶତାଧିକ ସଂଖ୍ୟାରେ ଉଠା ଠେଲାଗାଡି ପସରା ଖୋଲି ବ୍ୟବସାୟ କରୁଛନ୍ତି। ସେମାନଙ୍କ ମଧ୍ୟରୁ ରାଧାକାନ୍ତ ସାହିର ପ୍ରଶନ୍ନ କୁମାର ଶତପଥୀ ରହିଛନ୍ତି। ନିର୍ବାହୀ ଅଧିକାରୀ ସୌମ୍ୟରଞ୍ଜନ ମିଶ୍ରଙ୍କ ସମେତ ସହ ସ୍ମୃତିରଞ୍ଜନ ଷଡଙ୍ଗୀ, ସୁରଜ ଦାଶ ତିନିଜଣ ପ୍ରଶନ୍ନଙ୍କ ଘର ନିକଟକୁ ଆସିଥିଲେ। ଘରେ ଉପସ୍ଥିତ ଥିବା ତାଙ୍କର ବୃଦ୍ଧା ପତ୍ନୀ ସୁପ୍ରଭା ଶତପଥୀଙ୍କୁ ଅସଦ ବ୍ୟବହାର ଦେଖାଇ ଜେସିବି ଲଗାଇ ପ୍ରଧାନମନ୍ତ୍ରୀ ଆବାସ ଘରକୁ ଭାଙ୍ଗି ଧୁଳିସାତ କରିଦେବା ସହ ବିଭିନ୍ନ ଧମକମାନ ଦେଇ ଘର କାନ୍ଥରେ ଏକ ନୋଟିସ ମାରିଥିଲେ। ସେଠାରୁ ଚାଲିଯାଇ କଲେଜ ଛକ ନିକଟରେ ତାଙ୍କ ସ୍ବାମୀ କରିଥିବା ଉଠା ଠେଲାଗାଡ଼ି ପସରାକୁ ଜେସିବିରେ ଭାଙ୍ଗି ଚୁରମାର କରିଦେଇଥିଲେ। ସେଠାରୁ ଆସି ରାଧାକାନ୍ତସାହି ନିକଟରେ ତାଙ୍କ ପୁଅ ସନ୍ତୋଷ ବ୍ୟବସାୟ କରୁଥିବା ଠେଲା ଗାଡି ପସରାକୁ ମଧ୍ୟ ଭାଙ୍ଗି ଦେଇଥିଲେ। ମାତ୍ର ଅନ୍ୟମାନଙ୍କ ଦୋକାନ କ୍ଷତି କରିନଥିଲେ। ଏ ନେଇ ପ୍ରସନ୍ନଙ୍କ ପତ୍ନୀ ସୁପ୍ରଭା ପୁରୁଷୋତ୍ତମପୁର ଥାନାରେ ନିର୍ବାହୀ ଅଧିକାରୀଙ୍କ ସମେତ ସ୍ମୃତି ଓ ସୁରଜଙ୍କ ବିରୋଧରେ ଲିଖିତ ଅଭିଯୋଗ କରିବା ସହ ଆଇନଗତ ସହାୟତା ଲାଗି ପ୍ରଥମଶ୍ରେଣୀ ବିଚାର ବିଭାଗୀୟ ଅଦାଲତର ତାଲୁକା ଆଇନସେବା କମିଟିର ଅଧ୍ୟକ୍ଷା ତଥା ବିଚାରପତି ପୂଜା ପ୍ରିୟଦର୍ଶନୀ ପତିଙ୍କ ନିକଟରେ କମିଟିର ନିଯୁକ୍ତିପ୍ରାପ୍ତ ରିଟନର ତଥା ଓକିଲ ଅକ୍ଷୟ କୁମାର ବେହେରାଙ୍କ ମାଧ୍ୟମରେ ହାଜର ହୋଇ ଲିଖିତ ଭାବେ ଜଣାଇ ଗୁହାରି କରିଛନ୍ତି। ସୁପ୍ରଭାଙ୍କ ଗୁହାରିକୁ ଅତି ଗୁରୁତର ସହ ବିଚାରପତି ନେଇଥିବା ଓ କମିଟି ପକ୍ଷରୁ ସମସ୍ତ ଆଇନଗତ ସେବା ମାଗଣାରେ ଯୋଗାଇବା ଦିଆଯିବାର ରିଟନର ଅକ୍ଷୟ କୁମାର ବେହେରା କହିଛନ୍ତି। ନିର୍ବାହୀ ଅଧିକାରୀଙ୍କ ଏଭଳି ଗୋଟିଏ ଗରିବ ପରିବାର ଉପରେ ଅକ୍ରୋଶମୂଳକ ଦବଙ୍ଗଗିରି ନେଇ ସହରରେ ଜନସାଧାରଣଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ପ୍ରସନ୍ନଙ୍କ ପରିବାର ଗରିବ ଶ୍ରେଣୀର ହୋଇଥିବା ହେତୁ ତୁରନ୍ତ ଜିଲା ପ୍ରଶାସନ ପଦକ୍ଷେପ ନେଇ ସହାୟତା ଯୋଗାଇ ଦେବା ପାଇଁ ଜନସାଧାରଣ ଦାବି କରିବା ସହ ନିର୍ବାହୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ନ୍ୟାୟ ନ ମିଳିଲେ ଏନ୍ଏସି କାର୍ଯ୍ୟାଳୟ ସମ୍ମୁଖରେ ଧାରଣା ଦେବା ସହ ଆତ୍ମାହୂତି ଦେବେ ବୋଲି ପ୍ରସନ୍ନଙ୍କ ପରିବାର କହିଛନ୍ତି। ଏହାକୁ ନେଇ ନିର୍ବାହୀ ଅଧିକାରୀଙ୍କ ସହ ଯୋଗାଯୋଗ କରାଯିବାରେ ସେ କହିଛନ୍ତି, ଗାଳିଗୁଲଜ କରିବା ଘଟଣା ସମ୍ପୂର୍ଣ୍ଣ ମିଥ୍ୟା। ଏମାନଙ୍କୁ ନୋଟିସ ଦିଆଯାଇଥିଲା। ତେଣୁ ଏନଫୋର୍ସମେଣ୍ଟରେ ଭଙ୍ଗା ଯାଇଛି। ଅନ୍ୟଦୋକାନ ମଧ୍ୟ ଭଙ୍ଗାଯିବ। ତାଙ୍କ ପ୍ରତି ମୋର କୌଣସି ଅକ୍ରୋଷ ମନୋଭାବ ନ ଥିବା କହିଛନ୍ତି।