କୋପେନ୍ହେଗେନ୍/ଦୁବାଇ,୧ା୧: ଇରାନ ସମର୍ଥିତ ହୋଉଥି ଆତଙ୍କବାଦୀମାନେ ଲୋହିତ ସାଗର ସମେତ ବିଭିନ୍ନ ସାମୁଦ୍ରିକ ପଥରେ ଯାଉଥିବା ପଣ୍ୟବାହୀ ଜାହାଜକୁ ଟାର୍ଗେଟ କରି ଆକ୍ରମଣ କରୁଥିବାରୁ ଏବେ ଅନ୍ତର୍ଜାତୀୟ ବାଣିଜ୍ୟକୁ ନେଇ ଉଦ୍ବେଗ ପ୍ରକାଶ ପାଇଛି। ହୋଉଥି ଆତଙ୍କବାଦୀମାନେ ଡେନ୍ମାର୍କର ମାଏର୍ସ୍କ ହାଙ୍ଗ୍ଝୋଉ ଜାହାଜ ଉପରେ କ୍ଷେପଣାସ୍ତ୍ର ଆକ୍ରମଣ କରିଛନ୍ତି। ଆତଙ୍କବାଦୀମାନେ ବୋଟ୍ ଯୋଗେ ଆସି ୪୮ ଘଣ୍ଟା ମଧ୍ୟରେ ଲୋହିତ ସାଗରରେ ଜାହାଜ ଚଳାଚଳ ବନ୍ଦ କରିବାକୁ ଧମକ ଦେଇଥିଲେ। ଫଳରେ ମାଏର୍ସ୍କ କମ୍ପାନୀ ଏହାର ଜାହାଜ ଚଳାଚଳ ବନ୍ଦ ରଖିବାକୁ ବାଧ୍ୟ ହୋଇଛି। ଲୋହିତ ସାଗରରେ ୨୪ ଘଣ୍ଟା ମଧ୍ୟରେ ଡେନ୍ମାର୍କର ଜାହାଜ ଦ୍ୱିତୀୟ ଥର ଆକ୍ରମଣର ସମ୍ମୁଖୀନ ହେବାରୁ ଆମେରିକା ନୌସେନାର ସହାୟତା ମାଗିଥିଲା। ଡେନ୍ମାର୍କର ଜାହାଜକୁ ଦୁଇଟି ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରାଯାଇଥିବାବେଳେ ଆମେରିକା ସେନା ତାହାକୁ ଖସାଇଥିଲା। ହୋଉଥି ନିୟନ୍ତ୍ରିତ ୟେମେନ୍ରୁ ଉକ୍ତ ମିଶାଇଲ୍ ଛଡ଼ାଯାଇଥିବାବେଳେ ଗୋଟିଏ ମାଏର୍ସ୍କ ହାଙ୍ଗ୍ଝୋଉ ଜାହାଜକୁ ମାଡ଼ କରିଥିଲା। ତେବେ ଏଥିରେ ଥିବା କର୍ମଚାରୀ ସୁରକ୍ଷିତ ଥିବା ଜଣାପଡ଼ିଛି।
ଆକ୍ରମଣ ଯୋଗୁ ବିଶ୍ୱ ବାଣିଜ୍ୟ ଗୁରୁତର ପ୍ରଭାବିତ ହୋଇଛି। ବୃହତ୍ ଶିପିଂ କମ୍ପାନୀଗୁଡ଼ିକ ସୁଏଜ୍ କେନାଲ ଦେଇ ଜାହାଜ ଚଳାଚଳ କରାଇବା ପରିବର୍ତ୍ତେ ଆଫ୍ରିକାର କେପ୍ ଅଫ୍ ଗୁଡ୍ ହୋପ୍ ଦେଇ ମାଲ୍ ପରିବହନ କରୁଛନ୍ତି। ଫଳରେ ଦୀର୍ଘ ସମୟ ଲାଗିବା ସହ ଅଧିକ ଖର୍ଚ୍ଚାନ୍ତ ହେବାକୁ ପଡ଼ୁଛି। ସୁଏଜ୍ କେନାଲରେ ପ୍ରବେଶ ପାଇଁ ଲୋହିତ ସାଗର ହେଉଛି ପ୍ରବେଶ ପଥ। ଏହି ବାଟ ଦେଇ ବିଶ୍ୱ ବାଣିଜ୍ୟର ୧୨ ପ୍ରତିଶତ ହୋଇଥାଏ। ଏସିଆ ଏବଂ ୟୁରୋପ ମଧ୍ୟରେ ବାଣିଜ୍ୟ କାରବାରର ଏହା ମୁଖ୍ୟ ପଥ। ଲୋହିତ ସାଗରରେ ଜାହାଜଗୁଡ଼ିକୁ ସୁରକ୍ଷା ଦେବା ପାଇଁ ଗତ ୧୯ ତାରିଖରେ ଆମେରିକା ଅପରେଶନ ପ୍ରସ୍ପରିଟି ଗାର୍ଡିଆନ୍ ଆରମ୍ଭ କରିଥିଲା। ଏଥିରେ ୨୦ଟି ଦେଶ ଭାଗନେବାକୁ ରାଜି ହୋଇଥିଲେ।
ହୋଉଥିର ୩ ବୋଟ୍ ଡୁବାଇଲା ଆମେରିକା
ଗାଜାର ପାଲେଷ୍ଟିନୀୟମାନଙ୍କୁ ସମର୍ଥନ ଜଣାଇ ଇରାନ ସମର୍ଥତ୍ତ ହୋଉଥି ଆତଙ୍କବାଦୀମାନେ ଗୁରୁତ୍ୱପୂର୍ଣ୍ଣ ଲୋହିତ ସାଗର ଶିପିଂ ଲେନ୍ରେ ଜାହାଜଗୁଡ଼ିକୁ ଆକ୍ରମଣ କରୁଛନ୍ତି। ଆମେରିକାର ଏକ ମାଲ୍ବାହୀ ଜାହାଜ ଉପରେ ଆକ୍ରମଣ ପରେ ଏହାର ନୌସେନା ହେଲିକପ୍ଟର ହୋଉଥି ବିଦ୍ରୋହୀଙ୍କ ୩ଟି ବୋଟ୍କୁ ଡୁବାଇଦେଇଛି। ଆତଙ୍କବାଦୀମାନେ ପ୍ରଥମେ ଆମେରିକା ହେଲିକପ୍ଟରକୁ ଗୁଳି କରିବା ପରେ ଆତ୍ମରକ୍ଷା ପାଇଁ ଏହା ବୋଟ୍ଗୁଡ଼ିକୁ ପାଲଟା ଆକ୍ରମଣ କରିଥିଲା। ଆମେରିକା ନୌସେନାର ଗୁଳିମାଡ଼ ଯୋଗୁ ଜାହାଜଠାରୁ ୨୦ ମିଟର ଦୂରରେ ଥିବା ୩ଟି ବୋଟ୍ ବୁଡ଼ିଯିବା ସହ କର୍ମଚାରୀମାନଙ୍କ ମୃତ୍ୟୁ ଘଟିଛି। ଚତୁର୍ଥ ବୋଟ୍ଟି ଘଟଣାସ୍ଥଳରୁ ଖସି ପଳାଇଥିଲା।
ଆରବ ସାଗରରେ ସର୍ଭିଲାନ୍ସ ବଢ଼ିଲା
ମାଲ୍ବାହୀ ଜାହାଜ ଉପରେ ଡ୍ରୋନ୍ ଆକ୍ରମଣ ପରେ ଆରବ ସାଗର ଏବଂ ଆଡେନ୍ ଉପସାଗରରେ ଭାରତୀୟ ନୌସେନା ଏହାର ସର୍ଭିଲାନ୍ସକୁ ବଢ଼ାଇଦେଇଛି। ନୌସେନାର ଯୁଦ୍ଧଜାହାଜକୁ ଏଥିରେ ନିୟୋଜିତ କରାଯାଇଛି। ଗତ ୨୩ ତାରିଖରେ ଗୁଜରାଟଠାରୁ ପ୍ରାୟ ୨୦୦ ନଟିକାଲ ମାଇଲ୍ ଦୂର ଆରବ ସାଗରରେ ଏମ୍ଭି ଚେମ୍ ପ୍ଲୁଟୋ ନାମକ ମାଲ୍ବାହୀ ଜାହାଜ ଉପରେ ଡ୍ରୋନ୍ ଆକ୍ରମଣ ହୋଇଥିଲା। ଏଥିରେ ୨୧ ଭାରତୀୟ ଥିଲେ। ଇରାନ୍ ସମର୍ଥତ୍ତ ହୋଉଥି ଆତଙ୍କବାଦୀ ଇତିମଧ୍ୟରେ ଅନେକ ବାଣିଜି୍ୟକ ଜାହାଜ ଉପରେ ଆକ୍ରମଣ କରିଥିବାରୁ ସୁରକ୍ଷାକୁ ନେଇ ଚିନ୍ତା ବଢ଼ିଥିଲା। ଏହି ଘଟଣାର ଦିନକ ପରେ ଲୋହିତ ସାଗରରେ ଭାରତ ଆସୁଥିବା ତୈଳବାହୀ ଜାହାଜ ଏମ୍ଭି ସାଇବାବା ଉପରେ ଡ୍ରୋନ୍ ଆକ୍ରମଣ ହୋଇଥିଲା। ଗତ କିଛି ସପ୍ତାହ ହେଲା ଲୋହିତ ସାଗର, ଆଡେନ୍ ଉପସାଗର ଏବଂ ଆରବ ସାଗରରେ ବାଣିଜି୍ୟକ ଜାହାଜ ଉପରେ ଆକ୍ରମଣ ବଢ଼ୁଥିବାରୁ ଏହାକୁ ଦୃଷ୍ଟିରେ ରଖି ନୌସେନା ଆରବ ସାଗର ଓ ଆଡେନ୍ ଉପସାଗରରେ ସର୍ଭିଲାନ୍ସ ବ୍ୟବସ୍ଥା ବଢ଼ାଇଛି।
