ନୂଆଦିଲ୍ଲୀ: ସାରା ବିଶ୍ୱରେ କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାକୁ ରୋକିବାକୁ ନେଇ ଲୋକମାନଙ୍କୁ ମାସ୍କ ପିନ୍ଧିବା ସହ ସାମାଜିକ ଦୂରତା ରକ୍ଷା କରିବାକୁ ବାଧ୍ୟତାମୂଳକ କରାଯାଇଛି। ଏହାଛଡ଼ା କ୍ୱାରାଣ୍ଟାଇନ୍ରେ ରହିବା ଭଳି ନିୟମ ମାନ ମଧ୍ୟ ରହିଛି। ଏହାସତ୍ତ୍ୱେ ଏକ ଆଶ୍ଚର୍ଯ୍ୟକର ଘଟଣା ସାମ୍ନାକୁ ଆସିଛି। କରୋନା ଭୂତାଣୁ ଲକ୍ଷଣ ନ ଥାଇ ଜଣେ ମହିଳା ୭୧ଜଣ ଲୋକଙ୍କୁ ସଂକ୍ରମିତ କରିଛନ୍ତି। ଚାଇନାର ସେଣ୍ଟର ଫର୍ ଡିଜିଜ୍ କଣ୍ଟ୍ରୋଲ୍ରେ ଏହି ଘଟଣାକୁ ନେଇ ଅଧ୍ୟୟନ କରାଯାଉଛି।
ମହିଳାଜଣଙ୍କ ଆମେରିକାରୁ ନିଜ ଗସ୍ତ ସାରି ମାର୍ଚ୍ଚ ୧୯ରେ ନିଜ ଘର ଅର୍ଥାତ ଚାଇନାର ହେଲୋଗଜିଆଙ୍ଗରେ ଥିବା ନିଜ ଆପାର୍ଟମେଣ୍ଟକୁ ଫେରିଥିଲେ। ଏହାପୂର୍ବରୁ ତାଙ୍କର ଯାଞ୍ଚ କରାଯାଇଥିଲା। ତାଙ୍କର କରୋନା ରିପୋର୍ଟ ନେଗେଟିଭ୍ ମଧ୍ୟ ଆସିଥିଲା। ହେଲେ ସେ ନିଜ ଘରେ କ୍ୱାରାଣ୍ଟାଇନ୍ରେ ରହିବାକୁ ନିଷ୍ପତ୍ତି ନେଇଥିଲେ। ସେତେବେଳେ ତାଙ୍କର କୌଣସି ଲକ୍ଷଣ ନ ଥିଲା।
ଆପାର୍ଟମେଣ୍ଟକୁ ଯାଉଥିବା ସମୟରେ ଲିଫ୍ଟରେ ସେ ଏକୁଟିଆ ମଧ୍ୟ ଥିଲେ। ତାଙ୍କ ପରେ ଜଣେ ପଡ଼ୋଶୀ ସେଥିରେ ଚଢ଼ିଥିଲେ। ଏହାପରେ ତାଙ୍କ ମା’ ଏବଂ ତାଙ୍କୁ ଭେଟିବାକୁ ଆସିଥିବା ପ୍ରେମିକ ଏକ ପାର୍ଟିକୁ ଯାଇଥିଲେ। ଏପ୍ରିଲ ୨ରେ ପାର୍ଟିରେ ଯୋଗଦେଇଥିବା ଜଣେ ବ୍ୟକ୍ତିଙ୍କୁ ଷ୍ଟ୍ରୋକ୍ ହୋଇଥିଲା। ତାଙ୍କୁ ଚିକିତ୍ସା ପାଇଁ ନିଆଯିବା ସମୟରେ ସେ ଆଉ ୨୮ଜଣଙ୍କୁ ସଂକ୍ରମିତ କରିଥିଲେ। ସେଠାରୁ ଅନ୍ୟ ଏକ ହସ୍ପିଟାଲକୁ ସେ ଯାଇଥିଲେ, ଯେଉଁଠି ୨୦ ଅନ୍ୟ ଲୋକଙ୍କୁ ସେ ସଂକ୍ରମିତ କରିଥିଲେ। ଏହିଭଳି ଭାବେ ସଂକ୍ରମଣ ବ୍ୟାପିଥିଲା। ତେବେ ପରେ ଲକ୍ଷଣ ନ ଥିବା ମହିଳାଙ୍କ ସ୍ବାବ୍ ଟେଷ୍ଟ ପାଇଁ ପଠାଯାଇଥିଲା। ଏଥର ସେ ପଜିଟିଭ୍ ହୋଇଥିଲେ। ଅର୍ଥାତ ସେ କରୋନାରେ ସଂକ୍ରମିତ ହୋଇଯାରିଥିଲେ। ଲିଫ୍ଟରେ ଯାଇଥିବା ଯୋଗୁ ପଡୋଶୀ ସଂକ୍ରମିତ ହୋଇଥିଲେ। ଏହାପରେ ଏହା ମୋଟ ୭୧ଜଣ ଲୋକଙ୍କୁ କରୋନା ହୋଇଯାଇଥିଲା। ଏଣୁ ଲକ୍ଷଣ ନ ଥିଲେ ବି ଜଣଙ୍କଠାରୁ କରୋନା ବ୍ୟାପିପାରେ ବୋଲି କୁହାଯାଉଛି। ଏନେଇ ଚାଇନାର ସିଡିସିରେ ଅଧ୍ୟୟନ କରାଯାଉଥିବା ଜଣାପଡ଼ିଛି।