ନୂଆଦିଲ୍ଲୀ,୨୪।୯: ଟିଏମସି ନେତା ରିଜୁ ଦତ୍ତଙ୍କ ପରେ ଏବେ କଂଗ୍ରେସ ନେତା ଦିଗବିଜୟ ସିଂ ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ତିନି ଦିନିଆ ଆମେରିକା ଗସ୍ତ ଉପରେ ପ୍ରଶ୍ନ ଉଠାଇଛନ୍ତି। ସେ ଶୁକ୍ରବାର ଟୁଇଟ କରି କହିଛନ୍ତି- ମୁଁ ଯେତିକି ଜାଣେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କୋଭାକ୍ସିନ୍ ଟିକା ନେଇଥିଲେ, ଆମେରିକାରେ ଏହି ଟିକା ଅନୁମୋଦିତ ନୁହେଁ। ସେ ଅନ୍ୟ କୌଣସି ଟିକା ନେଇଛନ୍ତି ନା ତାଙ୍କୁ ଆମେରିକା ପ୍ରଶାସନ ପକ୍ଷରୁ ଏକ ବିଶେଷ ରିହାତି ଦିଆଯାଇଛି ବୋଲି ସେ ପ୍ରଶ୍ନ କରିଛନ୍ତି। ଦିଗବିଜୟ ଆହୁରି ଲେଖିଛନ୍ତି ଯେ, ଟିକା ପାଇଥିବା ପ୍ରଧାନମନ୍ତ୍ରୀ ମୋଦି କିପରି ଆମେରିକାରେ ଅନୁମତି ପାଇଲେ ଦେଶ ଜାଣିବାକୁ ଚାହୁଁଛି।
ଏହାପୂର୍ବରୁ ରିଜୁ ଦତ୍ତା ବୁଧବାର ଟୁଇଟ୍ କରି କହିଥିଲେ ଯେ, ପ୍ରଧାନମନ୍ତ୍ରୀ ମୋଦି କିପରି ଆମେରିକା ଗସ୍ତ ପାଇଁ ଅନୁମତି ପାଇଛନ୍ତି। କାରଣ ଆମେରିକା ଏପର୍ଯ୍ୟନ୍ତ ଭାରତରେ ଉତ୍ପାଦିତ କୋଭାକ୍ସିନକୁ ସ୍ବୀକୃତି ଦେଇନାହିଁ। ଏହି ପ୍ରସଙ୍ଗରେ ସେ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କରଙ୍କଠାରୁ ଉତ୍ତର ମାଗିଥିଲେ। ସମସ୍ତ ନିୟମ କେବଳ ଟିକସଦାତାଙ୍କ ପାଇଁ ଅଛି କି ବୋଲି ସେ ପ୍ରଶ୍ନ କରିଥିଲେ।
ସୂଚନାଯୋଗ୍ୟ ଯେ, ଭାରତରେ ଉତ୍ପାଦିତ କୋଭାକ୍ସିନକୁ ଏପର୍ଯ୍ୟନ୍ତ ବିଶ୍ୱ ସ୍ବାସ୍ଥ୍ୟ ସଂଗଠନ ଦ୍ୱାରା କିମ୍ବା ଆମେରିକା ପ୍ରଶାସନ ଦ୍ୱାରା ଏହା ସ୍ବୀକୃତିପ୍ରାପ୍ତ ନୁହେଁ। ତେବେ ଏହି ଟିକାକୁ ଚିହ୍ନିବା ପାଇଁ ଅକ୍ଟୋବର ୫ରେ ବିଶ୍ୱ ସ୍ବାସ୍ଥ୍ୟ ସଂଗଠନ ଦ୍ୱାରା ଏକ ବୈଠକ ପ୍ରସ୍ତାବ ଦିଆଯାଇଛି।