![](https://www.dharitri.com/wp-content/uploads/2024/06/Rahul-gandhi-1.jpg)
ନୂଆଦିଲ୍ଲୀ,୪।୬: କଥାରେ ଅଛି ଦିଲ୍ଲୀର ଶସନ କ୍ଷମତାର ରାସ୍ତା ଉତ୍ତର ପ୍ରଦେଶ ବାଟ ଦେଇ ଯାଇଥାଏ। ଭାଜପା ୨୦୧୪ ଏବଂ ୨୦୧୯ ରେ ୟୁପି ବାଟ ଦେଇ ଲଗାତର ଦଇ ଥର କେନ୍ଦ୍ରରେ ସରକାର ଗଢ଼ିବାରେ ସଫଳ ହୋଇଥିଲା। ହେଲେ ୨୦୨୪ରେ ‘ଦୁଇ ଯୁବକ’ଙ୍କ ଯୋଡ଼ି(ଅଖିଳେଶ ଯାଦବ ଏବଂ ରାହୁଲ ଗାନ୍ଧି) ଭାଜପା ବାଟରେ କଣ୍ଟା ସାଜିଛନ୍ତି। ଭାଜପାକୁ କ୍ଷମତାର ହାଟ୍ରିକ୍ରୁ ରୋକିବା ପାଇଁ ସମାଜବାଦୀ ପାର୍ଟି ଏବଂ କଂଗ୍ରେସ ହାତ ମିଳାଇବା ଯୋଜନା ଫଳପ୍ରଦ ହେବା ଭଳି ଲାଗୁଛି। ବିଶେଷକରି ୟୁପିରୁ ଭାଜପାକୁ ବଡ଼ ଝଟ୍କା ଲାଗୁଥିବା ଦେଖାଯାଉଛି। ଗୋଟିଏ ପଟେ ଅଖିଳେଶଙ୍କ ପିଡିଏ ଫର୍ମୁଲା କାମ କରିଥିବା ବେଳେ ରାହୁଲଙ୍କ ସମ୍ବିଧାନ, ଆରଂକ୍ଷଣ ଉପରେ ବିପଦର ସ୍ଲୋଗାନ ଜନସାଧାରଣଙ୍କ ହୃଦୟ ଜିତିଛି।
ଉତ୍ତରପ୍ରଦେଶର ୮୦ ଲୋକ ସଭା ଆସନରେ ରାଜନୈତିକ ଚିତ୍ର ସ୍ପଷ୍ଟ ହେବାରେ ଲାଗିଛି। ଏଯାବତର ପରିଣାମ ଅନୁଯାୟୀ ଭାଜପା ଏବଂ ସମାଜବାଦୀ ପାର୍ଟି ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଛି। ଉଭୟ ଦଳର ଲୋକ ସଭା ଆସନ ବୃଦ୍ଧି ପାଇବାରେ ଲାଗିଛି। କେବଳ ଏତିକି ନୁହେଁ ଭାଜପାର ସହଯୋଗୀ ଦଳର ଆସନ ସଂଖ୍ୟା କମ୍ ହେଉଛି। ବିଏସ୍ପି ଖାତା ଖୋଲିବାରେ ସଫଳ ହୋଇପାରିବ ନାହିଁ ବୋଲି କୁହାଯାଉଛି।
ରାଜ୍ୟରେ ସମାଜବାଦୀ ଦଳ ୩୦ରୁ ଅଧିକ ଆସନରେ ଆଗୁଆ ଥିବା ବେଳେ କଂଗ୍ରେସ ୬ରୁ ୭ ଆସନରେ ଆଗୁଆ ରହିଛି। ଭାଜପା ୩୪ ଆସନରେ ଆଗୁଆ ଥିଲେ ହେଁ କମ୍ ଭୋଟ ବ୍ୟବଧାନ ଥିବାରୁ ନିର୍ଣ୍ଣାୟକ ଫଳାଫଳ ଭିନ୍ନ ହୋଇପାରେ ବୋଲି ଅନୁମାନ କରାଯାଉଛି। ମୋଟ ଉପରେ କହିବାକୁ ଗଲେ ଭାଜପା ରଣନୀତି ଉପରେ ଅଖିଳେଶ ଏବଂ ରାହୁଲଙ୍କ ରଣନୀତି ଭାରି ପଡ଼ୁଥିବା ଦେଖାଯାଉଛି। ବିଶେଷ କରି ଦୁହିଁଙ୍କ ମେଣ୍ଟ ପରେ ମୁସଲମାନ ପ୍ରାର୍ଥୀ ଏକଜୁଟ୍ ହେବା ଖେଳ ବିଗାଡ଼ି ଦେଇଛି।
ୟୁପିରେ ୨୦% ମୁସଲମାନ ଭୋଟର ଅଛନ୍ତି। ସମାଜବାଦୀ ଏବଂ କଂଗ୍ରେସ ମେଣ୍ଟ ପରେ ମୁସଲମାନଙ୍କ ଦ୍ୱନ୍ଦ୍ୱ ସମାପ୍ତ ହୋଇଯାଇଥିଲା। ଏମାନଙ୍କ ଭୋଟ ‘ଇଣ୍ଡିଆ’ ମେଣ୍ଟ ପକ୍ଷରେ ଯାଇଛି।