ନୂଆଦିଲ୍ଲୀ,୧୦।୧: ଦିଲ୍ଲୀ ବିଧାନସଭା ନିର୍ବାଚନ ପାଇଁ ଏବେ ମାତ୍ର ୨୬ ଦିନ ବାକି ଅଛି। କିନ୍ତୁ ଏହା ପୂର୍ବରୁ ରାଜଧାନୀ ଦିଲ୍ଲୀରେ ରାଜନୈତିକ ଅସ୍ଥିରତା ଦେଖାଦେଇଛି। କହିରଖୁଛୁ ଯେ ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିକଟରେ ଜାଟ ସମ୍ପ୍ରଦାୟକୁ କେନ୍ଦ୍ରର ଓବିସି ତାଲିକାରେ ସାମିଲ କରିବାକୁ ଦାବି କରିଛନ୍ତି। ତେବେ କିପରି କୌଣସି ଜାତିକୁ OBC ତାଲିକାରେ ଯୋଡା ଯାଇଥାଏ? ଜାଣନ୍ତୁ ସେ ସମ୍ପର୍କରେ…
ଆମ ଆଦମୀ ପାର୍ଟିର ସଂଯୋଜକ ଅରବିନ୍ଦ କେଜରିୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ଚିଠି ଲେଖିଛନ୍ତି। ଏହି ଚିଠିରେ ସେ କେନ୍ଦ୍ରର ଓବିସି ତାଲିକାରେ ଜାଟ ସମ୍ପ୍ରଦାୟକୁ ସାମିଲ କରିବାକୁ ଦାବି କରିଛନ୍ତି। କେବଳ ଏତିକି ନୁହେଁ ମୋଦି ‘ଜାଟ ସମ୍ପ୍ରଦାୟ’ ସହିତ ବିଶ୍ୱାସଘାତକତା କରିଥିବା କେଜରିଓ୍ବାଲ ଅଭିଯୋଗ କରିଛନ୍ତି। କେଜରିୱାଲ କହିଛନ୍ତି ଯେ ଦିଲ୍ଲୀରେ ଓବିସି ମାନ୍ୟତା ପାଇଥିବା ଜାଟ ଏବଂ ଅନ୍ୟ ସମସ୍ତ ଜାତିକୁ କେନ୍ଦ୍ରର ଓବିସି ତାଲିକାରେ ଅନ୍ତର୍ଭୁକ୍ତ କରାଯିବା ଉଚିତ।
ଏବେ ପ୍ରଶ୍ନ ହେଉଛି OBC ତାଲିକାରେ କୌଣସି ଜାତିକୁ ସାମିଲ କରିବାର ପ୍ରକ୍ରିୟା କ’ଣ? ସୂଚନା ଅନୁଯାୟୀ, ଓବିସି ତାଲିକାରେ କୌଣସି ଜାତିକୁ ଯୋଡିବା ପାଇଁ, ଲୋକ ସଭା ଏବଂ ରାଜ୍ୟ ସଭାରେ ଏକ ବିଲ ଆଗତ ଏବଂ ପାରିତ କରିବାକୁ ପଡିବ। ଯାହା ପରେ ବିଲ ଶେଷରେ ରାଷ୍ଟ୍ରପତିଙ୍କ ନିକଟକୁ ଯାଇଥାଏ। ଯେଉଁଠାରୁ ରାଷ୍ଟ୍ରପତିଙ୍କ ସମ୍ମତି ପରେ, ସେହି ବିଲ କାର୍ଯ୍ୟକାରୀ କରିବା ପାଇଁ ଏକ ବିଜ୍ଞପ୍ତି ଜାରି କରାଯାଏ।
ଦେଶରେ ଏକ ନୂଆ ଆଇନ ଆଣିବା ପାଇଁ ଲୋକ ସଭା ଏବଂ ରାଜ୍ୟ ସଭାରେ ବିଲ ପାସ କରାଇବାକୁ ପଡିଥାଏ। ସେହିପରି, OBC ରେ ଏକ ନୂଆ ଜାତି ଯୋଡିବା ପାଇଁ, ଏକ ବିଲ ଆଗତ କରି ଏକ ନୂଆ ଆଇନ ଆଣିବାକୁ ପଡିବ। ଯଦି ସରକାରଙ୍କୁ କୌଣସି ଜାତିକୁ OBCରେ ଅନ୍ତର୍ଭୁକ୍ତ କରିବା ପାଇଁ ଏକ ବିଲ ଆଣିବାକୁ ପଡ଼େ, ତେବେ ପ୍ରଥମେ ସେହି ବିଷୟରେ ସାଧାରଣ ଜନତା, ବିଶେଷଜ୍ଞଙ୍କ ମତାମତ ଲୋଡିବେ। ମତାମତ ପାଇବା ପରେ, ସରକାର ଏଥିରେ ପ୍ରାପ୍ତ ପରାମର୍ଶଗୁଡ଼ିକୁ ଆଧାର କରି ବିଶେଷଜ୍ଞଙ୍କ ଏକ ଦଳ ମାଧ୍ୟମରେ ଏହାର ଚିଠା ପ୍ରସ୍ତୁତ କରିବେ। ଚିଠା ପ୍ରସ୍ତୁତ କରିବା ପରେ, ଏହାକୁ ଆଇନ ମନ୍ତ୍ରଣାଳୟକୁ ପଠାଇବେ, ଯେଉଁଠାରେ ବିଲର ବୈଧତା ଏବଂ ଆଇନଗତ ଦିଗଗୁଡ଼ିକ ଯାଞ୍ଚ କରାଯିବ। ଏହା ପରେ ବିଲକୁ କ୍ୟାବିନେଟ ନିକଟକୁ ପଠାଯିବ। କ୍ୟାବିନେଟରେ ପାରିତ ହେବା ପରେ, ବିଲ ସଂସଦରେ ଉପସ୍ଥାପିତ ହେବ। ଦେଶର ଉଭୟ ଗୃହରେ ବିଲ ପାରିତ ହେବା ପରେ, ଏହାକୁ ରାଷ୍ଟ୍ରପତିଙ୍କ ନିକଟକୁ ପଠାଯିବ, ଏବଂ ରାଷ୍ଟ୍ରପତିଙ୍କ ସମ୍ମତି ପରେ, ବିଲ ସମ୍ପର୍କରେ ଏକ ବିଜ୍ଞପ୍ତି ଜାରି କରାଯିବ। ଯାହା ପରେ ସେହି ଜାତିକୁ ଓବିସି ତାଲିକାରେ ଅନ୍ତର୍ଭୁକ୍ତ କରାଯିବ।