ନୂଆଦିଲ୍ଲୀ,୨୨।୭: ଆଇପିଏଲ ୨୦୨୩ ସମୟରେ ବିରାଟ କୋହଲି ଏବଂ ଗୌତମ ଗମ୍ଭୀରଙ୍କ ମଧ୍ୟରେ ବିବାଦ ଥିବା ସମସ୍ତେ ଜାଣନ୍ତି। ଆଇପିଏଲ୍ରେ ଗମ୍ଭୀର ଲକ୍ଷ୍ନୌ ସୁପର ଜିଆଣ୍ଟସର ପରାମର୍ଶଦାତା ଥିଲେ ଏବଂ କୋହଲି ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ପାଇଁ ଖେଳୁଥିଲେ। ଆରସିବି ବନାମ ଏଲଏସଜି ମ୍ୟାଚ ପରେ ଦୁହେଁ ପଡ଼ିଆରେ ଝଗଡା କରିଥିଲେ। ଗମ୍ଭୀର ୨୦୨୪ରେ ଦଳ ବଦଳାଇ କେକେଆରର ମେଣ୍ଟର ହୋଇଥିଲେ। ଏହା ପରେ କେକେଆର୍ ବନାମ ଆରସିବି ମ୍ୟାଚ ସମୟରେ ଗମ୍ଭୀର କୋହଲିଙ୍କ ସହ ଆଲିଙ୍ଗନ କରି ହସୁଥିବାର ନଜର ଆସିଥିଲେ। ତା’ପରେ ଲାଗିଲା ସବୁ ଠିକ ଅଛି। ଏବେ ଗମ୍ଭୀର ନିଜେ ବିରାଟଙ୍କ ସହ ସମ୍ପର୍କ ପ୍ରକାଶ କରିଛନ୍ତି।
ଟିମ ଇଣ୍ଡିଆର ମୁଖ୍ୟ କୋଚ ହେବା ପରେ ଗମ୍ଭୀର ପ୍ରଥମ ଥର ପାଇଁ ଗଣମାଧ୍ୟମକୁ ସମ୍ବୋଧିତ କରିଥିଲେ। ଗମ୍ଭୀର କହିଛନ୍ତି- ଟିଆରପି ପାଇଁ ବିରାଟ କୋହଲିଙ୍କ ସହ ମୋର କୌଣସି ସମ୍ପର୍କ ନାହିଁ। ଆମେ ୧୪୦ କୋଟି ଭାରତୀୟଙ୍କୁ ପ୍ରତିନିଧିତ୍ୱ କରୁଛୁ। ପଡ଼ିଆରେ ତାଙ୍କ ସହ ମୋର ବହୁତ ଭଲ ସମ୍ପର୍କ ଅଛି। କିନ୍ତୁ ଏହା ଜନସାଧାରଣଙ୍କୁ ଦେଖାଇବା ପାଇଁ ନୁହେଁ। କୋହଲି ଜଣେ ବିଶ୍ୱ ସ୍ତରୀୟ ଆଥଲେଟ ଏବଂ ଆଶାକରେ ସେ ଏପରି ଜାରି ରଖିବେ।