ମେଲବୋର୍ନ,୨।୧(ପି.ଟି.): ଗତ ଦୁଇଟି ଟେଷ୍ଟରେ ଆମେ ଭାରତୀୟ ବୋଲରଙ୍କ ଜାଲରେ କେତେଥର ଫସିଛୁ ବୋଲି ଅଷ୍ଟ୍ରେଲିଆ ଯୁବ ବ୍ୟାଟ୍ସମ୍ୟାନ ମାର୍ନସ ଲାବୁସ୍କାନ ସ୍ବୀକାର କରିଛନ୍ତି। ଭାରତୀୟ ବୋଲରମାନେ ସଫଳତାର ସହ ଆମକୁ କେତେଥର ଚକ୍ମା ଦେଇଛନ୍ତି। ଅଭିଜ୍ଞ ସ୍ପିନର ରବିଚନ୍ଦ୍ରନ ଅଶ୍ୱିନଙ୍କ ନେତୃତ୍ୱରେ ଭାରତୀୟ ବୋଲର ଦମ୍ଦାର ପ୍ରଦର୍ଶନ କରିଛନ୍ତି। ତେବେ ସିରିଜରେ ଏପର୍ଯ୍ୟନ୍ତ ଆଶାନୁରୂପ ପ୍ରଦର୍ଶନ କରିପାରି ନ ଥିବା ଷ୍ଟିଭ୍ ସ୍ମିଥ୍ଙ୍କୁ ସେ ସମର୍ଥନ କରିଛନ୍ତି।
ଅଷ୍ଟ୍ରେଲିଆ ଏପର୍ଯ୍ୟନ୍ତ ଖେଳିଥିବା ୪ରୁ ୩ଟି ଇନିଂସରେ ୧୯୧, ୧୯୫ ଓ ୨୦୦ ରନରେ ଅଲ୍ଆଉଟ ହୋଇଛି। ଅଶ୍ୱିନ ଏପର୍ଯ୍ୟନ୍ତ ୧୦ଟି ଉଇକେଟ ହାସଲ କରିଛନ୍ତି। ସେ ସ୍ମିଥ୍ଙ୍କୁ ଦୁଇଥର ଓ ଲାବୁସ୍କାନଙ୍କୁ ଥରେ ଆଉଟ କରିଛନ୍ତି। ସିରିଜ ପୂର୍ବରୁ କେବେ ଅଶ୍ୱିନଙ୍କର ସମ୍ମୁଖୀନ ହୋଇ ନ ଥିଲି। ଅଶ୍ୱିନ ଜଣେ ମହାନ୍ ବୋଲର ଓ ତାଙ୍କର କ୍ରିକେଟିଂ ସେନ୍ସ ମଧ୍ୟ ରହିଛି ବୋଲି ଏକ ଭର୍ଚୁଆଲ ଖବରଦାତା ସମ୍ମିଳନୀରେ ଯୋଗ ଦେଇ ୨୬ ବର୍ଷୀୟ ଲାବୁସ୍କାନ କହିଛନ୍ତି। ଭାରତୀୟ ପେସ୍ ଓ ସ୍ପିନ୍ ବୋଲିଂକୁ ସମ୍ମୁଖୀନ ହେବାରେ ଆମେ ବିଫଳ ହୋଇଛୁ ବୋଲି ସେ ସ୍ବୀକାର କରିଛନ୍ତି।
ଯୋଜନାବଦ୍ଧ ଭାବେ ବୋଲିଂ କରି ଭାରତ ଅଷ୍ଟ୍ରେଲିଆକୁ ଦୁଇଟି ଟେଷ୍ଟରେ ୨୦୦ ରନ ପାର କରିବାର ସୁଯୋଗ ଦେଇନାହିଁ। ଯୋଜନାବଦ୍ଧ ଭାବେ ଅତି ଶୃଙ୍ଖଳିତ ଭାବେ ଭାରତୀୟ ଦ୍ରୁତ ବୋଲର ଓ ସ୍ପିନର ବୋଲିଂ କରିଛନ୍ତି ଲାବୁସ୍କାନ କହିଛନ୍ତି। ଖରାପ ଫର୍ମ ଦେଇ ଗତି କରୁଥିଲେ ମଧ୍ୟ ସ୍ମିଥ୍ଙ୍କୁ ସେ ସମର୍ଥନ କରିଛନ୍ତି। ସେ ଧଳା ବଲରେ ବହୁତ କ୍ରିକେଟ ଖେଳିଛନ୍ତି ଓ ଲାଲ ବଲରେ ସେ ଅଧିକ ଖେଳିନାହାନ୍ତି। ତେଣୁ ସେ କିଛି ସମସ୍ୟାର ସମ୍ମୁଖୀନ ହୋଇଛନ୍ତି। ତେବେ ସ୍ମିଥ୍ ଖୁବ୍ଶୀଘ୍ର ପ୍ରତ୍ୟାବର୍ତ୍ତନ କରିବେ ବୋଲି ଲାବୁସ୍କାନ କହିଛନ୍ତି। ଆମେ କେତୋଟି ଗୁରୁତ୍ୱପୂର୍ଣ୍ଣ କ୍ୟାଚ୍ ମିସ୍ କରି ଭାରତକୁ ସୁଯୋଗ ଦେଇଛୁ। ବକ୍ସିଂ ଡେ ଟେଷ୍ଟରେ ଆମେ ୮ଟି କ୍ୟାଚ୍ ହାତଛଡ଼ା କରିଥିଲୁ। ଲାବୁସ୍କାନ ଦୁଇଟି କ୍ୟାଚ୍ ମିସ୍ କରିଥିଲେ। ବ୍ୟାଟିଂ ସହିତ ଫିଲ୍ଡିଂ ଉପରେ ଆମେ ଏବେ ଧ୍ୟାନ ଦେଉଛୁ। ଏନେଇ ଦଳର କଠିନ ପରିଶ୍ରମ ଜାରି ରହିଛି। ତ୍ରୁଟି ସୁଧାରିବା ଉପରେ ଆମେ ଧ୍ୟାନ ଦେଉଛୁ ବୋଲି ଲାବୁସ୍କାନ କହିଛନ୍ତି।
