ନୂଆଦିଲ୍ଲୀ,୨୮।୨: ଭାରତୀୟ କ୍ରିକେଟ ବୋର୍ଡ ଅଫ କ୍ରିକେଟ(ବିସିସିଆଇ) ବୁଧବାର ୨୦୨୩-୨୪ ସିଜନ (ଅକ୍ଟୋବର ୧, ୨୦୨୩ ରୁ ସେପ୍ଟେମ୍ବର ୩୦, ୨୦୨୪) ପାଇଁ ଟିମ ଇଣ୍ଡିଆ (ସିନିୟର ପୁରୁଷ)ର ସେଣ୍ଟ୍ରାଲ କଣ୍ଟ୍ରାକ୍ଟ ତାଲିକା ଘୋଷଣା କରିଛି।
ଶ୍ରେୟସ ଆୟର ଓ ଇଶାନ କିଶନ ସେଣ୍ଟ୍ରାଲ କଣ୍ଟ୍ରାକ୍ଟରୁ ବାଦ୍ ପଡିଥିବା ବେଳେ ରିଙ୍କୁ ସିଂ ଓ ତିଲକ ବର୍ମା ପ୍ରଥମ ଥର ସାମିଲ ହୋଇଛନ୍ତି। ସିଧାସଳଖ ଆଦେଶ ଅବମାନନା କରି ରଣଜୀ ଟ୍ରଫି ଖେଳି ନ ଥିବାରୁ ଆୟର ଓ କିଶନଙ୍କ ନାମ ବିଚାରକୁ ନିଆ ଯାଇ ନ ଥିବା ବିସିସିଆଇ ପକ୍ଷରୁ ଏକ ବିବୃତିରେ କୁହାଯାଇଛି।
ସମୁଦାୟ ୪ଟି ବର୍ଗରେ ୩୦ ଜଣ ଖେଳାଳିଙ୍କୁ ରଖାଯାଇଛି। ଏ ପ୍ଲସ୍ ବର୍ଗରେ ବିରାଟ କୋହଲି, ରୋହିତ ଶର୍ମା, ଯଶପ୍ରୀତ୍ ବୁମ୍ରା ଓ ରବୀନ୍ଦ୍ର ଜାଡେଜା ସ୍ଥାନ ପାଇଛନ୍ତି। ଏ’ ବର୍ଗରେ ୬ ଜଣ କ୍ରିକେଟର ରବିଚନ୍ଦ୍ରନ ଅଶ୍ୱିନ, ମହମ୍ମଦ ଶାମି, ମହମ୍ମଦ ସିରାଜ, ଲୋକେଶ ରାହୁଲ, ଶୁବମନ ଗିଲ ଓ ହାର୍ଦ୍ଦିକ ପାଣ୍ଡ୍ୟାଙ୍କୁ ରଖାଯାଇଛି। ସେହିଭଳି ବି’ ବର୍ଗରେ ୫ ଜଣ ଖେଳାଳି ସୂର୍ଯ୍ୟକୁମାର ଯାଦବ, ରିଷଭ ପନ୍ତ, କୁଲଦୀପ ଯାଦବ, ଅକ୍ଷର ପଟେଲ ଓ ଯଶସ୍ବୀ ଜୟସ୍ବାଲ ସ୍ଥାନ ପାଇଛନ୍ତି। ସେହିପରି ୧୫ ଜଣ ଖେଳାଳିଙ୍କୁ ଗ୍ରୁପ୍ ସି’ରେ ସାମିଲ କରାଯାଇଛି। ରିଙ୍କୁ ସିଂ, ତିଳକ ବର୍ମା, ଋତୁରାଜ ଗାଏକ୍ୱାଡ, ଶାର୍ଦ୍ଦୂଳ ଠାକୁର, ଶିବମ ଦୁବେ, ରବି ବିଷ୍ଣୋଇ, ଜିତେଶ ଶର୍ମା, ଓ୍ବାଶିଂଟନ୍ ସୁନ୍ଦର, ମୁକେଶ କୁମାର, ସଞ୍ଜୁ ସାମସନ, ଅର୍ଶଦୀପ ସିଂ, କେ. ଏସ୍. ଭରତ, ପ୍ରସିଦ୍ଧ କ୍ରିଷ୍ଣା, ଆଭେଶ ଖାନ୍ ଓ ରଜତ ପଟିଦାର ଏହି ଗ୍ରୁପ୍ରେ ସାମିଲ ଅଛନ୍ତି। ଏହା ସହ ଫାଷ୍ଟ ବୋଲିଂ କଣ୍ଟ୍ରାକ୍ଟ ପାଇଁ ଆକାଶ ଦୀପ୍, ବିଜୟ କୁମାର ବ୍ୟଶକ, ଉମ୍ରାନ ମଲିକ, ୟଶ ଦୟାଲ ଓ ବିଦ୍ୱଥ କାଭେରପ୍ପାଙ୍କ ନାମ ପ୍ରସ୍ତାବ ଦିଆଯାଇଛି।
ଏ’ ପ୍ଲସ୍ ବର୍ଗ ପାଇଁ ବାର୍ଷିକ ୭ କୋଟିର ବେତନ ମିଳୁଥିବା ବେଳେ ଏ, ବି ଓ ସି କାଟାଗୋରି ପାଇଁ ଯଥାକ୍ରମେ ୫, ୩ ଓ ୧ କୋଟି ଟଙ୍କା ପ୍ରଦାନ କରାଯାଇଥାଏ। ତେବେ ଚଳିତ ବର୍ଷ କେଉଁ ବର୍ଗ ପାଇଁ କେତେ କୋଟି ଟଙ୍କା ମିଳୁଛି ତାହା ସ୍ପଷ୍ଟ ହୋଇନାହିଁ। ଏହା ସହ ସିନିୟର ଖେଳାଳି ଚେତେଶ୍ୱର ପୂଜାରା, ଶିଖର ଧାଓ୍ବନ ଓ ୟୁଜବେନ୍ଦ୍ର ଚହଲଙ୍କୁ ଚଳିତ ବର୍ଷର କଣ୍ଟ୍ରାକ୍ଟରେ ସ୍ଥାନ ମିଳିନାହିଁ।