ନୂଆଦିଲ୍ଲୀ,୨୮ା୪: ଯୁଗ୍ମ ବ୍ୟାଙ୍କ ଆକାଉଣ୍ଟ ଖୋଲିବା କିମ୍ବା ବୀମା ପଲିସିରେ ପାର୍ଟନରଙ୍କୁ ନୋମିନୀ ରଖିବା ଆଦି ମୌଳିକ ସାମାଜିକ ଅଧିକାର ସମଲିଙ୍ଗୀ ଯୋଡ଼ି କିପରି ପାଇବେ, ସରକାର ତାହା ଖୋଜି ବାହାର କରିବା ଆବଶ୍ୟକ ବୋଲି ସୁପ୍ରିମକୋର୍ଟ ଗୁରୁବାର କହିଛନ୍ତି। ଯାହା ଜଣାପଡ଼ୁଛି, ସମଲିଙ୍ଗୀ ବିବାହକୁ ଆଇନଗତ ସ୍ବୀକୃତି ଦେବା ପାର୍ଲାମେଣ୍ଟର ବିଶେଷ ଅଧିକାର ଭାବେ ସର୍ବୋଚ୍ଚ ଅଦାଲତ ଗ୍ରହଣ କରିପାରନ୍ତି। ସମଲିଙ୍ଗୀ ବିବାହର ଆଇନଗତ ବୈଧତାକୁ କେନ୍ଦ୍ର ସରକାର ବିରୋଧ କରିଆସୁଛନ୍ତି। ଅନ୍ୟପକ୍ଷେ ବିବାହ ଅଧିକାର ନ ମିଳିବା ସେମାନଙ୍କ ମୌଳିକ ଅଧିକାରର ଉଲ୍ଲଂଘନ ଏବଂ ପକ୍ଷପାତିତା ବୋଲି ଆବେଦନକାରୀମାନେ ଯୁକ୍ତି କରିଛନ୍ତି। ସମଲିଙ୍ଗୀ ଯୋଡ଼ିଙ୍କୁ ବିବାହ ମାନ୍ୟତା ନ ଦେଇ ସେମାନଙ୍କ ବିଭିନ୍ନ ସମସ୍ୟାର କିପରି ସମାଧାନ କରାଯାଇପାରିବ, ତାହା ଉପରେ ସର୍ବୋଚ୍ଚ ଅଦାଲତ ସଲିସିଟର ଜେନେରାଲଙ୍କୁ ଜବାବ ମାଗିଛନ୍ତି। ଅଦାଲତରେ ନୁହେଁ, ପାର୍ଲାମେଣ୍ଟରେ ସମଲିଙ୍ଗୀ ବିବାହ ପ୍ରସଙ୍ଗରେ ବିତର୍କ ହେବା ଆବଶ୍ୟକ ବୋଲି ବୁଧବାର କେନ୍ଦ୍ର ଆଇନମନ୍ତ୍ରୀ କିରେନ ରିଜିଜୁ କହିଥିଲେ।
